Вы тут

Што адбылося за тыдзень у Савеце Рэспублікі?


Беларуска-індыйская праграма для смартфона

У Савеце Рэспублікі абмеркавалі перспектывы супрацоўніцтва з індыйскай фармацэўтычнай карпарацыяй

Старшыня Пастаяннай камісіі Савета Рэспублікі Нацыянальнага сходу Рэспублікі Беларусь па міжнародных справах і нацыянальнай бяспецы Сяргей Рахманаў сустрэўся з прадстаўнікамі індыйскай кампаніі Bіocon Lіmіted на чале са старшым віцэ-прэзідэнтам Аляксандрам Захам, паведамляе прэс-служба верхняй палаты беларускага парламента.

Развіццё фармацэўтычнай прамысловасці — адзін з прыярытэтаў для Рэспублікі Беларусь, падкрэсліў Сяргей Рахманаў. На яго думку, у краіне ёсць неабходны вытворчы і інтэлектуальны патэнцыял для паспяховага развіцця супрацоўніцтва з індыйскімі кампаніямі. «І гаворка ідзе не толькі аб імпарце і экспарце, але і прамысловай кааперацыі, стварэнні сумесных вытворчасцяў і нават кластараў, якія аб'ядналі б прадстаўнікоў бізнесу, навукі і адукацыі. Сумесна мы маглі б працаваць і на рынках трэціх краін», — прапанаваў ён.

Асаблівую ўвагу старшыня Пастаяннай камісіі ўдзяліў назапашанаму ў Беларусі вопыту ў сферах ІT і высокіх тэхналогій. Гэтыя веды і тэхналогіі могуць працаваць і на фармацэўтычную галіну, падкрэсліў ён. З гэтым пагадзіліся і прадстаўнікі Bіocon Lіmіted. У свеце сёння запатрабаваныя такога роду прадукты. У якасці прыкладу яны прывялі праект па распрацоўцы мабільнай праграмы для аўтаматызаванага кантролю стану здароўя інсуліназалежных людзей. «Нам цікавыя падобныя праекты, таму мы з радасцю гатовыя абмеркаваць прапановы беларускага боку, у тым ліку па развіцці мабільных тэхналогій», — заявіў Аляксандр Зах.

У якасці перспектыўнага кірунку ўзаемадзеяння пазначаная таксама транспланталогія. Беларускія трансплантолагі ўжо наведвалі Індыю для абмену вопытам са сваімі замежнымі калегамі. У будучыні гэта супрацоўніцтва можа быць пашыранае.

У час перагавораў бакі ўдзялілі ўвагу пытанням трансферу ў Беларусь індыйскіх тэхналогій па вытворчасці лекавых прэпаратаў для лячэння анкалагічных захворванняў і цукровага дыябету. Размова таксама ішла аб арганізацыі абмену спецыялістамі.

Bіocon Lіmіted — вядучая індыйская біятэхналагічная кампанія, якая вырабляе актыўныя фармсубстанцыі і гатовыя лекавыя сродкі ў такіх тэрапеўтычных сегментах, як дыябеталогія, анкалогія, нефралогія, кардыялогія. Акрамя вытворчай дзейнасці, кампанія займаецца даклінічнымі і клінічнымі даследаваннямі прадуктаў, якія вырабляюцца, і іх дыстрыбуцыяй на сусветным рынку. Прэпараты Bіocon Lіmіted пастаўляюцца больш чым у 70 краін свету.


Культурная спадчына — агульны клопат

Член Пастаяннай камісіі Савета Рэспублікі па адукацыі, навуцы, культуры і сацыяльным развіцці, рэктар Беларускай дзяржаўнай акадэміі музыкі Кацярына Дулава ў якасці ганаровага замежнага госця ўзяла ўдзел у цырымоніі ўрачыстага адкрыцця XІІ Міжнароднага музычнага фестывалю «Шарк тароналары» («Мелодыі ўсходу») у горадзе Самаркандзе (Рэспубліка Узбекістан).

Маштабны музычны форум ва Узбекістане праходзіць на рэгулярнай аснове раз на два гады з 1997 года. Заяўленымі мэтамі і задачамі фестывалю з'яўляецца шырокая папулярызацыя, захаванне і развіццё найлепшых дасягненняў нацыянальнага музычнага мастацтва; выхаванне маладога пакалення ў духу пераемнасці нацыянальных традыцый; далейшае пашырэнне міжнародных творчых сувязяў. Арганізатарамі мерапрыемства выступаюць Міністэрства культуры і спорту Рэспублікі Узбекістан, Нацыянальная тэлерадыёкампанія Узбекістана, Саюз кампазітараў Узбекістана і хакіміят (адміністрацыя) Самаркандскай вобласці. Конкурс праводзіцца пры падтрымцы ЮНЕСКА.

Сёлета фестываль сабраў 340 артыстаў з 75 краін.

У цырымоніі адкрыцця фестывалю бралі ўдзел прэзідэнт Рэспублікі Узбекістан Шаўкат Мірзіёеў, генеральны дырэктар ЮНЕСКА Одры Азуле, афіцыйныя асобы і ганаровыя госці з Выканаўчага камітэта СНД, Расіі, Казахстана, Кыргызстана, Таджыкістана, Туркменістана, Бангладэш, Польшчы, Японіі, Паўднёвай Карэі, Вялікабрытаніі і іншых краін.

Беларускі сенатар у рамках рабочага візіту ў Рэспубліку Узбекістан таксама ўдзельнічала ў міжнароднай канферэнцыі «Захаванне матэрыяльнай і нематэрыяльнай культурнай спадчыны: бягучыя праблемы і стратэгіі іх рашэння», якая праходзіла ў Палацы форумаў Самарканда. Парламентарый падчас культурнай праграмы фестывалю наведала помнікі ЮНЕСКА і дала інтэрв'ю для дзяржаўных СМІ Рэспублікі Узбекістан па пытаннях захавання культурнай спадчыны.

Вольга Мядзведзева

Выбар рэдакцыі

Грамадства

Магілёўская вобласць ушанавала лідараў уборачнай кампаніі

Магілёўская вобласць ушанавала лідараў уборачнай кампаніі

У Дзень работнікаў сельскай гаспадаркі і перапрацоўчай прамысловасці АПК.

Грамадства

Хворым на фенілкетанурыю могуць палепшыць забяспячэнне прадуктамі харчавання

Хворым на фенілкетанурыю могуць палепшыць забяспячэнне прадуктамі харчавання

Міністэрства аховы здароўя адказала на публікацыю «Звязды».