Кожны чацвер жніўня ў Рэспубліканскім цэнтры алімпійскай падрыхтоўкі па фрыстайле (а гэта 15, 22 і 29 жніўня) увечары з 18.00 да 21.00 любы ахвотны абсалютна бясплатна можа паспрабаваць сябе ў розных відах фізічнай актыўнасці і фітнес-кірунках, папярэдне прайшоўшы экспрэс-абследаванне ва ўрачоў і атрымаўшы іх рэкамендацыі па здаровым ладзе жыцця і асаблівасцях свайго арганізма. Тут праводзіцца Марафон здаровага ладу жыцця «#САД — Спартыўны, Актыўны, Даступны».
На адной пляцоўцы ахвотныя могуць удзельнічаць у трэніроўках па фіткросе, ёзе, стрэйчынгу, пілатэсе. Можна паспрабаваць сябе ў баявых майстэрствах і розных танцавальных кірунках, даведацца розніцу паміж функцыянальнай трэніроўкай, кардыя-трэніроўкамі высокай інтэнсіўнасці і рэлакс-практыкаваннямі.
А таксама пачуць меркаванне трэнераў, да якога віду актыўнасці ў вас найбольш здольнасцяў.
Калі ў вас ёсць сям'я, тут прадстаўлены ўсе віды сумесных актыўнасцяў для бацькоў і дзяцей, а таксама для людзей з дадатковымі патрэбнасцямі. Арганізоўваюцца сустрэчы з фудкоўчамі і кулінарныя батлы, лекцыі матывацыйных спікераў, аўтограф-сесіі ад вядомых спартсменаў ды іншае.
— Кожны чацвер да нашых урачоў запісваецца больш за 300 чалавек, але прымаюць і тых, хто з нейкіх прычын папярэдне запісацца не паспеў, — расказвае галоўны ўрач 39-й гарадской клінічнай паліклінікі Мінска Вольга Есманчык. — Ад нашай паліклінікі тут працуюць кардыёлаг, урачы агульнай практыкі, памочнікі ўрача і медыцынскія сёстры. У першы чацвер ахвотных было вельмі шмат, мы не чакалі такога наплыву, і прыйшлося павялічыць колькасць урачоў. У наведвальнікаў ёсць магчымасць змераць свой артэрыяльны ціск, частату пульсу і вызначыць, напрыклад, ці ёсць парушэнні сардэчнага рытму. Можна змераць вагу на «разумных» вагах. Вызначаецца доля тлушчавай тканкі, вадкасці, шчыльнасць касцявой тканкі і іншыя паказчыкі. Урач пракансультуе, што рабіць, каб зменшыць іх.
Кожны пацыент атрымае пашпарт здароўя, а таксама два білеты ў кінатэатр Sіlvеr Sсrееn па цане аднаго. А гандлёвая марка «Мікралайф» праводзіць інтэрнэт-чэлендж #ШАГАЮСMІСRОLІFЕ.
На працягу тыдня неабходна прайсці ад 50 тысяч крокаў і размясціць ці прад'явіць на марафоне фота ці скрыншоты, а таксама перадаць эстафету двум сябрам. Усе ўдзельнікі атрымаюць магчымасць выйграць адзін з пяці танометраў Mісrоlіfе.
А найбольш актыўныя ўдзельнікі, якія наведалі ўсе пяць марафонаў жніўня, змогуць пазмагацца за прыз ад арганізатараў мерапрыемства — «разумныя» вагі. Кожны чацвер вас чакаюць у Рэспубліканскім цэнтры алімпійскай падрыхтоўкі па фрыстайле (вул. Сурганава, 2а).
Зарэгістравацца і пазнаёміцца з раскладам заняткаў можна на сайце марафонзож.бел.
Арганізатары мерапрыемства — Міністэрства аховы здароўя, Прадстаўніцтва ЮНІСЕФ у Беларусі, ЮНПФА, Сусветная арганізацыя аховы здароўя, ААН, праект БЕЛМЕД.
Алена КРАВЕЦ
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».
