Вы тут

На «Славянскім базары» абмеркавалі стан беларускай культуры на сучасным этапе


Пасяджэнні круглага стала на тэму «Культура і мастацтва як крыніца развіцця духоўна-маральных каштоўнасцяў. Роля СМІ ў фарміраванні агульнай культурнай прасторы славянскіх народаў» адбываюцца на мастацкім форуме з 2015 года. Арганізатарамі гэтай сустрэчы традыцыйна выступаюць Міністэрства інфармацыі, Міністэрства культуры і Выдавецкі дом «Звязда». Тэма дыскусіі застаецца нязменнай, але аргументы і высновы, да якіх прыходзяць удзельнікі — прадстаўнікі вядучых СМІ, кіраўнікі фестывальнага руху, дзеячы культуры і мастацтва з розных краін, — штораз набываюць новае гучанне, актуальнае ў бягучы момант.


Генеральны дырэктар Нацыянальнага музея Султаната Аман Джамаль Мусаві прыехаў у Віцебск упершыню, каб пазнаёміцца з багатай культурнай праграмай фестывалю і разгледзець магчымасць удзелу сваёй краіны ў мерапрыемствах «Славянскага базару» налета. Штуршком да развіцця культурных стасункаў паміж нашымі краінамі стаў візіт Аляксандра Лукашэнкі ў Султанат Аман у 2007 годзе, пазней прайшоў першы сумесны праект.

«У верасні сёлета плануем адкрыць у Мінску выстаўку, прымеркаваную да 80-годдзя Нацыянальнага мастацкага музея Беларусі. Акрамя таго, у 2020-м хацелі б прыняць у Маскаце Дні культуры Беларусі», — расказаў Джамаль Мусаві.

Мадэратар дыскусіі — дырэктар — галоўны рэдактар Выдавецкага дома «Звязда» Павел Сухарукаў зазначыў, што культура і мастацтва адыгрываюць выключную ролю ў фарміраванні мірнай гуманітарнай прасторы ва ўсім свеце: «Славянскі базар» ужо даўно ператварыўся з забаўляльнага мерапрыемства ў глабальны мультыкультурны форум. І цяпер яго мэты і задачы, якія стаяць у тым ліку перад намі, прадстаўнікамі медыя, дзеячамі мастацтва, — не толькі паказаць Беларусь з найлепшага боку, але і абмеркаваць праблемы, якія фарміруе час».

«Я ўсёй душою хварэю за «Славянскі базар» і хачу, каб ён развіваўся, пашыраў фармат, — падзяліўся старшыня Беларускага саюза мастакоў Рыгор Сітніца. — Напрыклад, асабіста мне заўжды не хапае джазу, хацелася б яго на фестывалі больш. Альбо яшчэ пытанне: чаму няма класічных формаў? Помніце, быў год, калі Украіна прадстаўляла класічны праект, і гэта было цудоўна прынята гледачамі. Чаму б не паўтарыць? Лічу, што форум не толькі захавае сябе, але і прыцягне новае пакаленне гледачоў толькі тады, калі пачне прымаць новыя формы, адэкватныя часу».

Падтрымалі гэта меркаванне і першы намеснік старшыні Саюза пісьменнікаў Беларусі Алена Стэльмах і старшыня Віцебскага абласнога аддзялення саюза Тамара Краснова-Гусачэнка, якія зазначылі: адзін з неабходных складнікаў поспеху — адкрыццё новых культурных пляцовак, у прыватнасці, большае скарыстанне творчых сіл пісьменнікаў і паэтаў з Беларусі і іншых краін.

Прадстаўнікі вядучых СМІ, якія штогод шчыльна працуюць на «Славянскім базары», падзяліліся сваім бачаннем ролі медыя ў фарміраванні агульнай культурнай прасторы і ўмацаванні духоўна-маральных каштоўнасцяў. Так, дырэктар прадстаўніцтва МТРК «МІР» у Беларусі Уладзімір Пярцоў нагадаў: «Культура і мастацтва — не толькі крыніца, але і праваднік духоўна-маральных каштоўнасцяў. У спрэчцы аб тым, што важнейшае на фестывалі — камерцыйны або творчы складнік — давайце не забывацца пра гэта».

Такую ж думку — выхаванне добрага густу ў грамадстве, падтрымка высокага мастацтва — працягнуў кіраўнік БДА «Песняры» Раман Козыраў. А генеральны дырэктар расійскага інфармацыйнага агенцтва Іntеrmеdіа Яўген Сафронаў дадаў: «Фестываль штогод нясе шырокай аўдыторыі велізарную колькасць культурных з'яў, таму яго трэба ўсяляк падтрымліваць і захоўваць».

«На мой погляд, роля журналістаў у тым, каб не толькі максімальна шырока асвятляць падзеі і выдаваць кантэнт, але і адукоўваць чытача, і самім ствараць новыя інфармацыйныя нагоды, — падзялілася генеральны дырэктар Беларускага тэлеграфнага агенцтва Ірына Акуловіч. У якасці прыкладу яна прыгадала, як журналісты БелТА ініцыявалі правядзенне конкурсу перакладаў «Дистихов» Максіма Багдановіча.

«Кажуць, што можна нарадзіцца Моцартам, але ніколі ім не стаць, — заўважыла тэлевядучая Святлана Бароўская. — Калі б артысты спявалі і іх не здымала тэлебачанне, пра іх не пісалі б газеты, яны так і спявалі б дома маме, а не на сцэне «Славянскага базару». Эмацыянальна, але даходліва тэлевядучая выказала галоўную думку: фестываль — адзіны арганізм. Таму і артыстам, і прэсе, і ўсім суправаджаючым службам трэба працаваць у камандзе, не ўключаючы «зорку», але адкрываючы для публікі новыя цікавыя імёны.

Мастацкі кіраўнік Нацыянальнага цэнтра музычнага мастацтва імя У. Мулявіна Святлана Стацэнка зрабіла абсалютна канкрэтную прапанову: аддаць больш увагі дзіцячаму конкурсу. На яе думку, трэба праводзіць хоць адзін яго дзень на галоўнай пляцоўцы фэсту і ў суправаджэнні аркестру, вярнуць прамы эфір і прыз глядацкіх сімпатый, — усё гэта павысіць узровень маленькіх артыстаў і прыцягне вялізную аўдыторыю — іх аднакласнікаў, сваякоў, педагогаў, іншых таленавітых дзяцей і іх бацькоў ды г. д.

Уладальнік Гран-пры «Славянскага базару — 2004», спявак і кампазітар Пётр Ялфімаў рэзюмаваў: «Было б цудоўна, каб усё сказанае было пачута, і праграма фестывалю стала разнастайнай і цікавейшай. Каб не было так: блок папулярнай музыкі, народны, дзіцячы — бах, фінал, салют! Хацелася б бачыць на вялікай сцэне не толькі папулярную музыку, але і класічную, і рок, і джаз, і тэатральнае мастацтва, і харэаграфію, каб як мага больш цудоўных калектываў маглі прадставіць сваё мастацтва на гэтым форуме, на сёння найбуйнейшым у свеце».

Вікторыя ЦЕЛЯШУК

Фота Ганны ЗАНКАВІЧ і БелТА

Загаловак у газеце: У пошуку новых формаў і зместу

Выбар рэдакцыі

Культура

Больш за 100 літаратараў з усіх рэгіёнаў краіны возьмуць удзел у мерапрыемствах Дня беларускага пісьменства

Больш за 100 літаратараў з усіх рэгіёнаў краіны возьмуць удзел у мерапрыемствах Дня беларускага пісьменства

Свята, якое ўжо традыцыйна ладзіцца ў першую нядзелю верасня, сёлета прымае Слонім.

Грамадства

Як працуюць сядзелкі

Як працуюць сядзелкі

Попыт на сядзелак ці медсясцёр, якія могуць даглядаць цяжка хворых людзей на даму, пастаянна расце.

Культура

Алесь Родзім: Рабілі «афармілаўку» для калгасаў, вярталіся ў свае падвалы і працягвалі маляваць

Алесь Родзім: Рабілі «афармілаўку» для калгасаў, вярталіся ў свае падвалы і працягвалі маляваць

Беларускаму складніку Тахелеса прысвечаны арт-фестываль «Міфалагема тысячагоддзя», што адкрыўся ў прасторы Ок16 15 жніўня.