Вы тут

​Большасць з тых, хто патануў сёлета, былі пад градусам


У крыві маці, двухгадовы сын якой патануў на гэтым тыдні на возеры Белым у Бешанковіцкім раёне, было 3,6 праміле алкаголю. Зараз 30-гадовая жанчына, якая, дарэчы, таксама танула, але яе ўдалося выратаваць, знаходзіцца ў ізалятары, праводзяцца мерапрыемствы па ўстанаўленні яе віны. Пра трагедыі, да якіх прыводзіць сумяшчэнне летняга адпачынку на прыродзе з алкаголем, расказалі спецыялісты.


З пачатку года ў Беларусі патанула 159 чалавек (сярод іх 17 непаўналетніх). У тым ліку падчас купання загінула 46 чалавек (трое дзяцей). 90 % людзей гіне ў неарганізаваных і забароненых для купання месцах. Каля 60 % загінулых знаходзіліся ў стане алкагольнага ап'янення. Выратаваць пры гэтым удалося больш за 130 чалавек.

— У параўнанні з мінулым годам у нас назіраецца рост колькасці загінулых — на 28 чалавек, — адзначае старшыня Беларускага рэспубліканскага таварыства выратавання на водах (АСВОД) Анвар Ігамбердыеў. — Прычым сыграў сваю ролю анамальна спякотны перыяд — за тыдзень у краіне патанула 46 чалавек. Выратаваць удалося 19.

Найчасцей прычынай гібелі дзяцей становіцца нядбайнасць дарослых. На возеры Каташы пад Кобрынам патануў шасцігадовы хлопчык. Купацца ён пайшоў у суправаджэнні айчыма і двухгадовай сястры. Мужчына ў пэўны момант страціў яго з поля зроку, хлопчык зайшоў у чарот і патануў «на роўным месцы». Гэтак жа загінуў пяцігадовы малы на сажалцы ў Мікашэвіцкім раёне. У Магілёўскай вобласці двое братоў 6 і 11 гадоў каталіся на ровары. Малодшы падышоў да вады і паслізнуўся на бетонным пакрыцці, старэйшы кінуўся на дапамогу. У выніку абодвы хлопчыкі патанулі ў 3,5-метровай яме.

Выпадкаў, калі дзеці гінуць з-за недагляду бацькоў і дарослых, вельмі шмат. Таму спецыялісты раяць выбіраць толькі арганізаваныя месцы для купання, не выпускаць з поля зроку дзяцей, а малых, якія не ўмеюць плаваць, трымаць у вадзе за руку. А таксама памятаць, да якіх трагедый можа прывесці ўжыванне алкаголю падчас адпачынку на вадаёмах.

Таксама спецыялісты нагадваюць пра неабходнасць выкарыстання выратавальных камізэлек падчас знаходжання ў лодках, яхтах і іншых плавальных сродках. І прыводзяць прыклад, калі на возеры Нарач перакулілася яхта з групай кітайскіх турыстаў. Усіх іх удалося выратаваць, бо яны былі ў камізэльках. А вось пажылой пары, якая адзначала дзень нараджэння ў лодцы на тым жа возеры, выжыць не ўдалося — выратавальныя камізэлькі знаходзіліся ў лодцы, а надзець іх людзі не пажадалі. Навыкаў мужчыны не хапіла, каб выратаваць сваю спадарожніцу, і на глыбіні шасці метраў абодва загінулі.

Раўнадушша дарослых таксама часта становіцца прычынай гібелі.

— У Бярэзінскім раёне школьнік упаў з тарзанкі. Побач сядзеў рыбак з вудачкай і нават не зварухнуўся з месца. Сказаў, што сам не ўмее плаваць. А дзіця патанула каля берага, дастаткова было зрабіць некалькі крокаў ці працягнуць вуду. Ну як так можна? — здзіўляецца старшыня АСВОДа.

Нярэдка бравада абарочваецца трагедыяй і для дзяцей, і для дарослых.

— Скачуць у ваду, ныраюць, у выніку ламаюць пазванкі, атрымліваюць іншыя віды траўмаў, — кажа Анвар Ігамбердыеў. — Дарослыя садзяць дзяцей, якія не ўмеюць плаваць, на спіну і пераплываюць раку. Пачынаюць тануць і аказваюцца перад выбарам: каго выратоўваць — сябе ці дзіця?

Летам узрастае колькасць траўмаў шыйнага аддзела пазваночніка.

— Зараз трэць пацыентаў у рэанімацыі РНПЦ траўматалогіі і артапедыі — са спінальнымі траўмамі, — працягвае галоўны спецыяліст упраўлення арганізацыі медыцынскай дапамогі Міністэрства аховы здароўя Сяргей Аўдзей.

Справа ў тым, што пацыент амаль не аднаўляецца пасля пералому шыйнага аддзела пазваночніка, асабліва калі адбылося пашкоджанне спіннога мозгу. І са здаровага чалавека ператвараецца ў інваліда на калясцы.

— Чалавек у стане алкагольнага ап'янення неадэкватна ацэньвае сітуацыю, і часта такія траўмы атрымліваюць п'яныя нырцы, — расказвае вядучы навуковы супрацоўнік неўралагічнага аддзела РНПЦ неўралогіі і нейрахірургіі, кандыдат медыцынскіх навук Глеб Забродзец. — Такі чалавек не кантралюе сябе, што прыводзіць і да цеплавых і сонечных удараў. Наступствы не такія страшныя, аднак і гэта вядзе да шпіталізацыі.

Трэба памятаць, што ў анамальную спякоту, а такой для Беларусі з'яўляецца надвор'е з тэмпературай 30 градусаў і вышэй, наш арганізм знаходзіцца пад асаблівай нагрузкай. Усе органы працуюць з напружаннем, асабліва сардэчна-сасудзістая сістэма.

— Ужыванне вадкасці — найлепшая прафілактыка. Здаецца, што халодны алкаголь паляпшае наш стан. Аднак гэта вялікая памылка. Алкаголь узмацняе смагу і пагаршае стан арганізма, — папярэджвае намеснік галоўнага ўрача Гарадскога клінічнага наркалагічнага дыспансера Жанна Істоміна.

Асабліва эксперт не раіць ужываць алкаголь у дзённыя гадзіны. Па магчымасці знаходзіцца ў памяшканні, дзе ёсць кандыцыянеры ці свежыя патокі паветра. А наталяць смагу ўсё ж лепш за ўсё вадой.

Алена КРАВЕЦ

Загаловак у газеце: Вада забірае п'яных

Выбар рэдакцыі

Грамадства

Галiна Левіна: Помнiк — не канструктар i не чарцёж, яго трэба перажыць, выпакутаваць

Галiна Левіна: Помнiк — не канструктар i не чарцёж, яго трэба перажыць, выпакутаваць

У архiтэктара Галiны Левiнай — Хатынь, творчая спадчына яе бацькi.

Грамадства

Прэмiя прыгажосцi. Дзеля чаго людзi кладуцца пад нож пластычнага хiрурга?

Прэмiя прыгажосцi. Дзеля чаго людзi кладуцца пад нож пластычнага хiрурга?

Як сведчаць шматлiкiя даследаваннi, прывабным людзям прасцей прабiцца ў жыццi i яны дасягаюць у кар'еры большага поспеху. 

У свеце

Як Еўропа аднаўляецца ад кавiднага ўдару?

Як Еўропа аднаўляецца ад кавiднага ўдару?

Сёлета еўрапейская эканомiка будзе перажываць глыбокую рэцэсiю з-за ўспышкi каранавiруса, нягледзячы на хуткiя i ўсёабдымныя антыкрызiсныя меры як на саюзным, так i на нацыянальным узроўнi.

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.