Вы тут

489 лясных пажараў адбылося ў Беларусі з пачатку года


Першы лясны пажар у Беларусі сёлета ўзнік ажно 18 сакавіка. Паспрыяла гэтаму сонечнае надвор’е з парывістым ветрам. Сваю лепту ў 489 такіх узгаранняў унёс і анамальна сухі і спякотны чэрвень. Праўда, гэта стала толькі каталізатарам падзей. Таму што асноўная прычына, па якой у Беларусі гараць лясы, — гэта чалавечая неахайнасць. 


— Толькі за мінулыя выходныя, калі людзі масава выехалі ў зялёныя масівы на адпачынак і па ягады, там здарылася 7 пажараў, — зазначыў намеснік начальніка ўпраўлення лясной гаспадаркі Міністэрства лясной гаспадаркі Беларусі Віктар Звяртоўскі. 

Лясная ахова з такім становішчам мірыцца не збіраецца. За першае паўгоддзе 532 чалавекі заплацілі штрафы за парушэнне пажарнай бяспекі і засмечванне лесу. Цікава, што 345 з іх патрапілі ў аб’ектывы фотапастак. Іх пачалі масава ўстанаўліваць у 2015 годзе. Зараз такіх камер налічваецца 720. Такі карысны досвед быў запазычаны ў фінскіх калег. 

— Лясгасы загадзя падрыхтаваліся да пажарнага сезону, — распавёў Віктар Звяртоўскі. — Так, сёлета яны правялі 62 тысячы кіламетраў новых мінералізаваных палос. Гэта земляныя бар’еры, мэта якіх — перашкодзіць распаўсюджванню агню.

Працуе і трохузроўневая сістэма маніторынгу: патруляваннем па маршрутах, назіраннем з 635 вышак і мачтаў (у тым ліку з дапамогай камер) і аблёт лясоў авіяцыяй Міністэрства па надзвычайных сітуацыях. 

— Мы задзейнічаем да пятнаццаці паветраных судоў, — паведаміў начальнік упраўлення аварыйна-выратавальных службаў і ліквідацыі надзвычайных сітуацый МНС Сяргей Новік. — Гэта верталёты Мі-8, Мі-26, самалёт АН-2. 38 маршрутаў аблёту перакрываюць усе лясныя масівы нашай краіны. 

З красавіка ў краіне дзейнічае рэжым павышанай гатоўнасці сістэмы папярэджання і ліквідацыі надзвычайных сітуацый. Сёлета самым складаным пажарам стаў той, які адбыўся ў красавіку на Альманскіх балотах блізу мяжы з Украінай. Яго максімальная плошча склала 200 гектар. Агонь прайшоў удвая болей. 
Агулам жа за апошнія дзесяць год у Беларусі лясы гарэлі больш за 4 з паловай тысячы разоў. Найбольш складаная абстаноўка была ў 2009 і 2015 гадах. Што да тэрыторыі, то больш за ўсіх церпяць лясы Брэстчыны і Гомельшчыны. 

Неадрыўная прыкмета лета — паведамленні пра грыбнікоў і ягаднікаў, якія заблукалі ў лесе. 

— Летась МНС стварыла пошукава-выратавальную службу. Адна з асноўных задач яе — прачэсванне вялікіх плошчаў ва ўмовах балоцістай мясцовасці і непралазнага гушчару ў цесным супрацоўніцтве з прадстаўнікамі іншых ведамстваў.

А пакуль што працягваюцца пошукі чатырох зніклых. 

— У гэтым годзе ў міліцыю паступіла ўжо каля 50 заяў аб прапажы ў лясах, — заявіў часова выконваючы абавязкі па пасадзе начальніка аддзела арганізацыі вышуковай работы галоўнага ўпраўлення крымінальнага вышуку МУС Сяргей Крупянько.- Адну са зніклых мы шукаем у Рэчыцкім раёне. Там жанчына 1951 года нараджэння пайшла ў лес 26 чэрвеня. Таксама шукаюць 83-гадовага жыхара Магілёва, які 10 ліпеня з’ехаў за ягадамі ў Магілёўскі раён. 19 ліпеня пайшла па грыбы і не вярнулася жыхарка Ашмянскага раёна 1941 года нараджэння. У той жа дзень 64-гадовы жыхар Магілёва з’ехаў за грыбамі ў Быхаўскі раён і знік.

Ратаўнікі адзначаюць, што вельмі важна перад паходам у лес ўзяць з сабой зараджаны мабільны. Гэта нашмат аблягчае пошукі пры знікненні. Падрабязныя рэкамендацыі, як сабрацца ў лес і як дзейнічаць, калі чалавек заблукаў, можна прачытаць у мабільным дадатку МНС «Дапамога побач». Ён даступны для смартфонаў на аперацыйнай сістэме Android.

Валяр’ян ШКЛЕННІК

Выбар рэдакцыі

Грамадства

Тураўскі крыж упершыню будзе прадстаўлены 26 верасня

Тураўскі крыж упершыню будзе прадстаўлены 26 верасня

На свята Узнясення Крыжа Гасподняга, падчас вячэрняй службы ў Мінскім кафедральным саборы.

Грамадства

Як і чым жыве колішняя «памідорная сталіца» Беларусі?

Як і чым жыве колішняя «памідорная сталіца» Беларусі?

Каб адчуць, чым organіc food адрозніваецца ад звыклых для сучаснага гараджаніна прадуктаў, дастаткова пакаштаваць памідоры ў Савічах і параўнаць іх з таматамі з гіпермаркета.

Грамадства

Генеральны дырэктар РУП «Белпошта» Святлана Юркевіч: Мы будзем развіваць перш за ўсё паштаматы

Генеральны дырэктар РУП «Белпошта» Святлана Юркевіч: Мы будзем развіваць перш за ўсё паштаматы

На працягу многіх дзесяцігоддзяў пошта асацыіравалася з традыцыйным наборам паслуг — лістамі, пасылкамі, газетамі, пенсіямі... Але сучасныя тэхналогіі ўсё больш уваходзяць у наш побыт.