Вы тут

У Брэсце праходзяць мерапрыемствы, прысвечаныя Дню ўсенароднай памяці ахвяр Вялікай Айчыннай вайны


Дата 22 чэрвеня для Брэста асаблівая. У гэты дзень успамінаюць абаронцаў крэпасці і ўсіх людзей, якія летнім выхадным днём прачнуліся не пад спевы птушак, а пад пякельны свіст і завыванне снарадаў. І ўжо больш за паўвека перад світаннем у крэпасць прыходзяць новыя пакаленні брастаўчан, шматлікія госці, каб прыгадаць тыя даўнія падзеі, аддаць даніну пашаны героям.


А напярэдадні гараджане збіраюцца на пешаходнай вуліцы Савецкай, дзе аднаўляецца апошні мірны вечар. У горад на гэтыя дні прыязджаюць дзясяткі рэканструктараў з розных краін. Разам з брэсцкімі ўдзельнікамі ваенна-гістарычных клубаў яны праводзяць дэфіле па Савецкай вуліцы ва ўборах даваеннага ўзору, праходзяць маршам па вуліцах Гогаля і Зубачова.

Атмасферу саракавых стварае гарадскі духавы аркестр. Сваю рэтра-праграму музыканты назвалі «Брэст даваенны». Канцэрт працягне ансамбль «Рамонкі» гарадскога цэнтра культуры. Тым часам каля выставачнай залы абласны краязнаўчы музей разгорне экспазіцыю «Мы для Перамогі нічога не пашкадуем», а музей гісторыі горада падрыхтаваў фотадакументальную выстаўку «Брэст гістарычны».

Гэтым разам мерапрыемствы «даваеннага дня» не абмежаваныя вуліцамі Савецкай, Гогаля, Зубачова. Былы Армейскі клуб на тэрыторыі крэпасці стане месцам правядзення спектакля «Пайсці і не вярнуцца». У парахавым склепе Кобрынскага ўмацавання сапраўды быў салдацкі клуб аж да лета 1941 года. Тут праходзілі канцэрты і пастаноўкі, куды збіраліся байцы. Клуб, несумненна, наведвалі і тыя, хто быў забіты, узяты ў палон, мужна абараняўся ў першы дзень нашэсця ворага.

Спектакль у тэатры аднавілі нядаўна пасля чатырохгадовага перапынку. Яго прэм'ера адбылася ў 2012 годзе. Зараз паказ прымеркавалі да 95-годдзя Васіля Быкава. У дзень нараджэння пісьменніка, 19 чэрвеня, спектакль адбыўся ў вялікай зале тэатра, а 21 чэрвеня паказ запланаваны ў армейскім клубе. Паводле выказвання рэжысёра-пастаноўшчыка Валянціны Янавец, пляцоўка пасуе да атмасферы спектакля. Аскетызм памяшкання, прахалода парахавога склепа дапамогуць адчуць складанасць і драматызм сітуацыі. Падзеі адбываюцца зімой 1942 года падчас цяжкіх баёў за Сталінград. Таму варта паглядзець «Пайсці і не вярнуцца» менавіта ў армейскім клубе. Трэба сказаць, што названая пастаноўка — не першая культурная акцыя ў крэпасці напярэдадні 22 чэрвеня. Напрыклад, у 2008 годзе ў дзве гадзіны ночы пачалася прэм'ера фільма «Брэсцкая крэпасць» Ігара Угольнікава. Па сіле эмацыйнага ўздзеяння тую прэм'еру цяжка параўнаць з нечым іншым...

А зараз спектакль пачнецца а шостай гадзіне вечара. Праз гадзіну, роўна ў сем, каля помніка вартавым мяжы пройдзе патрыятычная акцыя «Баявы разлік» у памяць аб салдатах і афіцэрах памежных застаў, якія загінулі 22 чэрвеня. Яны, як і абаронцы крэпасці, прымалі першыя, самыя цяжкія баі. У іх быў загад — не саступаць ні пядзі зямлі. І яны не саступалі, пакуль жылі. Іх подзвіг не забыты. Таму ўжо трэці год у крэпасць прыязджаюць курсанты Інстытута пагранічнай службы, каб каля Цярэспальскіх варот паказаць баявы разлік — памежны рытуал, які праводзіцца пры заступленні вайскоўцаў на службу па ахове Дзяржаўнай мяжы на кожнай заставе роўна ў 19 гадзін. Толькі на сімвалічным баявым разліку курсанты трымаюць партрэты вартавых мяжы, якія загінулі ў першыя дні вайны. Яны нібы зноў заступаюць на службу... навечна.

Святлана ЯСКЕВІЧ

Загаловак у газеце: За гадзіну да вайны

Выбар рэдакцыі

Грамадства

Хворым на фенілкетанурыю могуць палепшыць забяспячэнне прадуктамі харчавання

Хворым на фенілкетанурыю могуць палепшыць забяспячэнне прадуктамі харчавання

Міністэрства аховы здароўя адказала на публікацыю «Звязды».

Палітыка

На пасяджэнні ЦВК зарэгістраваны 56 членаў Савета Рэспублікі сёмага склікання

На пасяджэнні ЦВК зарэгістраваны 56 членаў Савета Рэспублікі сёмага склікання

Выбары прайшлі ў прыўзнятай атмасферы, дастойна і з яркімі выступленнямі.

Калейдаскоп

«Звязда» пабывала на здымках «Талента краіны»

«Звязда» пабывала на здымках «Талента краіны»

Ужо ў гэту суботу на АНТ вялікая прэм'ера.

Культура

У Беларусі будзе стварацца археалагічная карта

У Беларусі будзе стварацца археалагічная карта

Калі Скарына прыехаў у Кракаў, і як выглядаў малы Рагвалодавіч.