Вы тут

У Беларусі выдадуць персанальную энцыклапедыю «Уладзімір Караткевіч»


У «Беларускай Энцыклапедыі імя Петруся Броўкі» задуманы новы творчы праект, прысвечаны класіку беларускай літаратуры Уладзіміру Сямёнавічу Караткевічу (1930—1984).


Энцыклапедысты сумесна з вучонымі-літаратуразнаўцамі плануюць падрыхтаваць і выдаць персанальную энцыклапедыю «Уладзімір Караткевіч». Рэалізацыя праекта прымеркавана да 90-годдзя з дня нараджэння класіка, якое Беларусь будзе адзначаць у лістападзе 2020 года. Варта нагадаць, што «Беларуская Энцыклапедыя імя Петруся Броўкі» ў розныя гады, пачынаючы з 1986-га, выдала некалькі персанальных энцыклапедый: «Янка Купала» (калі першая была ў адным томе, то другое выданне — ужо ў трох), «Францыск Скарына», «Максім Багдановіч». Між іншым, персанальных энцыклапедый не так ужо і шмат на постсавецкай прасторы. Да 1991 года іх увогуле было, акрамя «купалаўскай», усяго толькі дзве — «М. Ю. Лермантаў» і «Т. Р. Шаўчэнка».

Складзены ўжо і слоўнік энцыклапедыі «Уладзімір Караткевіч». Пакуль што ён налічвае 656 тэрмінаў, якія пасля стануць артыкуламі энцыклапедыі. Ад Абабуркі да Яскевіча — такі прасцяг будучага выдання. Мовазнавец Мікалай Васілевіч Абабурка вывучаў эмацыянальна-экспрэсіўную лексіку ў творах беларускіх празаікаў, у тым ліку — і ў прозе Уладзіміра Караткевіча. Літаратуразнавец Алесь Яскевіч — таксама з шэрагу даследчыкаў творчасці аўтара «Каласоў пад сярпом тваім». Пад адной вокладкай знойдзецца месца матэрыялам, прысвечаным раманам, аповесцям, апавяданням, нарысам, вершам, п'есам У. Караткевіча, мастакам і кампазітарам, якія прычыніліся да яго творчасці, мясцінам, якія звязаны з жыццём класіка, дзе ён быў у адпачынку, спыняўся ў знаёмых і сваякоў, куды ездзіў па запрашэнні сяброў.

— Да работы над персанальнай энцыклапедыяй мы запрасілі вялікі атрад навукоўцаў, пісьменнікаў, музейшчыкаў і архівістаў, — расказвае дырэктар выдавецтва «Беларуская Энцыклапедыя імя Петруся Броўкі» Уладзімір Андрыевіч. — Доктар філалагічных навук Аляксей Ненадавец, кандыдат мастацтвазнаўства Галія Фатыхава, дактары філалагічных навук Вячаслаў Рагойша, Іван Штэйнер, бібліятэкары, архівісты — вось кола дзясяткаў аўтараў, якія ўжо пачалі работу для нашага выдання. Мы вельмі спадзяёмся, што яно стане добрым унёскам у айчыннае караткевічазнаўства, пакажа не толькі ўзровень, якога дасягнулі даследаванні жыцця і творчасці легендарнага беларускага пісьменніка, але і выбудуе новыя дарогі да засваення зробленага, здзейсненага ў імя сваёй Айчыны Уладзімірам Сямёнавічам Караткевічам.

Мяркуецца, што персанальная энцыклапедыя будзе багата ілюстравана карцінамі, прысвечанымі пісьменніку, рэпрадукцыямі з кніжнай графікі да твораў У. Караткевіча, а таксама фатаграфічнымі матэрыяламі.

Кастусь ЛАДУЦЬКА

Загаловак у газеце: Ад Абабуркі да Яскевіча

Выбар рэдакцыі

Культура

Дзяніс Раманюк: Я раблю этнаграфію «дваццаць пятым» кадрам

Дзяніс Раманюк: Я раблю этнаграфію «дваццаць пятым» кадрам

Пышныя альбомы, выдадзеныя Дзянісам Раманюком, з задавальненнем трымаюць у хатніх бібліятэках як беларусы, бо адчуваюць гонар за краіну, так і замежнікі, бо невядомую культуру даследуюць праз высакакласны кніжны твор.

Спорт

Барэц Максім Нягода: Пасля кожнага медаля трэба пачынаць з нуля

Барэц Максім Нягода: Пасля кожнага медаля трэба пачынаць з нуля

Барысаўчанін са шматдзетнай сям'і стаў чэмпіёнам кантынента.

Грамадства

«Прэферэнцыі, якія атрымалі вайскоўцы, абумоўлены выказанымі імі думкамі»

«Прэферэнцыі, якія атрымалі вайскоўцы, абумоўлены выказанымі імі думкамі»

«Армія — школа мужнасці, грамадзянскасці і патрыятызму». Паводле сацыялагічнага апытання, з гэтым сцвярджэннем згодны 86 п

Культура

Хто спявае па-беларуску?

Хто спявае па-беларуску?

Адмысловы плэйліст “Звязды” да Дня роднай мовы.