Вы тут

Друкарскі «зубр» у Маскве


Сёлета Беларусь у якасці афіцыйнага Ганаровага госця запрошана да ўдзелу ў 32-й Маскоўскай міжнароднай кніжнай выстаўцы-ярмарцы, якая адкрылася 4 верасня. Званне накладае пэўныя абавязкі, выклікае павышаную ўвагу да прадстаўлення краіны: з якімі ідэямі і думкамі мы на вялікай пляцоўцы? У чым адрозненне ад мінулага года? Плошчу ў 222 квадратныя метры трэба запоўніць не толькі кнігамі і кніжнымі праектамі, але і цікавымі падзеямі.


Фота БЕЛТА

Як адзначыў напярэдадні фэсту намеснік міністра інфармацыі Рэспублікі Беларусь Ігар Бузоўскі, канцэпцыя беларускіх удзельнікаў выстаўкі тая ж, што і на сёлетняй кніжнай выстаўцы ў Мінску — тэма малой радзімы, якая была і застаецца актуальнай: і па колькасці наведвальнікаў, і па камерцыйным складніку гэта стала зразумела яшчэ з вынікаў працы на мінскім форуме. Забудова каля стэнда сімвалізуе Год малой радзімы і беларускую гасціннасць...

На прэзентацыйна-выставачнай пляцоўцы — праект Уладзіміра Ліхадзедава «У пошуках страчанага» пад сэнсавай нагрузкай «25 гадоў беларускай дзяржаўнасці — 25 кніг». У выданнях сабраны ўнікальныя калекцыі паштовак, якія адлюстроўваюць і мінулае, і сучаснасць. Праект дапоўнены скульптурнай кампазіцыяй зубра, змантаванага са старых друкарскіх станкоў, — як сімвал і аснова ведаў, буквара, Бібліі і ўсяго, што сёння ўвасабляе паняцце дзяржаўнасці. На Дні беларускага пісьменства зубр гэты ўжо вабіў наведнікаў, выклікаючы пэўныя алюзіі і асацыяцыі з гістарычнымі падзеямі краіны.

Пляцоўка для гандлю: беларуская кніга нязменна выклікае цікавасць у расійскага чытача. Сёлетнім пакупнікам шанцуе: кожны з іх мае магчымасць аддрукаваць старонку скарынаўскай Бібліі на станку па тэхналогіях ХVI стагоддзя.

Асноўная справа на выстаўцы — прэзентацыя айчынных выдавецтваў, якія працуюць над вырашэннем сацыяльна значных пытанняў падтрымкі культуры.

Праграма ўдзелу Беларусі ў выстаўцы прадугледжвае тэматычныя дні: «Усе госці — у дом»; дзень, прысвечаны міжнароднаму супрацоўніцтву, яшчэ дзень — 75-годдзю вызвалення Беларусі ад нямецка-фашысцкіх захопнікаў (агульная для абодвух народаў тэма). Трэці дзень праходзіць пад назвай «Наша радзіма — Беларусь» і прысвечаны малой радзіме: прэзентацыі іміджавых кніг, расповеды аб турыстычным патэнцыяле нашай краіны, аб тым, як жылі нашы продкі: у якія касцюмы апраналіся, якія стравы любілі гатаваць. Чацвёрты дзень аўтарскі. «Мы хочам паказаць, што ў нас ёсць творцы, якія пішуць цікавыя захапляльныя і пазнавальныя кнігі, — падзялілася задумкамі дырэктар выдавецтва “Народная асвета” Вікторыя Калістратава. — Пройдуць прэзентацыі Людмілы Рублеўскай і Наталлі Батраковай. Нават касманаўт Пётр Клімук абяцаў прыйсці на выстаўку, каб падтрымаць удзельнікаў!» Пяты дзень будзе прысвечаны працы з чытачамі: кожны зацікаўлены зможа няспешна пагартаць кнігу, пачытаць урывак з твора на стэндзе. Чакаецца шмат мультымедыйных прэзентацыйных праектаў.

Сёлета ў выстаўцы бяруць удзел і музейныя ўстановы: Дзяржаўны музей гісторыі беларускай літаратуры, Дзяржаўны літаратурны музей Янкі Купалы, Дзяржаўны літаратурна-мемарыяльны музей Якуба Коласа, а таксама замкавы комплекс Міру, у якіх — свае праграмы і праекты. Не засталіся ўбаку Нацыянальная бібліятэка Рэспублікі Беларусь, Прэзідэнцкая бібліятэка.

Дарэчы, калі летась кніжная выстаўка зачынялася ў 18.00, то гэтым разам яе дзверы расчынены да 20.00, каб пасля працоўнага дня яе мог наведаць кожны масквіч і, зразумела, госць сталіцы!

Яна БУДОВІЧ

Выбар рэдакцыі

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.

Калейдаскоп

Вясёлыя гісторыі чытачоў

Вясёлыя гісторыі чытачоў

Класiкаў трэба ведаць…, Быў бы араты, будзе й прыганяты, Па малiну…

Эканоміка

«Мы выказалi прапановы, i нас пачулi». Як дзяржаўныя прэферэнцыi дапамагаюць падтрымаць суб'ектаў гаспадарання

«Мы выказалi прапановы, i нас пачулi». Як дзяржаўныя прэферэнцыi дапамагаюць падтрымаць суб'ектаў гаспадарання

У бiзнес-колах Гродзеншчыны лiчаць, што меры па падтрымцы эканомiкi з'явiлiся своечасова.