Хто напіша гімн пчале?

У Саюз пісьменнікаў Беларусі звярнуўся віцэ-прэзідэнт Апіславіі, старшыня саюза «БелАпіЮніян», капелан пчаляроў Беларусі, дактарант, канонік-дэкан Уладзіслаў Завальнюк. У Мінску восенню 2020 года адбудзецца чарговы — XXIII кангрэс-форум — Апіславія. Гэта сусветнае пчалярскае аб’яднанне, у склад якога ўваходзяць 48 краін Еўропы і Азіі.

Плануецца, што на мерапрыемства збяруцца дэлегаты з 60 краін свету, а таксама каля 5—7 тысяч гасцей. Цяпер праводзяцца планавыя і кантактныя напрацоўкі ў дачыненні да будучай значнай падзеі не толькі для беларускіх пчаляроў, але і для ўсёй краіны.

— Падчас сустрэчы ў Маскве аргкамітэт Апіславіі даручыў беларускай дэлегацыі паклапаціцца пра словы і музыку — гімн Апіславіі, — заўважае Уладзіслаў Завальнюк, які лічыць, што ў такой творчай справе аб’яднанню пчаляроў аніяк не абысціся без пісьменніцкай арганізацыі.

Таму кожны пісьменнік можа паспрабаваць напісаць гімн Апіславіі, які прагучыць на адкрыцці кангрэса-форуму пчалярскіх аб’яднанняў у Мінску ў 2020 годзе. Варта мець на ўвазе: гімн будзе перакладзены на англійскую мову, бо ў Саюзе Апіславіі дзейнічаюць дзве мовы: англійская і руская. Нашым аўтарам прапануецца стварыць словы гімна на рускай.

Нагадаем, што ў кантэксце верша-гімна павінны быць: праслаўленне пчалы, пчалінага рою, пасекі, навакольнай прыроды, чалавека і Творцы-Бога. Пчала пераўтварае прыроду з кветкі ў плод, насенне — у хлеб. І зноў квітнее кветка-акіян жыцця рытмічна зменлівай, але сталай, жывой прыроды. Пчала і рой — сіла аднаго ў адзінстве многіх! Жывая прырода, чысты мёд, здаровае даўгалецце!

Спадзяёмся, што сярод творцаў нашага Саюза знойдуцца ахвотныя далучыцца да гэтай ганаровай справы.

Чакаем тэксты гімна да 1 верасня 2019 года. Журы на чале з Уладзіславам Завальнюком вызначыць аўтара гімна, які будзе запрошаны на міжнародны кангрэс-форум Апіславія. Гімн Апіславіі неабходна накіраваць на электронны адрас СПБ: oo-spb@tut.by з адзнакай: конкурс «Апіславія».

Алена СТЭЛЬМАХ, першы намеснік старшыні Саюза пісьменнікаў Беларусі