Распрацаваныя праекты пастаноў Міністэрства аховы здароўя па новай аплаце працы прадугледжваюць значнае змяншэнне колькасці дзеючых на гэты час найменняў выплат, паведамляе БелТА.
У прыватнасці, цяпер у ахове здароўя прадугледжаны больш за 50 найменняў выплат (павышэнні, надбаўкі і даплаты). Прапануецца аптымізаваць іх колькасць да 13 (9 стымулюючых надбавак і чатыры кампенсуючыя даплаты). Пры гэтым сума заработнай платы кожнага работніка пры ўвядзенні новай сістэмы аплаты працы не зменшыцца, паколькі будзе ажыццёўлена аб'яднанне шматлікіх выплат у новыя найменні з адначасовым аб'яднаннем іх памераў у грашовым эквіваленце. Спецыялістамі міністэрства, галоўных упраўленняў аховы здароўя аблвыканкамаў і камітэта па ахове здароўя Мінгарвыканкама сумесна з прафсаюзамі пачалося правядзенне растлумачальнай работы сярод персаналу па ўвядзенні новай сістэмы аплаты працы.
Міністэрства аховы здароўя таксама прадоўжыць работу па павышэнні заработнай платы работнікам галіны. Згодна з Указам ад 18 студзеня нумар 27 «Аб аплаце працы работнікаў бюджэтных арганізацый» з 2020 года ўводзіцца новая сістэма аплаты працы. Асноўныя змяненні заключаюцца ў наступным: тарыфная стаўка першага разраду (Br36,4) замяняецца на базавую стаўку (Br180), замест 27-размернай адзінай тарыфнай сеткі ўводзіцца 18-разрадная. Новая тарыфная сетка прадугледжвае тарыфікацыю пасад: урачоў — з 7-га па 11-ы тарыфныя разрады, сярэдніх медработнікаў — з 3-га па 6-ы тарыфныя разрады, дакладнае размежаванне паўнамоцтваў урада Беларусі, рэспубліканскіх органаў кіравання і бюджэтных арганізацый у вызначэнні ўмоў аплаты працы, устанаўленні стымулюючых надбавак і стымулюючых даплат.
Зарплата работнікаў бюджэтных арганізацый будзе складацца з акладу, стымулюючых выплат у выглядзе надбаўкі і прэміі, кампенсуючых выплат. Надбаўка за стаж будзе залежаць ад тэрміну работы супрацоўніка ў бюджэтных арганізацыях: да 5 гадоў — 10 працэнтаў, ад 5 да 10 гадоў — 15 працэнтаў, ад 10 да 15 гадоў — 20 працэнтаў, ад 15 гадоў і вышэй — 30 працэнтаў. Прэміраванне будзе ажыццяўляцца са сродкаў, прадугледжаных у адпаведных бюджэтах, у памеры 5 працэнтаў ад сумы акладаў работнікаў.
Акрамя таго, бюджэтнікам будуць налічвацца выплаты, не звязаныя з аплатай іх працы. Работнікі ў адпаведнасці з нарматыўнымі дакументамі Прэзідэнта і ўрада будуць атрымліваць наступныя надбаўкі і даплаты: надбаўка за работу на ўмовах кантрактнай формы найму, даплата за навуковую ступень і вучонае званне, за работу ў звышурочны час, у святы, святочныя, выхадныя дні, а таксама за работу са шкоднымі або небяспечнымі ўмовамі працы.
Аднаразовая выплата на аздараўленне будзе налічвацца ў тым выпадку, калі работнік ідзе ў працоўны водпуск, з разліку 0,5 яго акладу. Матэрыяльная дапамога будзе аказвацца, як правіла, у сувязі з непрадбачанымі матэрыяльнымі цяжкасцямі з накіраваннем на гэтыя мэты сродкаў у памеры 0,3 сярэднямесячнай сумы акладу работніка. Канкрэтныя памеры прэмій, аднаразовых выплат на аздараўленне і матдапамогі, а таксама парадак і ўмовы іх выплаты будуць вызначацца палажэннямі, якія зацвярджаюцца кіраўнікамі бюджэтных арганізацый.
Пры ўвядзенні новай сістэмы аплаты працы з 1 студзеня 2020 года не дапускаецца зніжэнне памераў налічанай зарплаты (без прэміі) работнікаў бюджэтных арганізацый, якія дзейнічалі на момант увядзення новых умоў аплаты працы.
Фота БелТА
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.