Вы тут

Стартаваў праект, які дапаможа пачаць і працягнуць весці здаровы лад жыцця


Прафілактыка — лепш за лячэнне, а штодзённая прафілактыка роўная здароваму ладу жыцця. Каб падтрымаць ЗЛЖ у краіне, Міністэрствам аховы здароўя праводзіцца мноства рэспубліканскіх акцый для розных узроставых груп, пачынаючы ад самых маленькіх жыхароў краіны ў дзіцячых садках.


Напрыклад, «Школа — тэрыторыя здароўя» накіравана на агульнаадукацыйныя школы краіны, праект «Мой стыль жыцця сёння — маё здароўе і поспех заўтра» разлічаны на вышэйшыя навучальныя ўстановы, і за першае паўгоддзе 2019-га да яго далучылася ўжо 41 ВНУ. Адзін з самых маштабных прафілактычных рэспубліканскіх праектаў «Здаровыя гарады і пасёлкі» сёння ўключае 66 удзельнікаў — населеных пунктаў. Акрамя таго, у мэтах прафілактыкі насельніцтву рэгулярна прапануюць вымераць ціск не толькі ва ўстановах аховы здароўя, але і ў гіпермаркетах, крамах, на прамысловых прадпрыемствах. За першае паўгоддзе 2019 года ціск з прафілактычнай мэтай вымералі больш як 650 тысяч чалавек, паведаміла галоўны спецыяліст аддзела гігіены, эпідэміялогіі і прафілактыкі Міністэрства аховы здароўя Вікторыя Сперанская.

З 1 жніўня ЮНІСЕФ сумесна з Міністэрствам аховы здароўя Беларусі запускае новы марафон здаровага ладу жыцця «#САД — спартыўны, актыўны, даступны!». Кожны чацвер з 18.00 да 21.00 мінчане змогуць абсалютна бясплатна далучыцца да цэлага шэрагу актыўнасцяў, атрымаць кансультацыі ад вядучых спецыялістаў, прайсці экспрэс-абследаванне і скласці свой асабісты пашпарт здароўя. Мерапрыемствы будуць праходзіць на базе Рэспубліканскага цэнтра алімпійскай падрыхтоўкі па фрыстайле. Напрыклад, у першы дзень праекта, 1 жніўня, удзельнікі змогуць бясплатна заняцца пілатэсам, схадзіць у «Велашколу» ўсёй сям'ёй, паспрабаваць сябе ў адзінаборствах, тайскім боксе і ёзе. А ўрач-дыетолаг дапаможа скласці рацыён харчавання і дасць карысныя рэкамендацыі. Кожны чацвер на пляцоўцы «САД» будуць працаваць розныя спецыялісты — кардыёлагі, неўролагі, валеолагі, урачы агульнай практыкі, траўматолагі-артапеды. — Спецыялісты будуць выкарыстоўваць «разумныя» вагі, якія вызначаць долю тлушчавай тканкі, шчыльнасць мінеральнай тканкі костак і мышачную масу, а таксама «разумны» танометр, які дапаможа вызначыць праблемы з сардэчнымі рытмамі, — расказала галоўны ўрач установы аховы здароўя «39-я гарадская клінічная паліклініка» Вольга Есманчык.Пасля запаўнення пашпарта здароўя ўдзельнікі праекта змогуць атрымаць рэкамендацыі ўрачоў наконт таго, якая фізічная актыўнасць падыходзіць ім больш за ўсё і якіх рызык пажадана пазбягаць.

— Здаровы лад жыцця важны з моманту планавання цяжарнасці, нараджэння і да канца жыцця, — кажа намеснік прадстаўніка ЮНІСЕФ у Беларусі Габрыэла Івона Акімава. — Толькі калі мы ўсе падумаем пра сваё здароўе, пра прафілактыку захворванняў, тады і будзем сапраўды здаровым грамадствам.

Ва ўсе дні правядзення марафону будуць прадстаўлены розныя віды сумесных актыўнасцяў для мам і дзяцей, а таксама людзей з дадатковымі патрэбамі, арганізаваны выступленні ментараў, фудкоўчаў і матывацыйных спікераў, аўтограф-сесіі ад вядомых спартсменаў і здаровыя фудкорты. Напрыклад, у першы дзень праекта са сваёй матывацыйнай лекцыяй перад удзельнікамі выступіць майстар спорту, член Параалімпійскай беларускай зборнай па плаванні Аляксей Талай. «Прымайце ўдзел у гэтым цудоўным праекце і памятайце, што здароўя шмат не бывае, кожная выпітая чарка або выкураная цыгарэта, б'е па вашым патэнцыяле», — адзначыў Аляксей.

Каб прыняць удзел у праекце, трэба зарэгістравацца на сайце марафонзож.бел. Удзельнікаў чакаюць прызы, напрыклад, калі зрабіць 50 тысяч крокаў за 5 дзён і размясціць фота, якое гэта пацвярджае, у сацсетцы з хэштэгам #GоMісrоlіfе з адзнакай @vоdnоmіzmеrеnіі і перадаць эстафету двум сябрам, то кожны чацвер можна выйграць танометр. А калі прад'явіць запоўнены пашпарт здароўя ў адным з кінатэатраў Мінска, то можна купіць другі білет усяго за капейку. Самы актыўны ўдзельнік марафону атрымае галоўны прыз ад арганізатараў — «разумныя» вагі.

Дар'я ЛАБАЖЭВІЧ

Загаловак у газеце: Па здароўе... у САД!

Выбар рэдакцыі

Грамадства

Галiна Левіна: Помнiк — не канструктар i не чарцёж, яго трэба перажыць, выпакутаваць

Галiна Левіна: Помнiк — не канструктар i не чарцёж, яго трэба перажыць, выпакутаваць

У архiтэктара Галiны Левiнай — Хатынь, творчая спадчына яе бацькi.

Грамадства

Прэмiя прыгажосцi. Дзеля чаго людзi кладуцца пад нож пластычнага хiрурга?

Прэмiя прыгажосцi. Дзеля чаго людзi кладуцца пад нож пластычнага хiрурга?

Як сведчаць шматлiкiя даследаваннi, прывабным людзям прасцей прабiцца ў жыццi i яны дасягаюць у кар'еры большага поспеху. 

У свеце

Як Еўропа аднаўляецца ад кавiднага ўдару?

Як Еўропа аднаўляецца ад кавiднага ўдару?

Сёлета еўрапейская эканомiка будзе перажываць глыбокую рэцэсiю з-за ўспышкi каранавiруса, нягледзячы на хуткiя i ўсёабдымныя антыкрызiсныя меры як на саюзным, так i на нацыянальным узроўнi.

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.