Гэта адбылося на этапе другога чытання на пасяджэнні шостай сесіі Палаты прадстаўнікоў Нацыянальнага сходу Беларусі. Нагадаем, што згаданы вышэй артыкул у тым ліку рэгламентуе пакаранне за незаконны абарот наркатычных сродкаў, псіхатропных рэчываў, іх прэкурсораў і аналагаў.
Што ж змянілася? Памяншаецца ніжняя мяжа пакарання з пяці да трох гадоў пазбаўлення волі па частцы 2 і з васьмі да шасці гадоў пазбаўлення волі па частцы 3.
Як адзначыў старшыня Палаты прадстаўнікоў Уладзімір Андрэйчанка, такое рашэнне не з'яўляецца паслабленнем для наркадылераў і збытчыкаў наркотыкаў. Ён растлумачыў, што такі падыход дазволіць судам прымяняць пакаранне ў выглядзе пазбаўлення волі па наркатычных артыкулах больш дыферэнцыравана — з улікам асобы вінаватага, узросту, характару і ступені грамадскай небяспекі дзеі, а таксама ўсіх абставін здзяйснення.
Член Пастаяннай камісіі па нацыянальнай бяспецы Аляксандр Багдановіч расказаў журналістам, што такая ініцыятыва разглядалася яшчэ дэпутатамі пятага склікання, збіралася мноства рабочых груп. Безумоўна, паўплывала і грамадская думка. Такім чынам, выніковае рашэнне парламентарый назваў вывераным.
Ён звярнуў увагу, што папраўкі могуць аблегчыць пакаранне тым, хто пераступіў рысу па няведанні. А вось верхняя мяжа засталася без змен — таму за мэтанакіраваны незаконны абарот наркотыкаў пакаранне застаецца цвёрдым (да васьмі гадоў па частцы 2 і да 15 гадоў па частцы 3).
Таксама на сесіі дэпутаты ў першым чытанні прынялі законапраект «Аб персанальных даных» — уступленне асноўных палажэнняў у сілу плануецца праз год пасля яго афіцыйнага апублікавання. Дакладваў па гэтым пытанні дырэктар Нацыянальнага цэнтра заканадаўства і прававых даследаванняў Вадзім Іпатаў.
Што тут трэба ведаць: распрацоўшчыкі вызначылі, што персанальныя даныя — гэта любая інфармацыя, якая адносіцца да ідэнтыфікаванай фізічнай асобы або фізічнай асобы, якая можа быць ідэнтыфікавана на падставе такой інфармацыі.
Плануецца падзяліць персанальныя даныя на дзве катэгорыі — агульнадаступныя (не падлягаюць абароне) і спецыяльныя (падлягаюць). У другую катэгорыю ўваходзяць, напрыклад, пол, палітычныя ці рэлігійныя перакананні, судзімасць.
Новаўвядзенне законапраекта — замацаванне магчымасці атрымаць згоду фізічных асоб на пэўныя дзеянні з іх персанальнымі данымі ў электроннай форме.
Яшчэ Вадзім Іпатаў прывёў у прыклад журналістам сітуацыю, якую законапраект зможа адрэгуляваць: напрыклад, запоўніў чалавек заяву на дысконтную карту ў краме, пакінуў асабістыя даныя, а яму потым тэлефануюць з іншых крам. Законапраект навядзе тут парадак: па-першае, грамадзяне змогуць даведацца пра перадачу сваіх персанальных даных трэцім асобам. Па-другое, у любы час грамадзянін будзе мець права патрабаваць ад аператараў спыніць любыя дзеянні з яго персанальнымі данымі, калі для гэтага няма законных падстаў.
Усяго на пасяджэнні шостай сесіі Палаты прадстаўнікоў было разгледжана больш за 15 пытанняў.
Уладзіслаў ЛУКАШЭВІЧ
Як мы бярозавік куплялі на гандлёвай пляцоўцы лясгаса і ў лясніцтве
Творчая вечарына народнага артыста Беларусі прайшла ў адной з мінскіх гімназій.