У сітуацыі, калі бюджэтных сродкаў недастаткова, улады Гродзенскага раёна шукаюць іншыя шляхі. Аказалася, што перспектыва ёсць. Вось ужо некалькі гадоў, як раён плённа супрацоўнічае з польскімі партнёрамі па добраўпарадкаванні памежных тэрыторый. Два «дарожныя» праекты завяршыліся некалькі гадоў таму, цяпер на чарзе яшчэ чатыры.
Гродзенскі рэгіён мае выгаднае геаграфічнае становішча і шырокую сетку памежных пунктаў пропуску, што спрыяе наладжванню сувязяў з польскімі партнёрамі. Найбольшы рух, вядома, на аўтамагістралях. Таму папулярнымі становяцца праекты, якія дапамагаюць развіваць транспартную інфраструктуру.
У рамках праграмы «Польшча — Беларусь — Украіна» ўжо рэалізавана два праекты на суму 2,4 мільёна рублёў. За гэтыя сродкі адрамантавана 18 кіламетраў дарожнага палатна. Гэта два ўчасткі дарог, адзін з якіх вядзе непасрэдна да польскай мяжы, другі — да Аўгустоўскага канала. Таксама ўстаноўлены павільёны на прыпынках, добраўпарадкаваны адхоны і з'езды. На прадпрыемстве «Гроднааблдарбуд» расказалі, што траса стала шырэйшая, поўнасцю перакладзена асфальтабетоннае пакрыццё.
Сельскія ўлады сочаць за парадкам на прыдарожных палосах. Работнікі па азеляненні вядуць санітарную ачыстку, назіраюць, каб не былі пашкоджаны шыльды і знакі.
Сёлета Гродзенскі раён працягвае «дарожную» тэму. На чарговы этап праграмы было заяўлена ажно восем праектаў. І хоць канкурэнцыя атрымалася даволі вялікая, гродзенцы са сваімі польскімі партнёрамі змаглі «абараніць» чатыры праекты.
Як адзначыў старшыня Гродзенскага раённага Савета дэпутатаў Ігар ЛЯБЕЦКІ, усе яны датычацца паляпшэння ўчасткаў дарог, што вядуць на Аўгустоўскі канал ці знаходзяцца паблізу. Агульная працягласць — каля 30 кіламетраў.
Новы турыстычны брэнд гродзенцаў, Аўгустоўскі канал, прывабны для замежнікаў, у першую чаргу польскіх турыстаў. Садзейнічае пашырэнню сувязяў і бязвізавая зона канала. Таму важна, каб дарогі тут былі ў добрым стане.
Агульны бюджэт беларускага боку — амаль чатыры мільёны еўра. Па ўсіх праектах атрыманы першыя траншы, якія ўжо засвоены. Як растлумачыў Ігар Лябецкі, сродкі пайшлі на будаўніцтва дарог, набыццё новай тэхнікі, інфармацыйных знакаў. У наваколлі людзі купляюць участкі, ствараюць аграсядзібы. Добрыя дарогі даюць штуршок развіццю ініцыятыў.
Маргарыта УШКЕВІЧ
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.
