Турыстычныя аўтобусы знікнуць з цэнтра Парыжа

Улады Парыжа вырашылі прыбраць турыстычныя аўтобусы ў цэнтры горада з-за вялікай колькасці падарожнікаў, піша lenta.ru.

Мэрыя горада лічыць, што гэта прымусіць наведвальнікаў часцей карыстацца грамадскім транспартам, хадзіць пешшу і ездзіць на ровары. Па словах Эмануэля Грэгуара, намесніка мэра Парыжа, сітуацыя ў сталіцы Францыі яшчэ не такая сумная, як у Барселоне або Венецыі, але парыжане занепакоеныя прытокам турыстаў.

Грэгуар заявіў, што хутка з'явіцца новае заканадаўства для абмежавання аўтобуснага руху. Яно таксама прадугледжвае стварэнне парковачных месцаў за межамі горада, каб аўтобусы не запаўнялі цэнтральныя вуліцы.

Чыноўнік лічыць, што падобныя новаўвядзенні дапамогуць палепшыць экалагічную сітуацыю ў Парыжы. Паводле яго слоў, турыстычныя гіды павінны адаптавацца да гэтага, распрацоўваючы веласіпедныя або пешаходныя экскурсіі з навушнікамі.

• У 2018 годзе Францыя стала самай наведвальнай краінай у свеце нараўне з Іспаніяй, ЗША, Кітаем і Італіяй. За год краіну наведалі больш за 90 мільёнаў турыстаў, а яе сталіцу Парыж - рэкордныя 50 мільёнаў.
• Акрамя таго, у сакавіку брытанскі часопіс Economist Intelligence Unit (EIU) прызнаў Парыж самым дарагім горадам свету.