Вы тут

Наша краіна ўвайшла ў лік 10 найлепшых для падарожжаў


Лета — традыцыйны пік адпускнога сезону. Дзе мараць адпачываць беларусы? Турысты з якіх краін і з якой мэтай часцей за ўсё наведваюць Беларусь? Пра гэта журналістам расказалі прадстаўнікі Дэпартамента па турызме Міністэрства спорту і турызму і беларускай туріндустрыі.


Мы хочам туды, дзе мора і горы

Як лічыць старшыня праўлення Рэспубліканскага саюза турыстычнай індустрыі Філіп Гулы, на адпачынку нашы суайчыннікі хочуць бачыць карцінку, якая адрозніваецца ад беларускіх краявідаў, — і гэта, як правіла, мора і горы. Але пры гэтым беларусы досыць кансерватыўныя і, як правіла, не вельмі імкнуцца да экзотыкі. Таксама большасць з нас хочуць, каб працягласць палёту была меншай за тры гадзіны. Усім гэтым пажаданням, па словах Філіпа Гулага, больш за ўсё адпавядаюць паўднёвая Украіна, Балгарыя, Харватыя, Чарнагорыя, Грэцыя.

Кансультант аддзела планавання і арганізацыі турыстычнай дзейнасці Дэпартамента па турызме Міністэрства спорту і турызму Марына Масташова адзначае, што ў топе краін, дзе адпачываюць беларускія турысты, традыцыйна знаходзіцца Егіпет (летась там адпачылі 212 тысяч беларусаў), на другім месцы Турцыя. У апошнія гады набіраюць папулярнасць Грузія і Албанія. Сёлета многія тураператары адзначылі рост попыту на адпачынак у Грэцыі і Тунісе.

Сярод бюджэтных напрамкаў актыўным попытам карыстаюцца аўтобусныя туры ў Адэскую, Херсонскую і Мікалаеўскую вобласці Украіны, запатрабаваныя таксама курорты Краснадарскага краю, Сочы і Крыма.

Акрамя таго, за апошнія тры гады, па словах Філіпа Гулага, у нас намецілася добрая тэндэнцыя вылетаў з рэгіёнаў. З развіццём рэгіянальных аэрапортаў жыхарам Віцебска, Гродна, Гомеля і Магілёва няма сэнсу на некаторыя масавыя напрамкі купляць білеты з Мінска: цяпер яны могуць вылецець і са сваіх гарадоў.

Да нас часцей за ўсё прыязджаюць у санаторыі і па справах

Спецыялісты адзначаюць рост пазнавальнасці Беларусі за мяжой. Так, апошнім часам наша краіна ўвайшла ў міжнародныя рэйтынгі месцаў для адпачынку і падарожжаў. У прыватнасці, мы перамаглі ў намінацыі «Агратурызм» рэйтынгу Nаtіоnаl Gеоgrарhіс Trаvеlеr Аwаrds 2018 і ўвайшлі ў дзясятку найлепшых краін для падарожжаў у 2019 годзе па версіі Lоnеlу Рlаnеt. А Мінск узначаліў топ-10 гарадоў, рэкамендаваных брытанскай газетай Thе Іndереndеnt для наведвання сёлета.

Гэтаму спрыяла, у прыватнасці, устанаўленне бязвізавага рэжыму, а таксама падаўжэнне тэрміну бязвізавага знаходжання ў Беларусі для замежных турыстаў у мінулым годзе з 5 да 30 дзён. Станоўчыя вынікі, па словах Марыны Масташовай, не прымусілі сябе чакаць. З пачатку дзеяння бязвізавага рэжыму праз Нацыянальны аэрапорт Мінск нашу краіну наведалі 243 955 чалавек з 71 краіны свету.

Дзякуючы лібералізацыі візавага рэжыму павялічылася і колькасць замежных турыстаў, якія прыбываюць праз спецыяльныя турыстычныя зоны. У прыватнасці, Гродна і беларускую частку Аўгустоўскага канала з моманту ўвядзення бязвізавага рэжыму (кастрычнік 2016 года) наведалі 193 746 замежнікаў. Белавежскую пушчу і турысцка-рэкрэацыйную зону «Брэст» у бязвізавым парадку з 1 студзеня 2018 года і па 7 чэрвеня гэтага года наведалі больш за 28 820 замежных турыстаў.

Усяго нашу краіну, па звестках Дзяржпагранкамітэта, летась наведалі 4 791 951 чалавек.

На думку экспертаў, летась у топ-10 краін, з якіх да нас часцей за ўсё прыбывалі турысты, увайшлі Украіна, Расія, Літва, Польшча, Латвія, Малдова, Германія, Казахстан, Турцыя і Ізраіль. У цэлым найчасцей у нашу краіну прыязджаюць, каб адпачыць і падлячыцца ў санаторыях. На другое месца спецыялісты турыстычнай галіны ставяць дзелавы турызм. Трэцяе месца займае экскурсійны турызм, а ў апошнія гады папулярным кірункам робяцца і актыўныя віды турызму.

Дарэчы

Зараз ідзе актыўная работа над удасканаленнем заканадаўства ў сферы турызму. У прыватнасці, ужо ў ліпені плануецца вынесці на грамадскае абмеркаванне праект змяненняў у закон «Аб турызме». Абноўленая рэдакцыя закона, як мяркуецца, будзе прынята да канца гэтага года. Спецыялісты адзначаюць, што вялікае значэнне ў новай рэдакцыі закона будзе нададзена абароне правоў турыстаў, а таксама абароне добрасумленных тураператараў, якія працуюць на нашым рынку.

Святлана Бусько

Загаловак у газеце: Hэйтынг расце

Выбар рэдакцыі

Грамадства

Што паглядзець у Хоцімску?

Што паглядзець у Хоцімску?

У Хоцімску нават ёсць кола агляду.

Грамадства

«За больш чым сем год былі ўсяго адны суткі без баявога выезду»

«За больш чым сем год былі ўсяго адны суткі без баявога выезду»

Гісторыя кар'еры падпалкоўніка ў адстаўцы Генадзя Цімахоўцава.

Палітыка

Беларусь і ЕС падпішуць візавае пагадненне не пазней за 2 лютага 2020 года

Беларусь і ЕС падпішуць візавае пагадненне не пазней за 2 лютага 2020 года

Верагодна, гэта адбудзецца ўжо ў гэтым лістападзе. 

Грамадства

Як праходзіў ваенна-гістарычны фестываль «Мір-1812»

Як праходзіў ваенна-гістарычны фестываль «Мір-1812»

Трэці раз ваенна-гістарычны фестываль «Мір-1812» на два дні перанёс пасёлак больш чым на два стагоддзі назад.