Вы тут

40 гадоў таму пачалася савецкая экранізацыя Артура Конан Дойла


За першы фільм, які адкрыў цэлую серыю кінастужак аб прыгодах знакамітага прыватнага сышчыка Шэрлака Холмса і ягонага сябра, біёграфа і памочніка доктара Ватсана, рэжысёр Ігар Масленнікаў узяўся яшчэ ў 1979 годзе — з падачы сцэнарыстаў, якія здолелі стварыць аднолькава цікавых і яркіх герояў. Да 1986-га выйшла пяць дэтэктыўных фільмаў агульным аб'ёмам у 11 серый, альбо 766 хвілін.


На галоўную ролю зацвердзілі Васіля Ліванава — не адразу, бо акцёр славіўся няпростым характарам, але практычна безальтэрнатыўна. Другога кандыдата ў Холмсы, Аляксандра Кайданоўскага, рэжысёр запрасіў на пробы на ўсякі выпадак, але бачыў сваім героем выключна Ліванава, у якім «адчувалася парода» і які, дарэчы, нават знешне быў падобны да сышчыка з малюнкаў брытанскага мастака, блізкага сябра самога Конан Дойла. Выканаўцу ролі Ватсана давялося шукаць значна даўжэй, бо ніхто не ўяўляў, як той павінен выглядаць. У адным з акцёрскіх альбомаў знайшлося фота Віталя Саломіна з прыклеенымі «армейскімі» вусамі — гэты здымак трапіў на вочы рэжысёру і падаўся таму якраз, што трэба. У верную і адважную гаспадыню дома місіс Хадсан ператварылася Рына Зялёная — нягледзячы на тое, што актрысе было ўжо больш за 75 гадоў і што яе давялося вазіць на здымкі з Масквы, яна выдатна справілася з роляй. Без праблем адшукалі і Марыярці — Віктара Яўграфава, які акрамя запамінальнай знешнасці меў навыкі каскадзёра і захапляўся баявымі мастацтвамі. Што праўда, у карціне Марыярці агучыў Алег Даль, бо ў самога акцёра для зладзейскай аўры сілы голасу не хапала. Не сваім голасам размаўляе і інспектар Лестрэйд — Барыслаў Брандукоў, украінскае маўленне якога ўмела замаскіраваў дублёр з «Ленфільма» Ігар Яфімаў.

Стужку здымалі пераважна ў павільёнах «Ленфільма» (адну толькі гасцёўню ўзводзілі і абстаўлялі наноў чатыры разы, бо фільмы здымаліся з перапынкамі), а таксама на вуліцах Ленінграда, Рыгі і Таліна, а яшчэ на Каўказе — тут у Абхазіі на Гегскім вадаспадзе знайшлі натуру для ракавога паядынку сышчыка і геніяльнага ліхадзея, прафесара Марыярці. Лондан у гэты спіс, зразумела, не трапіў — тым не менш атмасферу дома на Бейкер-стрыт, 221Б удалося стварыць і сіламі савецкіх кінематаграфістаў. Адзіны насамрэч англійскі эпізод ва ўсім серыяле — панарамныя здымкі Тэмзы, якія па просьбе рэжысёра зрабілі і перадалі карэспандэнты Цэнтральнага тэлебачання ў Вялікабрытаніі.

Васіль Ліванаў і Віталь Саломін пасябравалі не толькі на экране, але і ў жыцці — сяброўскія стасункі падтрымлівалі і іх сем'і ажно да трагічнай смерці Саломіна ў 2002 годзе. У 2007-м акцёры зноў паўсталі разам — у бронзе, у выглядзе скульптурнай кампазіцыі на Смаленскай набярэжнай Масквы. А ў 2012-м аўтарытэтнае выданне Thе Tеlеgrарh склала спіс дзесяці найлепшых Ватсанаў усіх часоў — Віталь Саломін у ім на другім месцы. Ну і, канешне, як не згадаць аб прэстыжнай ўзнагародзе, Ордэне Брытанскай імперыі, якой быў адзначаны «наш» Холмс!

Сказана!

  • «Капернік... Знаёмае прозвішча, што ён зрабіў?»
  •  — Дарагі Холмс, вы вялікі сышчык!
  • — Дарагі Ватсан, я заўжды вам гэта гаварыў!
  • «Наогул, доктар, я стараюся не глядзець, хто прыходзіць, хто сыходзіць... І вам не раю».
  •  «Не, сапраўды скаціна! Уварваўся ў дом, наслядзіў, сапсаваў добрую рэч!»
  •  — Вы хочаце сказаць, што не чытаеце раманаў? Гэта ж Дзікенс!
  •  — Не чытаў, не чытаю і не збіраюся чытаць. Я наогул не люблю белетрыстыку.

Загаловак у газеце: «Элементарна, Ватсан!»

Выбар рэдакцыі

Грамадства

Галiна Левіна: Помнiк — не канструктар i не чарцёж, яго трэба перажыць, выпакутаваць

Галiна Левіна: Помнiк — не канструктар i не чарцёж, яго трэба перажыць, выпакутаваць

У архiтэктара Галiны Левiнай — Хатынь, творчая спадчына яе бацькi.

Грамадства

Прэмiя прыгажосцi. Дзеля чаго людзi кладуцца пад нож пластычнага хiрурга?

Прэмiя прыгажосцi. Дзеля чаго людзi кладуцца пад нож пластычнага хiрурга?

Як сведчаць шматлiкiя даследаваннi, прывабным людзям прасцей прабiцца ў жыццi i яны дасягаюць у кар'еры большага поспеху. 

У свеце

Як Еўропа аднаўляецца ад кавiднага ўдару?

Як Еўропа аднаўляецца ад кавiднага ўдару?

Сёлета еўрапейская эканомiка будзе перажываць глыбокую рэцэсiю з-за ўспышкi каранавiруса, нягледзячы на хуткiя i ўсёабдымныя антыкрызiсныя меры як на саюзным, так i на нацыянальным узроўнi.

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.