Вы тут

Жанчына ўзяла на выхаванне сяброўку сваёй дачкі


У кнігах па выхаванні часта пішуць: дзецям не трэба казаць, як сябе паводзіць, ім трэба паказваць. Адзін з такіх прыкладаў — учынак вельмі сціплага і інтэлігентнага чалавека: жанчына ўзяла на выхаванне сяброўку сваёй дачкі, якая засталася без мамы.


Вольга Аляксандраўна Кудрэвіч працуе ў Мінскім дзяржаўным турыстычна-экалагічным цэнтры дзяцей і моладзі загадчыкам метадычнага кабінета. Дзяўчынку завуць Аліна. Дакументы на афармленне статусу прыёмнай дачкі Вольга Аляксандраўна не падавала — проста не бачыла ў гэтым сэнсу. За дзяўчынкай яна прыглядвала яшчэ тады, калі яе мама цяжка хварэла. Калі ў яе пачаліся моцныя болі (анкалогія), Аліне ў такой абстаноўцы рыхтавацца да выпускных экзаменаў было складана, таму Вольга Аляксандраўна забірала дзяўчынку да сябе дадому — яе дачка Марыя і Аліна сябравалі. Хворую жанчыну даглядаў тады бацька Аліны. У красавіку 2016 года Алінінай мамы не стала, бацька прыахвоціўся да спіртнога. Пахаванне арганізоўвалі Вольга Аляксандраўна, яе дачка Марыя і сама Аліна, бо на момант смерці не мелася ні капейкі ў доме.

— Гэта была жудасная гісторыя, спакойна не магу ўспамінаць, — кажа Вольга Кудрэвіч. — Яшчэ больш згуртаваліся мае дзяўчынкі і зараз увесь час праводзяць разам, нават вучацца ў адным каледжы (Мінскі гандлёвы каледж — філіял БДЭУ. — Аўт.). Праўда, дачка вучыцца на бюджэце, а Аліна на платным аддзяленні — усяго аднаго бала не хапіла. Вельмі складана было з аплатай, але свет не без добрых людзей: сёлета дапамаглі бацькі навучэнцаў групы, сабралі патрэбную суму. Яшчэ было вельмі шмат праблем з ЖКГ, вялізныя запазычанасці за святло, ваду ды і саму кватэру. І гэтыя пытанні мы вырашылі.

Дзяўчаты лічаць сябе сёстрамі, а прыёмная дачка называе Вольгу Аляксандраўну мамай. Усе нягоды і радасці дзеляць яны адзін з адным без утойвання. Зараз дзяўчыне 18 гадоў. Па словах «другой мамы», Аліна добрая, выхаваная, гаспадарлівая, вельмі актыўная і цікаўная.

Цяпер многія людзі, перш чым нешта зрабіць, пралічваюць, што яны атрымаюць ад сваіх дзеянняў, і калі гэта не выгадна, нават брацца не будуць. Вольга Аляксандраўна не лічыла сваіх магчымых выдаткаў, а зрабіла так, як падказала ёй сэрца. Ці не гэта жывы прыклад для кожнага з нас? Падумайце, каму вы можаце быць карыснымі і патрэбнымі, і станьце такім чалавекам!

Кацярына МАТУСЕВІЧ

Выбар рэдакцыі

Грамадства

Як будзе праходзіць перапіс насельніцтва

Як будзе праходзіць перапіс насельніцтва

Старшыня Нацыянальнага статыстычнага камітэта Іна МЯДЗВЕДЗЕВА адзначае, што іх ведамства разлічвае перапісаць максімальную колькасць грамадзян з дапамогай укаранёных інавацый.

Грамадства

Адзіныя дзяўчаты-паркуршчыцы ў Беларусі распавядаюць пра свой спорт

Адзіныя дзяўчаты-паркуршчыцы ў Беларусі распавядаюць пра свой спорт

Гэты кірунак спорту ўвайшоў у жыццё былых студэнтак дзяржаўнага ўніверсітэта фізічнай культуры выпадкова.