Вы тут

Стары атракцыён адпачынак не сапсуе. Калі ён, вядома, тэхнічна спраўны


Паркі ў буйных гарадах і нават у некаторых дробных раённых цэнтрах немагчыма ўявіць без велізарных механізаваных атракцыёнаў. Але там, дзе весялосць, адначасова прысутнічае і рызыка. Па звестках Дзяржпрамнагляду, каля 2/3 такіх агрэгатаў ужо адпрацавалі нарматыўны тэрмін службы, устаноўлены заводам-вытворцам. Пры гэтым, праўда, за апошнія восем гадоў у нашай краіне з'явілася 109 новых машын, якія падлягаюць рэгістрацыі ў ведамстве.


— Але тут няма ніякага страху, — запэўнівае начальнік упраўлення нагляду за бяспекай пад'ёмных збудаванняў і атракцыёнаў Дэпартамента па наглядзе за бяспечным вядзеннем работ у прамысловасці Міністэрства па надзвычайных сітуацыях Пётр Клімко. — Ёсць шэраг мерапрыемстваў, скіраваных на бяспечную работу такіх «ветэранаў». Штогод праводзіцца тэхнічнае дыягнаставанне. Гэта паглыбленае даследаванне ўсіх крытычных канструктыўных кампанентаў, ад якіх залежыць бяспека як наведвальнікаў, так і абслуговага персаналу. Калі ўсе дэфекты і няспраўнасці ліквідуюуць, будзе праведзена другая абавязковая працэдура — тэхнічны агляд, які ўключае ў сябе ў тым ліку і выпрабаванне пад нагрузкай. Толькі пасля таго, як атракцыён вытрымае ўсе праверкі і будзе прызнаны працаздольным, эксперт Дзяржпрамнагляду дасць дабро на яго эксплуатацыю.

Разам з тым гэта не азначае таго, што ветэраны атракцыённага парку могуць эксплуатавацца да бясконцасці. Акрамя фізічнага зносу, існуе яшчэ і маральны. Напрыклад, некаторыя агрэгаты за дзесяцігоддзі ўжо надакучылі карыстальнікам. А гэта ў сваю чаргу будзе негатыўна адбівацца на выручцы. Таму яшчэ ў 2011 годзе былі распрацаваны графікі вываду старых агрэгатаў з эксплуатацыі. Усяго «на пенсію» планавалася адправіць 116 машын, прычым да канца гэтага года 105. Але, па звестках Дзяржпрамнагляду, фактычна выведзены з эксплуатацыі ўсяго 49.

— Напрыклад, на нашым балансе знаходзіцца 53 атракцыёны, — расказвае начальнік упраўлення «Гарадскія паркі» УП «Мінскзелянбуд» Андрэй Жыхараў. — Пры гэтым істотная частка з іх эксплуатуецца больш за дзесяць гадоў. Але гэта не кажа пра тое, што іх трэба тут жа спісваць, — яны праходзяць абслугоўванне згодна з рэгламентам работ. Зразумела, у планах нашай арганізацыі — абнаўленне тэхнічнага парку, але цана пытання вельмі дарагая. За кошт уласных сродкаў гэта складана зрабіць. Таму апошнім часам мы закупляем надзіманыя комплексы і лабірынты.

Як паведаміў Андрэй Жыхараў, цяпер новы механізаваны атракцыён каштуе 100 тысяч еўра ў эквіваленце. І гаворка ідзе яшчэ пра адносна просценькі з тэхнічнага пункту гледжання і адпаведна танны комплекс. А вось надзіманы каштуе значна танней — каля 20 тысяч долараў у эквіваленце.

Разам з тым, асноўная прычына няшчасных выпадкаў на атракцыёнах — не іх фізічны стан, а памылкі персаналу.

— Яны часам недастаткова падрыхтаваныя, не ўмеюць дзейнічаць у няштатных сітуацыях, недысцыплінаваныя, — пералічвае заганы Пётр Клімко. — Дзесьці не даглядзелі, там рэмень не прышпілілі, не тую кнопку націснулі... Сваю ролю адыгрывае і велізарная цякучасць дзяжурных атракцыёнаў. Некаторыя ўладальнікі агрэгатаў кажуць, што на працягу сезона склад дзяжурных можа абнаўляцца па розных прычынах нават двойчы. А што тады казаць пра іх належную практычную падрыхтоўку?

Але разам з тым за апошнія дзесяць гадоў пры эксплуатацыі атракцыёнаў няшчасных выпадкаў з пасажырамі, якія прывялі да цяжкіх траўмаў і смерці, не зафіксавана.

— У нас летась быў інцыдэнт у парку Чалюскінцаў з атракцыёнам «Калабок», — згадвае Пётр Клімко. — Разбурыўся адзін з прывадных валаў. Атракцыён спыніўся, пасажыры не пацярпелі. Мы разабраліся ў прычынах. Такіх атракцыёнаў у Беларусі было тры. Мы іх усе дадаткова абследавалі ў пазачарговым парадку. Разам з тым трэба адзначыць, што пасажыры часам самі не зважаюць на элементарныя правілы бяспекі.

Тым часам стала вядома, што ў сталічным парку Чалюскінцаў з'явяцца новыя атракцыёны для дзяцей. Гэта будуць трохузроўневы «Лабірынт» памерам 6 на 13 метраў, надзіманы комплекс «Саванна», міні-джэт і батут. Акрамя таго, там часова знайшоў прыстанак «Віртуальны тэлепорт». Пакуль ён узяты ў арэнду. Калі атракцыён спадабаецца мінчанам і гасцям сталіцы, то яго ўсталююць у парку Горкага.

Валяр'ян ШКЛЕННІК

Выбар рэдакцыі

Грамадства

Псiхолаг тлумачыць, чаму паўза пасля заканчэння школы — не трагедыя

Псiхолаг тлумачыць, чаму паўза пасля заканчэння школы — не трагедыя

Педагогi, як i бацькi, павiнны быць уважлiвыя да любой праявы адоранасцi.

Эканоміка

Як вылечыць эканомiку ад каранакрызiсу?

Як вылечыць эканомiку ад каранакрызiсу?

Нягледзячы на тое што сучасны свет перажываў досыць шмат эканамiчных крызiсаў, той, што разгортваецца ў 2020 годзе, — унiкальны. 

Грамадства

Маладая актрыса Iрына Якавец: Нецiкавых роляў не iснуе

Маладая актрыса Iрына Якавец: Нецiкавых роляў не iснуе

Першым спектаклем, у якiм я ўзяла ўдзел, быў «Вясёлы Роджэр».

Грамадства

Андрэй Худык: Неабходная мабілізацыя ўсіх узроўняў улады, грамадства і бізнесу для сумесных дзеянняў па ахове прыроды

Андрэй Худык: Неабходная мабілізацыя ўсіх узроўняў улады, грамадства і бізнесу для сумесных дзеянняў па ахове прыроды

Ад таго, наколькі беражліва людзі ставяцца да прыроды, залежыць якасць іх жыцця, здароўе і нават дабрабыт.