Беларускі рэкорд на Палтаўшчыне

Спецыялісты прадпрыемства “Беларуснафта”, якія працуюць на Семірэнкаўскім газакандэнсатным радовішчы, паставілі рэкорд па хуткасці праходжання свідравін ва Украіне

Усяго за тры з паловай месяцы ўведзена ў эксплуатацыю — тое адбылося ўпершыню ва Украіне — новая свідравіна па здабычы газу. Рэкорд належыць буравікам “Беларуснафты”, што будавалі свідравіну №72 на знакавым радовішчы. Беларускае прадпрыемства перамагло ў тэндэры, прапанаваўшы заказчыку найвыгадныя ўмовы. Паводле разлікаў, работы павінны былі доўжыцца 175 сутак — а ўдалося справіцца за 109: больш чым на два месяцы раней.

Спецыялісты “Беларуснафты” кажуць: пры праходцы шырока ўжываліся інавацыйныя тэхналогіі, лепшыя міжнародныя практыкі. А да пачатку свідравання пралічваліся магчымыя нюансы працэсу. Як сцвярджае намеснік гендырэктара прадпрыемства па вытворчасці Дзяніс Вараб’ёў, свідраванне за такі кароткі тэрмін адбылося дзякуючы сумесным намаганням усіх, хто быў заняты на аб’екце. Зладжана працавала свідравая брыгада, вытрыманы былі неабходныя рэжымы — гэта й дазволіла выйсці на рэкорд.

72-я Семірэнкаўская свідравіна — чацвёртая, пройдзеная беларусамі ва Украіне. Там “Беларуснафта” працуе праз даччынае прадпрыемства “Сэрвіс Ойл”, праводзіць бурэнне, рамонт свідравін і сейсмаразведку новых пакладаў карысных выкапняў.