Вы тут

У Талачынскім раёне сёлета з'явілася першая аграсядзіба


У Віцебскай вобласці зарэгістравана каля 620 аграсядзіб, у тым ліку чатыры — на базе сельскагаспадарчых арганізацый. Амаль палова з іх знаходзіцца ў Браслаўскім, па 44 — у Мёрскім і Пастаўскім раёнах. А вось у Талачынскім сёлета з'явілася першая.


Добрай навіной для гаспадароў у пачатку мінулага года стаў уступіўшы ў сілу прэзідэнцкі Указ № 365 «Аб развіцці аграэкатурызму» (ад 9 кастрычніка 2017 года). Дзякуючы яму істотна спрашчаецца аказанне паслуг у гэтай сферы. Паралельна пашыраны пералік паслуг, якія могуць аказвацца.

На жаль, не ўсе сядзібы працуюць. З агульнай колькасці летась дзейнічала толькі 80 %. Напрыклад, у Браслаўскім раёне ў 2018 годзе колькасць сядзіб паменшылася на 17. Гэта адбылося таму, што некаторыя суб'екты агратурызму не адпавядалі патрабаванням Указа № 365.

Таксама летась у сядзібах прынялі каля 42,2 тысячы гасцей. Параўнайце: пазалетась іх было 33,1 тысячы, а ў 2016 годзе — прыблізна 31,7 тысячы. Сярэдняя працягласць пражывання: у 2018-м — больш за дзевяць дзён і прыблізна па пяць з паловай дзён у 2016 і 2017 гадах. Значыць, бізнес становіцца больш выгадным. А падатак — усяго толькі базавая велічыня ў год.

У многіх раёнах гаспадары аграсядзіб, каб менавіта да іх прыехалі адпачыць, шукаюць «фішкі». І прыкладаў гэтаму ўсё больш. Напрыклад, масавым стаў леташні чэмпіянат краіны па яздзе па бездарожжы, які прайшоў на базе сядзібы «Канашы» ў Полацкім раёне. Новым турыстычным прадуктам стала анімацыйная праграма «Адраджэнне полацкага сярэдневяковага суднаходства». Крэатыўнічаюць і ў суседнім Глыбоцкім раёне. Сядзіба «Утрына» стала сталіцай экалагічнага фестывалю «ЭкаЛэнд». У яго рамках правялі кулінарны конкурс сярод гаспадароў аграрных сядзіб і жыхароў раёна. А ў сядзібы «Запаветны востраў» і «Цэнтр Еўропы» летась на міжнародны фестываль прыехала каля сарака дайвераў з Беларусі, Расіі і Украіны. Нагодай стала магчымасць пагрузіцца ў самае глыбокае беларускае возера — Доўгае.

У Мёрскім раёне на «Мацейкавай сялібе» арганізавалі летні сямейны лагер. У праграме былі рухомыя гульні, майстар-класы па валянні воўны, спектаклі і экскурсіі па знакавых мясцінах раёна. А на Пастаўшчыне ў аграсядзібе «Акарына» праводзяцца майстар-класы па ганчарным мастацтве...

У камітэце эканомікі Віцебскага аблвыканкама лічаць, што адным з самых перспектыўных кірункаў развіцця турызму павінен стаць так званы экалагічны. Такі від адпачынку называюць яшчэ «зялёным» — гэта калі і самі турысты прыносяць мінімум шкоды навакольнаму асяроддзю. Яго магчыма развіваць у раёнах з некранутай прыродай, з сельскагаспадарчай накіраванасцю (апошніх у Віцебскай вобласці большасць — 12 з 21).

Аляксандр ПУКШАНСКІ

Загаловак у газеце: Паўночныя «фішкі» аграсядзіб

Выбар рэдакцыі

Грамадства

Як сапраўдныя мужыкі засвойваюць «жаночую» справу

Як сапраўдныя мужыкі засвойваюць «жаночую» справу

У апошнія гады тэма раўнапраўя паміж мужчынамі і жанчынамі перажывае новую хвалю росквіту.

Культура

Згадкі пра Аркадзя Куляшова

Згадкі пра Аркадзя Куляшова

Гісторыя аднаго выступлення.