У Мінску адбыўся Трэці форум сацыяльнага бізнесу Беларусі. Удзельнікі абмяркоўвалі прававое рэгуляванне гэтага віду дзейнасці ў розных краінах, а таксама дзяліліся паспяховым вопытам.
Трэба больш сябе папулярызаваць
У нашай краіне распрацаваны праект закона аб сацыяльным прадпрымальніцтве, і цяпер члены кансультатыўнага савета пры Міністэрстве працы і сацыяльнай абароны Рэспублікі Беларусь і прадстаўнікі грамадскіх арганізацый і бізнесу актыўна абмяркоўваюць яго. «Усе прызналі, што такая дзейнасць у Беларусі ёсць, яна карысная для грамадства і можа дапамагчы дзяржаве ў вырашэнні сацыяльных праблем», – адзначыў начальнік упраўлення палітыкі занятасці Мінпрацы Алег Токун.
Ён нагадаў, што сацыяльнае прадпрымальніцтва ў нашай краіне пачыналася з вырашэння праблемы працаўладкавання інвалідаў. Але практыка паказала, што праз сацыяльны бізнес можна яшчэ палепшыць жыццё неабароненых катэгорый насельніцтва, рэалізаваць цікавыя праекты ў галіне адукацыі і экалогіі.
Па словах Алега Токуна, адным са спрэчных момантаў канцэпцыі закона аб сацыяльным прадпрымальніцтве з'яўляюцца падатковыя льготы і іншыя прэферэнцыі. Ён мяркуе, што варта больш сканцэнтравацца на нематэрыяльнай падтрымцы сацыяльнага бізнесу.
Адказваючы на пытанне, чым сёння можна дапамагчы прасоўванню сацыяльнага бізнесу, чыноўнік адказаў, што гэтаму сегменту прадпрымальніцтва трэба больш гаварыць пра сябе. Мала сюжэтаў па тэлебачанні, рэпартажаў у газетах. «Магчыма, людзі і не ведаюць, што ёсць такая з'ява», – выказаў меркаванне Алег Токун.
Каардынатар праграмы па развіцці сацыяльнага прадпрымальніцтва ОДБ Брусель у Беларусі Максім Падбярозкін падкрэсліў, што ў гэтым годзе форум сацыяльнага бізнесу ўпершыню падтрымала Міністэрства працы і сацыяльнай абароны. Пасля правядзення першага форуму ў 2017 годзе вызначыліся наступныя тэндэнцыі: з'явілася нямала праектаў, разлічаных на падтрымку пажылых людзей, актыўна ўключаюцца ў працу рэгіёны. Не засталіся ў баку і айцішнікі: у прыватнасці, яны распрацавалі мабільныя дадаткі, якія шмат у чым палягчаюць рашэнне сацыяльных праблем.
Не баяцца, верыць у сябе і ўпэўнена ісці да мэты
Сярод паспяховых прыкладаў сацыяльнага бізнесу ўдзельнікам форума расказалі аб працы першай крамы тавараў без упакоўкі zerro.by. У студзені яна адкрылася ў інтэрнэт-версіі, а ўжо ў маі з'явілася стацыянарная гандлёвая кропка. «Нам здавалася, што тут будуць купляць рэчы нашы знаёмыя з экалагічнай тусоўкі, але прыходзяць і зусім незнаёмыя людзі, – падзялілася сузаснавальніца крамы Святлана Гатальская. – Зараз у нас шмат заказаў з рэгіёнаў, ёсць жадаючыя працаваць па франшызе. Мы імкнемся да таго, каб у нашай краме было як мага больш тавараў айчынных вытворцаў. Заўтра паеду забіраць наш заказ – першыя металічныя беларускія трубачкі для кактэйлю». На гэтым прыкладзе добра відаць, як адно прадпрыемства сацыяльнага бізнесу, у дадзеным выпадку крама, уцягвае ў сваю арбіту некалькі іншых – пастаўшчыкоў тавараў.
Дырэктар «Цэнтра актыўнага даўгалецця» Алена Дзямідава распавяла пра ўнікальны вопыт супрацоўніцтва з ААТ «Галантэя». Цэнтр наведвалі некалькі працаўніц прадпрыемства пенсіённага ўзросту. Яны хацелі працягваць працаваць, але кожны адчуваў, што крыху адстаюць ад сучасных тэхналогій. Спецыялісты цэнтра даўгалецця сустрэліся з кіраўніцтвам фабрыкі, абмеркавалі варыянты супрацоўніцтва. У выніку пенсіянеркі прайшлі неабходнае навучанне, у тым ліку атрымалі камп’ютарныя навыкі, і не проста засталіся на сваіх працоўных месцах, але і адчуваюць там сябе дастаткова ўпэўнена. Усіх працуючых пенсіянераў, якія прыходзяць у цэнтр, спецыялісты просяць: «Раскажыце пра нас вашым наймальнікам».
Што датычыцца цікавага вопыту работы сацыяльнага бізнесу ў рэгіёнах, можна прывесці ў прыклад УП «Сельская Століншчына». З 2011 года прадпрыемства пачало скупляць у насельніцтва выкарыстаную поліэтыленавую плёнку, каб адправіць на далейшую перапрацоўку. Бізнес пачынаўся ў адной вёсцы і нават там некаторыя жыхары па звычцы выкідалі плёнку на стыхійны сметнік, ці яшчэ горш – спальвалі. Аднак тлумачальная праца, а таксама грашовая кампенсацыя за здадзеную плёнку зрабілі сваю справу: бізнес паспяхова развіваецца, да асноўнага віду дзейнасці дадаўся гандаль новай плёнкай, насеннем, угнаеннямі. Пры гэтым прадпрыемства вырашае важную экалагічную праблему – зніжаецца ўзровень забруджвання навакольнага асяроддзя поліэтыленавымі адходамі.
Сёння, калі ёсць жаданне займацца сацыяльным бізнесам, можна атрымаць метадычную і юрыдычную дапамогу ў ОДБ Брусель у Беларусі. Банк Развіцця Беларусі выдае крэдыт для такога віду дзейнасці на льготных умовах, таксама ёсць магчымасці для атрымання грантаў. Галоўнае, як аднадушна казалі ўдзельнікі форума, не баяцца, верыць у сябе і ўпэўнена ісці да мэты.
Арганізатарамі Трэцяга форума сацыяльнага бізнесу Беларусі выступілі Праграма падтрымкі Беларусі Федэральнага ўрада Германіі, ОДБ Брусэль, Фонд «Добра» у партнёрстве з сацыяльным прадпрыемствам «Каштоўны капітал» і пры падтрымцы Міністэрства працы і сацыяльнай абароны Беларусі.
Аксана ЯНОЎСКАЯ
Фота Facebook ОДБ Брусель
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
