Вы тут

У Мазыры асвоены выраб машын і агрэгатаў для аграрыяў*


Расказвае дырэктар ААТ «Мазыртэхсэрвіс» Аляксей Баранаў.

— Наша арганізацыя — гэта былая МТС, машынна-трактарная станцыя, потым — «Сельгастэхніка». Перажылі некалькі рэарганізацый, а задачы засталіся ранейшыя і вельмі сур'ёзныя — дапамагаць сельскагаспадарчым прадпрыемствам. Так што мы спрадвеку, традыцыйна займаемся рамонтам сельскагаспадарчай тэхнікі і яе абслугоўваннем. А сёння з'явіўся і новы кірунак — выраб машын і агрэгатаў для аграрыяў. А яшчэ займаемся гандлем — маем свой магазін прамысловых і харчовых тавараў. Пасабляем сельскагаспадарчым і перапрацоўчым прадпрыемствам рэалізоўваць іх прадукцыю, адначасова гаспадаркам лягчэй разлічвацца і з намі. І праз уласны магазін можам, калі гэта патрэбна, авансаваць сваіх работнікаў — адпускаем харчовыя тавары па спісках, а грошы потым утрымліваюцца з зарплаты.


Намеснік дырэктара па вытворчасці Уладзіслаў Лазібееў дэманструе культыватар-апырсквальнік КОУП-8.

А яшчэ арганізавалі склад-магазін, які гандлюе запаснымі часткамі, некаторымі відамі абсталявання і спадарожнымі таварамі і матэрыяламі. Маем сваю сталовую. Так склалася, што мы ўзялі на сябе досыць адказны абавязак па харчаванні людзей з сельскагаспадарчых арганізацый у палявых умовах. Нашы кухары ўмеюць прыгатаваць смачныя абеды, якія ўсім падабаюцца, гаспадаркі забіраюць іх у тэрмасах, і механізатары і палявыя рабочыя маюць магчымасць падсілкавацца і не патраціць на гэта шмат часу. У тым ліку ў выхадныя дні.

Калі адчулі сябе крыху больш упэўнена ў новай справе, у вёсцы Козенкі зрабілі прыбудову да сталовай і адкрылі кафэ. Каб было дзе бавіць час моладзі, і карпаратыў правесці ці дзень нараджэння адзначыць, і нават вяселле сыграць. Аказваем людзям гэтыя паслугі, меню — пад заказ.

Слесар па рамонце і абслугоўванні сельскагаспадарчай тэхнікі Юрый Піскун усталёўвае корпус тэрмастата на матор КамАЗа.

— Сёння тэхніка на вёсцы надзвычай складаная. Гэта ж якія ў вас павінны быць спецыялісты, каб рамантаваць сённяшнія трактары і камбайны, увесь шматлікі парк гаспадарак... У вас ёсць такія спецыялісты і рамонтная база для такой тэхнікі?

— У калгасах сёння няшмат спецыяльнага абсталявання для рамонту тэхнікі: зварачнага, шліфавальнага, высокаэфектыўнага, каб якасна гэта зрабіць. Так што мы ім патрэбны.

Цяпер усё часцей кіраўнікі сельскагаспадарчых прадпрыемстваў прыходзяць да высновы, што на месцах, у раёнах, такія службы, як наша, трэба аднаўляць. Каб не ганяць трэйлер са зламаным, скажам, трактарам з Лельчыц да нас і назад пасля рамонту. Але аднаўляць — гэта толькі сказаць лёгка. За час, які прайшоў пасля ліквідацыі аддзяленняў «Сельгастэхнікі», страчана многае — рамонтная база з неблагім тэхнічным аснашчэннем, перадавыя тэхналогіі, кваліфікаваныя кадры.

Так што для пачатку давайце берагчы тое, што ёсць, — такія прадпрыемствы і такія калектывы, як наш. Мы з гэтага зыходзім і стараемся не проста берагчы, а развіваць свае магутнасці, мацаваць калектыў.

Я ўжо казаў, што прызначэнне нашага прадпрыемства — рамонт тэхнікі, яе выраб і абслугоўванне, у тым ліку ў палявых умовах. А рамантуем абсалютна ўсю тэхніку, якая працуе ў сельскай гаспадарцы, нават самую навейшую, складаную, нярэдка замежную. Вочы баяцца, а рукі робяць. Бо хто, калі не мы? Тэхніка не павінна прастойваць. Такая задача ставіцца перад намі, і я стаўлю яе перад калектывам. Што не ўмеем — трэба вучыцца. Пераймаць перадавы вопыт. Чаго не хапае з абсталявання — трэба набываць. Але задача павінна быць выканана. Плюс выраб тэхнікі — гэта яшчэ больш складана.

У нас дастаткова абсталявання, якое дазваляе выконваць даволі складаныя работы. А пры рамонце тэхнікі патрэбна мець высокаэфектыўнае абсталяванне. Бо не ўсе гаспадаркі могуць набыць для рамонту новы вузел, дорага. Просяць адрамантаваць стары. Не на кожнае прадпрыемства здасі ў рамонт, на некаторых вузел пасля рамонту будзе каштаваць як новы.

Усё гэта гаворыць, што нам патрэбна і далей спецыялізавацца ў такім кірунку. Каб і рамантаваць, і аднаўляць вузлы і агрэгаты, механізмы якасна і па-магчымасці не вельмі дорага.

Слесар па зборцы металаканструкцый Руслан Ражок займаецца плазменнай рэзкай металу.

— А якое абсталяванне ў вас для гэтага ёсць сёння, Аляксей Самсонавіч?

— Плазменная рэзка, без яе нікуды. З дапамогай спецыяльнай праграмы яна выража з ліставога металу любую дэталь. Ёсць кардынатна-прабіўны станок, досыць складаны і эфектыўны, таксама працуе па праграме. Зразумела, што з камп'ютарным суправаджэннем. Таксама на ім можна выбіваць са сталі дэталь любой канфігурацыі таўшчынёй да 4 міліметраў. Маем і вальцовачнае абсталяванне, а таксама аўтаматычныя пілы, якія ў аўтаматычным рэжыме даюць вельмі высокую дакладнасць, — парэжуць метал менавіта так, як табе патрэбна. А далей ён пойдзе на мехапрацоўку на сучасным такарным, фрэзерным абсталяванні. Дапамагаюць працаваць лістагібы, такарная група станкоў, сярод якіх і аўтамат; зубафрэзерныя станкі, кругла-, плоскашліфавальныя, на якіх выконваецца ў тым ліку шліфоўка каленвалаў. Трубагібы дазваляюць вырабляць абсталяванне для фермаў. Можна пералічваць далей.

У цэлым забяспечаны і кваліфікаванымі кадрамі, хоць калі знойдуцца ахвотныя з вопытам адпаведнай работы, хутчэй за ўсё, што прымем у сваю сям'ю. Бо разумеем: належную якасць забяспечваюць перш за ўсё спецыялісты.

Слесар Іван Кошман ставіць шкіў на жатку камбайна.

— Вельмі нас зацікавіла, што вы самі выпускаеце сельскагаспадарчую тэхніку. Раскажыце, якую.

— Даволі даўно ўзялі на сябе яшчэ і ганаровыя, але ж і цяжкія абавязкі вытворцы, а не толькі кваліфікаванага рамонтніка. З 2006 года выпускаем кукурузную сеялку, а калі правільна, то сеялку дакладнага высеву. Высяваць прапашныя культуры. Чаму ўзнікла такая патрэба? На базе «Крынічная» быў пабудаваны кукурузна-калібровачны завод, і паўстала пытанне, чым сеяць. Мы прапанавалі сваю сеялку, і зараз яна шырока выкарыстоўваецца ў краіне. Пастаўляем для іх запасныя часткі, у выпадку неабходнасці ажыццяўляем рамонт.

Выпускаем культыватары-падкормшчыкі для міжраднай апрацоўкі, гэта абавязковая аперацыя пры вырошчванні той жа «каралевы палёў», мы і тут прыйшлі на дапамогу аграрыям.

У свой час было даручэнне губернатара, яшчэ Уладзіміра Андрэевіча Дворніка, вярнуцца да простай, але надзейнай мадэлі збожжавай сеялкі, мелася на ўвазе СЗУ-3,6. Бо складаныя замежныя і нават айчынныя, але не менш дарагія, пнеўматычныя пасяўныя агрэгаты не заўсёды апраўдвалі надзеі вяскоўцаў. Тым больш што яны дарагія і ў рамонце. У выніку мы робім сваю, мазырскую, механічную прычапную ЗС 4,2. Далей пайшла і ЗС-6, з захопам у шэсць метраў. Яна паказала не толькі нармальную для гаспадарак цану, але і патрэбную якасць высеву. Можна ставіць спецыяльную прыстаўку і высяваць травы.

Сеялка зерневая ЗС-6.

Робім яшчэ «Норыі» збожжавыя для работы на збожжасушыльных комплексах, транспарцёры. Наогул многае з таго, што гаспадаркам патрэбна. Яны бяруць усё ахвотна, тым больш што выконвалася праграма па аднаўленні збожжасушыльных комплексаў цэлага шэрагу гаспадарак, і мы вялі мантаж іх і нават будаўніцтва. І тады нашы «Норыі» былі вельмі запатрабаваныя. Зараз чамусьці ўпор робіцца на сушку збожжа на раённых камбінатах хлебапрадуктаў (КХП), гаспадаркі возяць туды, у выніку КХП не паспяваюць перапрацоўваць, і гаспадаркі губляюць грошы, бо за ўсё патрэбна плаціць.

Наладзілі выпуск ангараў, іх шырыня да 21 метра, а даўжыню можна гнаць любую. З рулоннай сталі катаюцца і ёмістасці любога аб'ёму.

Вырабляем паілкі для фермаў з паплаўковай камерай і падагрэвам, стойлавае і іншае абсталяванне для фермаў і запасныя часткі для яго, у тым ліку для ўтрымання свіней. мы камплектавалі некалькі свінакомплексаў.

Вышэйшы пілатаж любога рамонту — рамонт рухавікоў, у тым ліку дызелі ўсіх марак, айчынныя і замежныя. Так што — звяртайцеся!

Дошка гонару «Звязды»

  1. Ражок Руслан Васілевіч — слесар па зборцы металаканструкцый.
  2. Навуменка Аляксандр Мікалаевіч — слесар механазборачных работ.
  3. Ястрэмскі Павел Пятровіч — слесар-рамонтнік.
  4. Курдзюшкін Ігар Міхайлавіч — слесар механазборачных работ.
  5. Капчук Васіль Васілевіч — слесар па рамонце сельскагаспадарчых машын і абсталявання.
  6. Кошман Іван Ігнатавіч — слесар па рамонце сельскагаспадарчых машын і абсталявання.
  7. Піскун Юрый Аляксеевіч — слесар па рамонце сельскагаспадарчых машын і абсталявання.

Уладзімір ХІЛЬКЕВІЧ

Алена ДАЎЖАНОК

Фота Андрэя САЗОНАВА

*УНП 490803579

*На правах рэкламы

Загаловак у газеце: Кулібіны ўласнага «разліву»

Выбар рэдакцыі

Грамадства

Што паглядзець у Хоцімску?

Што паглядзець у Хоцімску?

У Хоцімску нават ёсць кола агляду.

Грамадства

«За больш чым сем год былі ўсяго адны суткі без баявога выезду»

«За больш чым сем год былі ўсяго адны суткі без баявога выезду»

Гісторыя кар'еры падпалкоўніка ў адстаўцы Генадзя Цімахоўцава.

Палітыка

Беларусь і ЕС падпішуць візавае пагадненне не пазней за 2 лютага 2020 года

Беларусь і ЕС падпішуць візавае пагадненне не пазней за 2 лютага 2020 года

Верагодна, гэта адбудзецца ўжо ў гэтым лістападзе. 

Грамадства

Як праходзіў ваенна-гістарычны фестываль «Мір-1812»

Як праходзіў ваенна-гістарычны фестываль «Мір-1812»

Трэці раз ваенна-гістарычны фестываль «Мір-1812» на два дні перанёс пасёлак больш чым на два стагоддзі назад.