Вы тут

«Фестываль навукі» пройдзе ў Мінску 7 верасня


У Цэнтральным батанічным садзе НАН Беларусі ў Мінску 7 верасня пройдзе «Фестываль навукі». У мінулым годзе ён супаў са святкаваннем Дня горада, сёлета ж арганізатары вырашылі не ставіць жыхароў і гасцей сталіцы перад выбарам, якой падзеі аддаць перавагу. Дык чым парадуе фестываль гэтым разам?


Першы намеснік старшыні Прэзідыума Нацыянальнай акадэміі навук Сяргей ЧЫЖЫК расказаў, што асноўная мэта мерапрыемства — папулярызацыя і развіццё навукі ў краіне, а таксама прыцягненне да тэхналогій маладога пакалення.

— «Фестываль навукі» будзе цікавы як для дарослых, так і для падрастаючага пакалення. Сёлета будуць прадстаўлены чатыры асноўныя лекцыйныя пляцоўкі: тры «пра ўсё» і адна пра медыцыну. Акрамя таго, будзе дзейнічаць пляцоўка «Робаты і тэхналогіі», выстаўка распрацовак Нацыянальнай акадэміі навук, будуць прадстаўлены тэхналагічныя кампаніі з майстар-класамі і навуковымі шоу. Для дзяцей — асобныя гульні і месца для адпачынку. На працягу ўсяго свята будзе працаваць зона вулічнай ежы, — расказаў першы намеснік старшыні Прэзідыума НАН.

Падчас фестывалю госці змогуць убачыць розныя дасягненні навукі, у тым ліку рэдкія археалагічныя знаходкі. Пра гэта расказаў намеснік старшыні Савета маладых вучоных НАН, загадчык аддзела археалогіі першабытнага грамадства Інстытута гісторыі НАН Станіслаў ЮРЭЦКІ:

— Тое, што будзе прадстаўлена на фэсце, вы не ўбачыце ні ў адным музеі. Усё можна памацаць рукамі, задаць пытанні, якія цікавяць. Свае распрацоўкі прадставяць акадэмічныя інстытуты фізікі і эксперыментальнай батанікі. Акрамя таго, будзе выдзелена вялікая пляцоўка, прысвечаная атамнай энергетыцы, і інтэрактыўная пляцоўка на тэму хіміі ад Усерасійскага фестывалю навукі «NAUKA 0+», прысвечаная 150-годдзю стварэння табліцы Мендзялеева. Наведвальнікі змогуць ацаніць дасягненні беларускай навукі і навукаёмістыя распрацоўкі.

Навуковы супрацоўнік Інстытута мікрабіялогіі НАН Беларусі Ганна БАРЭЙКА засяродзіла ўвагу на тым, што сёлета, у адрозненне ад папярэдняга года, вялікая ўвага будзе аддадзена гуманітарным навукам:

— Асабліва гісторыі нашай краіны, у прыватнасці, Мінска. Мы сабралі вельмі цікавыя праекты, запрасілі маладых акадэмічных вучоных, універсітэцкіх лектараў. Выступяць вядомыя ў галіне навукі замежныя і беларускія спікеры. Будуць весціся дыскусіі па розных кірунках, напрыклад, у галіне медыцыны — пра неабходнасць прышчэпак, анкалагічныя захворванні, касмічную медыцыну і біяхакінг. Ахвотныя змогуць паслухаць аб распрацоўках у галіне генетыкі, мікрабіялогіі, тэхналагічных адкрыццях.

Вядучы спецыяліст галоўнага ўпраўлення міжнароднага навукова-тэхнічнага супрацоўніцтва апарату НАН Аляксандр ЗАЙЦАЎ адзначыў, што сёлета «Фестываль навукі» будзе больш маштабны, чым леташні.

— Мы паклапаціліся аб тым, каб запрошаныя лектары выкладалі свае думкі даступна для гасцей любога ўзросту. Будзе шмат стартапаў, распрацовак маладых навукоўцаў, а таксама студэнтаў розных ВНУ. Пацешаць гасцей навуковыя забавы: «Мазгабойня», музей займальных навук «Квантум», праект «Разумны Мінск», музей навук «Элементы», дзіцячая навуковая студыя «Экалабараторыя». Можна будзе паслухаць лекцыі ад вядучых адукацыйных праектаў — лекторый «Масаракш», «Трыбуна вучонага», «Навука не ў сабе», «TED». Для аматараў падрыхтаваны «Свет класічнай музыкі», аўтарскі праект прадставіць арганізацыя «Ахова птушак Бацькаўшчыны». Цікавым месцам стане «Навука ежы», дзе можна будзе не проста перакусіць, але і даведацца, якія працэсы адбываюцца з прадуктамі харчавання падчас іх гатавання, самім паэксперыментаваць з імі.

Алесь Зайцаў адзначыў, што для фестывалю плануецца набраць 70 студэнтаў-валанцёраў. Набор яшчэ не скончаны, так што ўсе ахвотныя могуць паспрабаваць свае сілы, запоўніўшы анкету. Свята пройдзе пад адкрытым небам, пачатак апоўдні, заканчэнне а 20-й гадзіне. Для дашкольнікаў уваход бясплатны, для астатніх — пяць рублёў. Падрабязную праграму можна ўбачыць на афіцыйным сайце фестывалю.

Дар'я ШЛАПАКОВА

Выбар рэдакцыі

Грамадства

Хворым на фенілкетанурыю могуць палепшыць забяспячэнне прадуктамі харчавання

Хворым на фенілкетанурыю могуць палепшыць забяспячэнне прадуктамі харчавання

Міністэрства аховы здароўя адказала на публікацыю «Звязды».

Палітыка

На пасяджэнні ЦВК зарэгістраваны 56 членаў Савета Рэспублікі сёмага склікання

На пасяджэнні ЦВК зарэгістраваны 56 членаў Савета Рэспублікі сёмага склікання

Выбары прайшлі ў прыўзнятай атмасферы, дастойна і з яркімі выступленнямі.

Культура

У Беларусі будзе стварацца археалагічная карта

У Беларусі будзе стварацца археалагічная карта

Калі Скарына прыехаў у Кракаў, і як выглядаў малы Рагвалодавіч.