Вы тут

Беларуска на конкурсе «Славянскае слова» атрымала званне лаўрэата за ІІІ месца


Беларуская шаснаццацігадовая дзяўчына Сафія ВОРСА на Міжнародным літаратурным конкурсе «Славянскае слова» атрымала званне лаўрэата за ІІІ месца і прэмію імя Васіля Шукшына за кнігу «Горад аслеплых скрыжаляў».


— Гэта вялікі гонар для мяне, — прызнаецца дзяўчына. — Я нават не спадзявалася стаць адной з пераможцаў, але мне хацелася паўдзельнічаць. Першую сваю работу адправіла на конкурс маладых аўтараў, які праводзіў Міжнародны саюз пісьменнікаў імя святых свяціцеляў Кірылы і Мяфодзія. Там маё эсэ атрымала першае месца. У выніку рашылася адправіць сваю кнігу на больш маштабны конкурс.

У кнізе, за якую пісьменніца атрымала прэмію, расказваецца гісторыя невідушчай дзяўчынкі і тое, з якімі праблемамі давялося сутыкнуцца ёй, уладкоўваючы жыццё.

«Хацелася расказаць чытачам, як важна не перашкаджаць развівацца маладым людзям з абмежаванымі магчымасцямі, — расказвае Сафія. — Часта «дапамога» людзей здаровых робіць жыццё невідушчых невыносным і бесперспектыўным. Напрыклад, мая галоўная гераіня з абсалютным слыхам не магла атрымаць музычную адукацыю толькі таму, што ва ўніверсітэтах не было вучэбнай літаратуры са шрыфтам Брайля. Хаця дзяўчынка магла дастаць патрэбную літаратуру ў сваіх знаёмых, да таго ж яна выдатна ўспрымала ўсё на слых і магла весці канспекты. Але зноў і зноў атрымлівала адмовы ад навучальных устаноў». Праз кнігу можна адчуць, як гэта — жыць, калі грамадства выдзеліла для цябе толькі адзін шлях для рэалізацыі.

«Горад аслеплых скрыжаляў» — другая кніга Сафіі, а першая называлася «Дзесяць простых гісторый». Гэта жыццёвыя аповеды, праз якія мімаволі пачынаеш бачыць чараўніцтва ў звычайных рэчах. Цікава, што першая кніга вельмі падабалася аднаму японскаму журналісту і ён паспрыяў таму, каб яна ўбачыла свет і на японскай мове. Дарэчы, дзве кнігі Сафіі выдадзены на беларускай і рускай мовах і напісаны па гісторыях рэальных людзей.

Талент дзяўчыны прыцягнуў увагу пісьменнікаў з іншых краін свету. Так, днямі да яе завітала аўтарка з ЗША Лара Продан, каб абмеркаваць яе ўдзел у міжнародным літаратурным праекце.

— Прачытаўшы кнігу Сафіі, я зразумела, што яе ўзрост не можа схаваць талент, — сказала Лара Продан. — Яна піша вельмі глыбока і праўдзіва, і ў яе выдатнае пачуццё стылю. Мы пазнаёміліся з ёй на конкурсе і разам з Вікторыяй Левінай, аўтаркай з Ізраіля, прапанавалі паўдзельнічаць у напісанні незвычайнай кнігі. У ёй будуць змешчаны тры самастойныя гісторыі пра любоў ад пісьменнікаў рознага ўзросту, з розных краін свету і з розным досведам. Кніга з'явіцца на паліцах кніжных крам ужо ў лістападзе.

Сафія ўжо пачала працаваць над сваёй часткай кнігі. Яна расказала, што яе гісторыя будзе пра тое, як важна прымаць і любіць сябе. Піша свае творы Сафія якраз улетку, на канікулах.

Дзяўчына вучыцца ў беларускамоўнай гімназіі Мінска і вядзе звычайнае для падлетка жыццё, у якім ёсць і сінія валасы, і найлепшыя сябры, і пошук сябе. Хочацца верыць, што мы робімся сведкамі станаўлення таленавітага пісьменніка.

Міжнародны літаратурны конкурс «Славянскае слова» — адзін з найбуйнейшых прафесійных конкурсаў для пісьменнікаў, якія пішуць на кірыліцы.

Гэты маштабны літаратурны форум праводзіцца пачынаючы з 2017 года. Арганізатарам з'яўляецца Міжнародны саюз пісьменнікаў імя святых свяціцеляў Кірылы і Мяфодзія. У склад журы конкурсу, якое ўзначальвае загадчык кафедры Шуменскага ўніверсітэта прафесар Івайла Пятроў, уваходзяць вядомыя пісьменнікі, літаратурныя крытыкі, журналісты і выдаўцы з розных краін.

Наталля ТАЛІВІНСКАЯ

Фота Таццяны ТКАЧОВАЙ

Загаловак у газеце: Пісьменніца пакалення Z

Выбар рэдакцыі

Грамадства

Што паглядзець у Хоцімску?

Што паглядзець у Хоцімску?

У Хоцімску нават ёсць кола агляду.

Грамадства

«За больш чым сем год былі ўсяго адны суткі без баявога выезду»

«За больш чым сем год былі ўсяго адны суткі без баявога выезду»

Гісторыя кар'еры падпалкоўніка ў адстаўцы Генадзя Цімахоўцава.

Палітыка

Беларусь і ЕС падпішуць візавае пагадненне не пазней за 2 лютага 2020 года

Беларусь і ЕС падпішуць візавае пагадненне не пазней за 2 лютага 2020 года

Верагодна, гэта адбудзецца ўжо ў гэтым лістападзе. 

Грамадства

Як праходзіў ваенна-гістарычны фестываль «Мір-1812»

Як праходзіў ваенна-гістарычны фестываль «Мір-1812»

Трэці раз ваенна-гістарычны фестываль «Мір-1812» на два дні перанёс пасёлак больш чым на два стагоддзі назад.