Вы тут

Румас: Праект праграмы дзеянняў па інтэграцыі ў Саюзнай дзяржаве прадставяць Прэзідэнту


Увечары ў пятніцу Сяргей Румас даў інтэрв’ю праграме «Размова ў Прэзідэнта» на тэлеканале «Беларусь 1».


Фота БЕЛТА

Адказваючы на ​​пытанне аб падрыхтоўцы праграмы дзеянняў па інтэграцыі ў Саюзнай дзяржаве, Сяргей Румас праінфармаваў, што яна практычна ўзгоднена. «З Прэзідэнтам неабходна было абмеркаваць некалькі прынцыповых момантаў, якія закладзены ў гэтай праграме. У прынцыпе кіраўнік дзяржавы ўхваліў падыходы, якія ўзгадніў урад са сваімі калегамі. Мы ў аўторак ужо ўнясём кіраўніку дзяржавы праект гэтай праграмы для адабрэння, каб ужо ў пачатку верасня (у мяне ёсць дамоўленасць з маім калегам Дзмітрыем Анатольевічам Мядзведзевым) прэм’ер-міністры парафіравалі гэтую праграму», - сказаў кіраўнік урада.

Сяргей Румас коратка выклаў сутнасць праграмы. Рэалізацыя яе канцэпцыі будзе азначаць выкананне прынцыпу «дзве краіны — адзін рынак». Ён падкрэсліў, што ў дакуменце няма пытанняў палітычнага характару, якія бударажаць у некаторых СМІ. Прэм’ер-міністр выказаў здагадку, што збольшага гэта адбываецца таму, што раней перагаворшчыкі не раскрывалі палажэнняў гэтай праграмы. «Думаю, пасля парафіравання ўрады дзвюх краін апублікуюць яе, каб у грамадскасці былі знятыя асцярогі з нагоды пытанняў суверэнітэту і іншых», — адзначыў ён.

Праграма накіравана на рэалізацыю чыста эканамічных палажэнняў і прадугледжвае механізмы, пры якіх у дзвюх краінах будзе функцыянаваць адзіны рынак. Большасць беларускіх прадпрыемстваў гатовыя канкурыраваць на ім з расійскімі, падкрэсліў прэм’ер-міністр. Для тых, што асцерагаюцца такой канкурэнцыі, будуць прадугледжаны пераходныя перыяды, падчас якіх яны змогуць прыняць кампенсацыйныя меры.

Доўгатэрміновая мэта - у павышэнні канкурэнтаздольнасці ў цэлым, што неабходна з улікам перспектывы ўступлення Беларусі ў СГА. Праца па далучэнні краіны да арганізацыі ўступае ў заключную стадыю. «У нас застаецца ўсё менш і менш неўрэгуляваных пытанняў. Нашы чатыры партнёры па еўразійскай інтэграцыі ўжо ў СГА, і Беларусь, па сутнасці, прыняла на сябе ўсе абавязацельствы ў рамках СГА, не з'яўляючыся яе членам», — звярнуў увагу Сяргей Румас. «Для нас уступленне ў СГА прынясе толькі станоўчыя моманты, таму што краіны, якія сёння з намі працуюць і ўсталёўваюць бар’еры як з краінай — не членам СГА, павінны будуць падпарадкавацца агульным правілам», — падсумаваў ён.


Рост коштаў на сацыяльна значныя тавары прыпыніцца

Сяргей Румас канстатаваў, што цэны на сацыяльна значныя тавары, у прыватнасці на малочную групу, на крупы, узраслі за кошт павелічэння гандлёвай надбаўкі. «Сёння ў нас ідзе нармальны дыялог з сеткамі. Мы паказваем ім гэты рэзкі скачок цэн. Думаю, што вынікам гэтай працы будзе тое, што прырост цэн па сацыяльна значных таварах прыпыніцца», — сказаў прэм’ер.

Калі нядобрасумленныя ўдзельнікі рынка будуць выстаўляць неабгрунтаваныя надбаўкі, то ў МАРГ ёсць права ўводзіць цэнавае рэгуляванне на асобныя групы тавараў да 90 дзён, нагадаў Сяргей Румас. «Нам не хацелася б звяртацца да гэтага інструмента. Ён не выкарыстоўваўся з 2016 года. Але калі ўрад будзе бачыць негатыўнае развіццё гэтай сітуацыі, то я не выключаю вяртання да такога часовага рэгулявання», — адзначыў ён.

Аналіз кошту спажывецкага кошыку паказвае нераўнамерны рост коштаў на розныя групы тавараў і паслуг. «Цэны на сацыяльна значныя тавары выраслі больш хуткімі тэмпамі — на некаторыя з іх да 10%, што, вядома ж, вышэй за агульную інфляцыю. Гэтая тэма з’яўляецца прадметам пільнай увагі з боку Міністэрства антыманапольнага рэгулявання і гандлю», — падкрэсліў Сяргей Румас.


Новыя падыходы па датэрміновай выплаце сямейнага капіталу могуць распаўсюдзіць на першую праграму

Праект указа аб працягу праграмы сямейнага капіталу распрацаваны з улікам даручэнняў кіраўніка дзяржавы і ўнесены на яго разгляд. «Урад прапанаваў новыя падыходы, якія тычацца датэрміновага выкарыстання сродкаў, распаўсюдзіць і на тыя шматдзетныя сем’і, якія атрымалі сямейны капітал па праграме 2015-2019 гадоў», — адзначыў Сяргей Румас. Такім чынам, дзве праграмы будуць зроўнены, і тыя, хто атрымаў сямейны капітал па першай праграме, не будуць ушчэмленыя, падкрэсліў ён.

Кіраўнік урада распавёў пра асаблівасці праграмы, якая ў выпадку адабрэння Прэзідэнтам, будзе рэалізоўвацца ў 2020-2024 гадах. У прыватнасці, сям’я атрымае магчымасць распараджацца сродкамі сямейнага капіталу, ня чакаючы 18-годдзя дзіцяці, для паляпшэння жыллёвых умоў, адукацыі аднаго з членаў сям’і, медыцынскага абслугоўвання. Урад прапанаваў пашырыць пералік медпаслуг, якія могуць быць прафінансаваны за кошт сродкаў сямейнага капіталу. Акрамя таго, сямейны капітал будзе налічацца ў суме Br22,5 тыс. «Гэта больш за $10 тыс., якія налічваліся па папярэдняй праграме», — звярнуў увагу Сяргей Румас.

Ён нагадаў, што з 2021 года кожная шматдзетная сям’я, якая стаіць у чарзе на паляпшэнне жыллёвых умоў, павінна на працягу аднаго года атрымаць ад дзяржавы прапанову аб пабудове кватэры. Для выканання гэтай задачы ў краіне павялічана колькасць дамоў, якія ўводзяцца для шматдзетных сем’яў. У 2018 годзе пабудавана і 8,8 тыс. кватэр — больш чым у тры разы больш, чым у 2017 годзе. «На 2019 год — планка ўжо 12 тыс. кватэр. Сёння мы бачым, што гэтыя планы павінны быць выкананы», — сказаў прэм’ер-міністр. Ён адзначыў, што ў 2020 годзе для шматдзетных плануецца пабудаваць ужо амаль 14 тыс. кватэр.

Выбар рэдакцыі

Грамадства

Жыхар Жодзіна Генадзь Пузанкевіч даехаў на веласіпедзе з Беларусі да Уладзівастока

Жыхар Жодзіна Генадзь Пузанкевіч даехаў на веласіпедзе з Беларусі да Уладзівастока

Ён кожны дзень імкнуўся пераадольваць не менш за сто кіламетраў.

Грамадства

Як «Звязда» парушальнікаў адпачынку з міліцыяй шукала

Як «Звязда» парушальнікаў адпачынку з міліцыяй шукала

Апошнімі цёплымі дзянькамі многія мінчане стараюцца скарыстацца напоўніцу і па магчымасці адпачыць на прыродзе, хай сабе і ў межах горада.

Культура

Спявак Аляксандр Гелах: Як толькі паступіў, пачаў шукаць работу

Спявак Аляксандр Гелах: Як толькі паступіў, пачаў шукаць работу

Малады тэнар, які прыйшоў у Нацыянальны акадэмічны Вялікі тэатр Беларусі ў 2015-м, звярнуў на сябе ўвагу аматараў оперы адразу.

Калейдаскоп

Вясёлыя гісторыі нашых чытачоў

Вясёлыя гісторыі нашых чытачоў

Танцуй... Пакуль не замужам?