Вы тут

Чым займаюцца актывісты ў вёсцы Новае поле


Гісторыю можна вывучаць, а можна яе аднаўляць і працягваць, як актывісты з вёскі Новае Поле, што ў Мінскім раёне. А ў гэтага населенага пункта сапраўды цікавае мінулае.


Маёнтак у розныя часы належаў розным знакамітым асобам: Агінскім, Сялявам. Апошнія яго гаспадары — князі Друцкія-Любяцкія, пры якіх тут жыло крыху больш за дзясятак чалавек. А сёння ў вёсцы налічваецца амаль тысяча жыхароў, і з кожным годам населены пункт прырастае навасёламі. Хтосьці купляе дом і пераязджае на лета з Мінска, а нехта — на пастаяннае месца жыхарства. Іншы атрымлівае ўчастак і будуе ўласнае жыллё. Аб'яднаць людзей розных узростаў, поглядаў, інтарэсаў у адну дружную сям'ю, грамадскую супольнасць імкнуцца актывісткі Любоў Ермакова і Дар'я Чыбуева. Менавіта ім належыць ініцыятыва зрабіць свой кут утульным, камфортным для жыцця культурным цэнтрам.

— Мы не згодныя з думкай, што ўдасканальвацца можна ў горадзе, а ў вёсцы толькі дэградаваць, — лічыць Любоў Ермакова. — Па сутнасці, гэта дыскрымінацыя па прыкмеце месца жыхарства. У сельскай мясцовасці людзі таксама маюць права на тое, каб культурна адпачываць, развіваць спадчыну, што засталася ад продкаў.

— Мы не маглі ў Год малой радзімы стаяць убаку ад агульнадзяржаўных задач і актыўна ўключыліся ў работу па зборы, апрацоўцы, сістэматызацыі гістарычных матэрыялаў. І на іх аснове ствараем пазнавальныя культурныя аб'екты, — уступае ў размову мастачка Дар'я Чыбуева. — Разам з жыхарамі распрацавалі лагатып вёскі, эскіз сцяга, за аснову ўзялі вежу сядзібы Друцкіх-Любяцкіх, з якой месцічы атаясамліваюць сваю вёску. У выніку сумеснай работы з'явіўся дызайн карты мястэчка, сабрана гістарычная інфармацыя, зарэгістраваны ўласны сайт і створаны старонкі ў сацыяльных сетках. І ўсё гэта за адзін толькі год! Але мы хочам як мага больш пашырана і дасканала прадставіць наша мінулае, расказаць пра таленавітых людзей, рамеснікаў, мясцовыя традыцыі, прадпрыемствы і арганізацыі.

Дар'я падводзіць нас да стэнда, які знаходзіцца ў гістарычным цэнтры вёскі.

— Каб паставіць яго, мы паўгода хадзілі па кабінетах. Аказалася, праблематычна. Адзін участак зямлі належыць сельскагаспадарчаму каледжу. Іншы — магазіну. Ледзьве знайшлі маленькі «нічыйны» пятачок. Стэнд будзе ўтрымліваць інфармацыю пра гэтую сядзібу, яе апошняга гаспадара Іераніма Друцкага-Любяцкога — надзвычай цікавага чалавека, які валодаў журналісцкім талентам, пісаў п'есы. Адну з іх мы планавалі паставіць на сцэне, якую збіраліся ўзводзіць. Але ж нашым марам не давялося здзейсніцца.

Справа ў тым, што актывісты расчысцілі стары парк, які ніхто ніколі не прыбіраў. Вывезлі не адзін прычэп смецця, часткова выраўнавалі тэрыторыю, а сельсавет абкасіў траву. Тут планавалася дзіцячая пляцоўка, але зрабіць яе не дазволілі, бо побач дарога: небяспечна для малых. Таму вырашылі паставіць крытую альтанку-сцэну, дзе меркавалася ставіць спектаклі, ладзіць культурна-забаўляльныя мерапрыемствы, выстаўкі, праводзіць паказ работ рамеснікаў, бо ў вёсцы ёсць свае народныя ўмельцы, мастакі. Грошы на яе ўзвядзенне вылучыў Фонд мясцовых супольнасцяў. Задумвалася, што сцэна будзе выкладзена 120 пліткамі і ўсе ахвотныя жыхары аздобяць іх каменьчыкамі і нават гербамі свайго роду, сям'і, калі такія ёсць. Але на ўзвядзенне аб'екта атрымаць дазвол не змаглі, бо ён лічыцца капітальнай канструкцыяй. На гэтым месцы правялі святы «Калядкі ў парку», «Гарбузы і слімакі Новага Поля». Зразумела, што гарбузы вырошчвае шмат хто ў вёсцы. А пры чым тут слімакі? Аказваецца, князі Друцкія-Любецкія трымалі цэлую ферму вінаградных слімакоў. І гэтыя бесхрыбетныя з таго часу жывуць тут і, больш таго, распаўсюдзіліся па ўсім наваколлі. Таму слімаковыя бягі сталі сапраўдным відовішчам і для малых, і для старых. У планах актывістаў выпечка здобных булак, якія формай нагадваюць слімака.

У самым разгары і работы па ўзвядзенні хаткі творчасці. З адводам зямлі пад яе было таксама шмат праблем. Дар'я Чыбуева дазволіла паставіць збудаванне на тэрыторыі, якая належыць яе сям'і, літаральна ў агародзе.

У Новым Полі няма ні клуба, ні бібліятэкі. І гэтая хацінка стане цэнтрам адпачынку, творчасці, культуры, які аб'яднае па інтарэсах людзей рознага ўзросту. Актывісты тут плануюць ладзіць мастацкія выстаўкі, майстар-класы, «смачныя» вечарыны. Напрыклад, уладальнікі адной з аграсядзіб пякуць хлеб па старадаўніх рэцэптах, фірменную піцу. Яны ўжо праводзілі для землякоў бясплатную дэгустацыю. Ёсць людзі, якія вырабляюць сыры з казінага малака. Наогул у вёсцы шмат хто валодае рознымі відамі рамёстваў, якія перадалі продкі, і гатовы падзяліцца майстэрствам.

Вядома, большая частка мясцовых жыхароў падтрымліваюць актывістаў. На іх баку і старшыня Гаранскага сельвыканкама Вольга Антоненка. Менавіта яна актыўна ўдзельнічае ў суботніках поплеч са сваімі землякамі, падтрымлівае іх намаганні. На жаль, знаходзяцца і тыя, хто супраць маладых задзірыстых хлопцаў і дзяўчат: маўляў, чаго ім больш за ўсіх трэба, навошта бударажыць ціхае вясковае жыццё?!

Тым не менш у вёсцы адчуваюцца перамены. На выездзе з населенага пункта паставілі папераджальны знак аб небяспечным павароце, уладкавалі праход да дзіцячага сада. Непасрэдна на агульных сходах жыхароў выяўляюцца праблемы, прымаюцца звароты ў розныя інстанцыі. Напрыклад, на адным такім народным вечы было прынятае рашэнне талакой узяцца за добраўпарадкаванне мястэчка. На яго нават запрашалі экспертаў па сельскім развіцці. Пачаць вырашылі з выхавання культуры — культуры навядзення парадку на зямлі, быту, паводзін. А праблем сапраўды хапае: няма крытага прыпынку для транспарту, тратуараў або хоць адсыпаных бакавых дарожак — і гэта небяспечная сітуацыя. Вядома, не ўсё могуць зрабіць актывісты. У многіх пытаннях ім неабходна прафесійная дапамога. Разам з тым шмат што ім пад сілу, толькі б не ставілі бар'еры і не перашкаджалі.

Таццяна ЛАЗОЎСКАЯ

Фота Ганны ЗАНКАВІЧ

Загаловак у газеце: Гарбузы і слімакі Новага Поля

Выбар рэдакцыі

Калейдаскоп

Вясёлыя гісторыі чытачоў

Вясёлыя гісторыі чытачоў

Языку дай волю..., Хвалі дзень вечарам, Людзі — добрыя.

Эканоміка

Саветы па развіцці прадпрымальніцтва сталі працаваць больш эфектыўна і вынікова

Саветы па развіцці прадпрымальніцтва сталі працаваць больш эфектыўна і вынікова

Значную ўвагу на развіццё малога і сярэдняга прадпрымальніцтва пачалі звяртаць даўно, прычым на самым высокім дзяржаўным узроўні.

Эканоміка

Ці патаннее жыллё ў наступным годзе?

Ці патаннее жыллё ў наступным годзе?

А што ў сталіцы — тое і ў рэгіёнах.

Спорт

Спартыўны псіхолаг Кацярына Буча распавядае, ці лёгка вырасціць чэмпіёна

Спартыўны псіхолаг Кацярына Буча распавядае, ці лёгка вырасціць чэмпіёна

Як правільна вызначыць від спорту, які падыходзіць для вашага дзіцяці, ці варта ўвогуле прымушаць яго хадзіць на трэніроўкі?