Вы тут

Аляксандр Лукашэнка: У нас надзвычай добрыя адносіны з Казахстанам


Прэзідэнт Беларусі Аляксандр Лукашэнка сустрэўся з Надзвычайным і Паўнамоцным Паслом Рэспублікі Казахстан Ермухаметам Ертысбаевым, які завяршае сваю місію ў нашай краіне. 


Фота БЕЛТА

Кіраўінк беларускай дзяржавы адзначыў, што паміж Беларуссю і Казахстанам выбудаваны адносіны, якія дазваляюць шматкроць перавысіць наяўны эканамічны вынік.

— У нас надзвычай добрыя адносіны з Казахстанам, іх можна параўнаць толькі з адносінамі паміж Беларуссю і Расіяй. Мы ўтрох заўсёды былі ініцыятарамі самых лепшых стасункаў паміж народамі, асабліва пасля распаду Савецкага Саюза, — сказаў беларускі лідар. — Заўсёды ініцыявалі інтэграцыйныя працэсы, блізкае супрацоўніцтва ў эканоміцы. Эканоміка — гэта фундамент усяго, без яе няма дыпламатыі і палітыкі. 

Тут Беларусі няма ў чым папракнуць Казахстан, як і наадварот, дадаў Аляксандр Лукашэнка. «Але перспектывы і магчымасці ў нас яшчэ больш важкія, чым вынікі, якіх мы дасягнулі. Вы, як пасол, самі цудоўна разумееце, што з такой прасунутай інтэграцыяй, якая ў нас з вамі існуе, мы не павінны казаць пра мільярд тавараабароту — гэта павінны быць мільярды долараў, і мы гэта можам зрабіць», — выказаў упэўненасць Прэзідэнт.

Аляксандр Лукашэнка не сумняваецца, што пад кіраўніцтвам новага Прэзідэнта Казахстана добрыя адносіны з Беларуссю будуць захаваныя. «Я вельмі добра знаёмы з вашым цяперашнім Прэзідэнтам Касым-аке. Вельмі прыстойны, адукаваны і мной шануемы чалавек. У нас з ім атрымаюцца добрыя адносіны, гэтак жа, як і ў Казахстана з Беларуссю будуць працягнутыя адносіны ў гэтым жа рэчышычы», — сказаў ён. 

Прэзідэнт Беларусі папрасіў перадаць віншаванні і добрыя пажаданні свайму казахстанскаму калегу і пажаданні добрага здароўя былому кіраўніку краіны — Нурсултану Назарбаеву, якога назваў сваім даўнім сябрам, з якім з’едзены не адзін пуд солі. 

Аляксандр Лукашэнка дадаў, што ў бліжэйшы час у яго будзе магчымасць пабываць у Казахстане і абмеркаваць увесь комплекс двухбаковых адносін.

«Мы ў свой час са спадаром Такаевым дамовіліся, што спяшыць не будзем, сур’ёзна прарэвізуем нашы адносіны, выпрацуем план дзеяння на будучыя гады, і думаю, што ў Нур-Султане зацвердзім дарожную карту, але сур’ёзна падрыхтуемся. Для гэтага збяром міжурадавую камісію ў бліжэйшы час, паглядзім на праблемныя пытанні, і выпрацуем далейшыя адносіны», — паведаміў Прэзідэнт. 

Дыпламат прызнаўся, што пакідае Беларусь са змешанымі пачуццямі, бо тут на некаторы час застаецца яго жонка, якая закахалася ў гэтую краіну. 

«З 23 мая, калі мы апошні раз сустаркаліся, прайшло тры месяцы і дзякуючы вам (вялікі вам дзякуй ад нашай краіны) на 40 працэнтаў павялічыўся казахстанскі экспарт у Беларусь, — сказаў Ермухамет Ертысбаеў. — Думаю да канца кастрычніка, калі адбудзецца ваш афіцыйны візіт у Казахстан, гандлёвы баланс яшчэ больш палепшыцца, спадзяюся, вы не будзеце супраць, бо штогод сальда складалася для нас адмоўным ў памеры 750-800 мільёнаў долараў». 

Казахстанскі дыпламат назваў краўніка Беларусі палітыкам з сусветным імем. «Я ужо зрабіў шмат публікацый у казахстанскай прэсе пра беларускую сацыяльна-эканамічную мадэль, цяпер буду рабіць іх яшчэ больш, бо шчыры прыхільнік вашага палітычнага таленту», — прызнаўся ён.

Адносіны паміж Беларуссю і Казахстанам заўсёды будуць брацкімі, сяброўскімі і рэнтабельнымі, выказаў упэўненасць Ермухамет Ертысбаеў журналістам пасля развітальнай сустрэчы з кіраўніком беларускай дзяржавы. 

«У нас наладжана супрацоўніцтва ва ўсіх сферах, у тым ліку гуманітарнай, — дадаў ён. — Адносіны казахска-беларускія — гэта эталон адносін паміж дзяржавамі. Пасля распаду Савецкага Саюза мы — Беларусь і Казахстан — паказалі, як трэба будаваць двухбаковыя брацкія, сяброўскія адносіны». 

Дыпламат паведаміў, што Беларусь і Казахстан — адзіныя дзве краіны ў Садружнасці Незалежных Дзяржаў, якія падпісалі дагавор аб сацыяльна-эканамічным супрацоўніцтве да 2026 года. «Вельмі вялікія задачы былі пастаўленыя перад бізнес-суполкай, перад дзяржаўнымі органамі, перад навукова-тэхнічнай і гуманітарнай інтэлігенцыяй дзвюх краін падчас лістападаўскага візіту 2017 года ў Мінск Нурсултана Абішавіча Назарбаева», — нагадаў ён. 

Пасол пацвердзіў, што ў канцы кастрычніка чакаецца візіт кіраўніка Беларусі ў Казахстан. «Гэты візіт канчаткова замацуе тое стратэгічнае партнёрства, якое намечана, і выведзе на новы якасны этап нашы адносіны», — падкрэсліў Ермухамет Ертысбаеў.

Пра сябе ён паведамііў, што сыходзіць з дзяржаўнай службы на пенсію, але збіраецца займацца актыўнай палітчынай і публіцыстычнай дзейнасцю. 

Да ведама: 

Па выніках мінулага года тавараабарот паміж Беларуссю і Казахстанам дасягнуў 896 мільёнаў долараў (130 працэнтаў да ўзроўню 2017 года), сальда для нашай краіны станоўчае ў памеры 671,4 мільёна долараў. Узаемны гандаль працягнуў рост і сёлета — за шэсць месяцаў года 481,7 мільёна долараў (118,8 працэнтаў да аналагічнага перыяду летась).

Ключавымі пазіцыямі беларускага экспарту ў 2019 годзе сталі трактары і сядзельныя цягачы, малако і малочныя прадукты, смятанковае масла, машыны для ўборкі сельскагаспадарчых культур, калійныя ўгнаенні, мэбля, ялавічына, грузавыя аўтамабілі, сыры і тварог. 

Аснову імпарту з Казахстана сфарміравалі нафтапрадукты, каменны вугаль, нафтавыя газы, баваўнянае валакно, насенне ільну, неапрацаваны алюміній. 
Аб’ём гандлю паслугамі ў апошнія паўтара гады, наадварот, скарачаўся: за 2018 год ён склаўся ў памеры 153,2 мільёна долараў (84,5 працэнта да ўзроўню 2017 года), сёлета за шэсць месяцаў — 48,5 мільёна долараў (89,7% да ўзроўню першага паўгоддзя 2018-га).

Летась значна павялічыўся аб’ём казахстанскіх інвестыцый у эканоміку Беларусі — каля 19 мільёнаў долараў (рост амаль у пяць разоў), але сёлета дынаміка зваротная — зніжэнне амаль у чатыры разы ў параўнанні з першым паўгоддзем 2018-го. 

Беларускія кампаніі маюць у Казахстане свае гандлёвыя плошчы і дылераў. Працуе восем сумесных зборачных вытворчасцяў беларускай тэхнікі і абсталявання. У нашай краіне дзейнічае амаль паўсотні прадпрыемстваў з казахстанскім капіталам, у тым ліку 13 сумесных і 36 замежных.

Урады дзвюх краін распрацавалі дарожную карту развіцця двухбаковага ўзаемадзеяння на два бліжэйшыя гады.

Вольга МЯДЗВЕДЗЕВА

Загаловак у газеце: Перспектывы большыя за вынікі

Выбар рэдакцыі

Грамадства

Карэспандэнт «Звязды» высвятляла, чаму так цёмна на асветленых вуліцах Магілёва

Карэспандэнт «Звязды» высвятляла, чаму так цёмна на асветленых вуліцах Магілёва

Вечарам прайсціся ўздоўж цэнтральнай вуліцы Першамайскай у Магілёве адно задавальненне.

Спорт

Баскетбаліст Бенджамін-Павел Дуду: У Гане мяне называлі белым

Баскетбаліст Бенджамін-Павел Дуду: У Гане мяне называлі белым

Мама Бена — беларуска, тата — ураджэнец Ганы.

Эканоміка

Куды звяртацца, калі грамадзяніну затрымліваюць зарплату?

Куды звяртацца, калі грамадзяніну затрымліваюць зарплату?

Адказ на гэта і іншыя пытанні — у гутарцы з Дзмітрыем Шаўчуком.