Вы тут

Як сёння наладжана служба вартавых парадку ў сельскай мясцовасці?


Міліцыянер на вёсцы — чалавек вядомы і паважаны. Менавіта да яго месцічы звяртаюцца па розных пытаннях. Абмежаванняў амаль няма! Усё ведае, з усім дапаможа, усюды паспее.

Пра тое, як сёння наладжана служба вартавых парадку ў сельскай мясцовасці, мы пагутарылі з намеснікам начальніка ўпраўлення — начальнікам аддзела арганізацыі работы ўчастковых інспектараў міліцыі ўпраўлення прафілактыкі ГУАПП МУС палкоўнікам міліцыі Сяргеем Красуцкім.


— Што ўваходзіць у абавязкі сельскага ўчастковага?

— Абавязкі сельскіх і гарадскіх участковых інспектараў міліцыі — аднолькавыя, спецыфіка работы — розная.

Да асноўных абавязкаў адносяцца: прафілактыка бытавых правапарушэнняў і п'янства, папярэджанне крадзяжоў маёмасці.

Калі ў гарадскога інспектара насельніцтва сканцэнтравана кропкава, у 5—10 шматпавярховых дамах, то ў сельскага — гэта 15—20 вёсак. Даўжыня адміністрацыйнага ўчастка можа складаць каля 50 кіламетраў.

Цяпер у невялікіх населеных пунктах жывуць пераважна людзі сталага веку. Не ўсе ўмеюць карыстацца мабільнай сувяззю, інтэрнэтам, не заўсёды маюць стацыянарны тэлефон. Таму да ўчастковага нярэдка звяртаюцца па зямельных, жыллёва-бытавых пытаннях.

Праваахоўнік у вёсцы шмат працуе з сельскагаспадарчымі прадпрыемствамі. Тут таксама ёсць свае асаблівасці і складанасці.

— З якімі правапарушэннямі часцей за ўсё сутыкаецца міліцыянер на вёсцы?

— За 8 месяцаў 2019 года ў сельскай мясцовасці зарэгістравана 7257 крадзяжоў (44,5 % ад усіх правапарушэнняў, зафіксаваных у вёсках). Пажылыя людзі вельмі даверлівыя і нярэдка, самі таго не разумеючы, запускаюць у сваё жыллё ашуканцаў. Участковыя пастаянна праводзяць прафілактычныя гутаркі з пенсіянерамі, тлумачаць, што трэба рабіць, калі «ў госці» завіталі незнаёмцы.

Больш за траціну ўсіх «бытавых» злачынстваў (39,6 %) налічваецца ў сельскай мясцовасці.

— Наколькі часта ўчастковымі інспектарамі становяцца выхадцы з гэтага ж раёна?

— Такой статыстыкі ў нас няма. Але, канешне, добра, калі міліцыянер выдатна ведае тэрыторыю свайго адміністрацыйнага ўчастка і яго жыхароў. З іншага боку, часам цяжка правесці мяжу паміж асабістым стаўленнем да чалавека, з якім, напрыклад, вырас у адным двары, і службовымі абавязкамі.

Мы выступаем больш за тое, каб участковы жыў у тым населеным пункце, дзе нясе службу. Мясцовая ўлада ўсяляк падтрымлівае гэта — выдзяляе жыллё.

— Як дзеліцца плошча раёна сярод участковых?

— Зыходзім з колькасці насельніцтва, наяўнасці транспарту для інспектараў. У ідэале, разлік ідзе — адзін вартавы парадку на паўтары тысячы жыхароў. Акрамя гэтага, улічваюцца і мясцовыя ўмовы. Напрыклад, калі гэта адзін сельсавет і людзей больш, то стараемся, каб яго абслугоўваў адзін міліцыянер.

— Ці змяняўся круг прафесійных абавязкаў участковых з цягам часу?

— Карэктуюцца не абавязкі, удасканальваюцца падыходы да іх выканання. У 2014 годзе быў прыняты закон «Аб асновах дзейнасці па прафілактыцы правапарушэнняў». З'явіліся механізмы, якія дазволілі ўплываць на бытавую злачыннасць. Напрыклад, ахоўнае прадпісанне. Згодна з ім, міліцыянер мае права на тэрмін да 30 сутак ізаляваць з агульнага жылля сямейнага дэбашыра.

Працуем над унутрыведамаснымі падыходамі. Напрыклад, участковыя не разглядаюць заявы, якія датычацца кірунку па барацьбе з эканамічнай злачыннасцю і супрацьдзеянні гандлю людзьмі. Мінімізуем прыцягненне нашых супрацоўнікаў на дзяжурствы ў райаддзеле. Усё для таго, каб міліцыянер больш часу знаходзіўся на сваім адміністрацыйным участку, кантактаваў з людзьмі. Гэта важна. Асабліва ў сельскай мясцовасці. У 90 % выпадкаў у вёсцы на выклік ад жыхароў першым прыязджае менавіта ўчастковы. Нярэдка яму тэлефануюць напрамую.

— Што ўяўляе сабой эксперымент з «універсальнымі міліцыянерамі», які праводзіцца зараз у некаторых раённых аддзелах міліцыі?

— Вартавыя парадку надзяляюцца адначасова паўнамоцтвамі супрацоўнікаў крымінальнага вышуку, участковых і інспектараў па справах непаўналетніх. Такім чынам, праваахоўнікі адказваюць за ўсё, што адбываецца на адміністрацыйным участку. Гэта дазваляе паменшыць і раўнамерна размеркаваць нагрузку на супрацоўнікаў. Вопыт падказвае, што ў сельскай мясцовасці, дзе шчыльнасць насельніцтва невялікая, глыбокая спецыялізацыя кожнай з гэтых службаў не патрабуецца.

Казаць пра канчатковыя вынікі эксперымента яшчэ рана, але на сёння ўжо можна выдзеліць станоўчыя бакі новаўвядзення.

— Участковыя па спецыфіцы сваёй работы шмат кантактуюць з людзьмі. Ці заканчваюць яны якія-небудзь курсы па псіхалогіі, напрыклад?

— Мы імкнёмся да таго, каб нашы супрацоўнікі мелі сур'ёзную псіхалагічную падрыхтоўку. Кожны праваахоўнік з пэўнай перыядычнасцю адпраўляецца на курсы павышэння кваліфікацыі пры Акадэміі МУС, Магілёўскім інстытуце МУС. Участковыя вучацца не толькі таму, як кантактаваць з людзьмі, але і як паводзіць сябе ў экстраннай сітуацыі на службе.

— Вы згодныя з тым, што калі прайшоў «школу» ўчастковых — усе дзверы ў органах правапарадку адкрытыя?

— Так, менавіта гэта падраздзяленне ў міліцыі многія лічаць кузняй кадраў. Участковы інспектар — гэта ўніверсальны спецыяліст. Такія супрацоўнікі хутка падымаюцца па кар'ернай лесвіцы, маюць высокія званні. Але ў нас ёсць і тыя, хто служаць участковымі каля 20 гадоў! Кіраўніцтва даражыць такімі кадрамі.

Кацярына АСМЫКОВІЧ

Выбар рэдакцыі

Грамадства

«Да штыка ён пяро прыраўняў». Узгадваем ваеннага карэспандэнта Канстанціна Сіманава

«Да штыка ён пяро прыраўняў». Узгадваем ваеннага карэспандэнта Канстанціна Сіманава

28 лістапада 2020 года спаўняецца 105 гадоў з дня нараджэння вядомага рускага пісьменніка, ваеннага карэспандэнта і журналіста Канстанціна Сіманава. 

Грамадства

«Калі б не сям'я Абрамукоў, наш род перастаў бы існаваць яшчэ ў 1941 годзе». Расіянка з Ніжняга Ноўгарада знайшла ў беларускай вёсцы сваякоў

«Калі б не сям'я Абрамукоў, наш род перастаў бы існаваць яшчэ ў 1941 годзе». Расіянка з Ніжняга Ноўгарада знайшла ў беларускай вёсцы сваякоў

І аднавяскоўцаў людзей, якія ў час вайны ратавалі сям'ю яе бабулі, жонкі афіцэра Чырвонай Арміі.

Спорт

«Вікторыя», якая робіць з Гродна баскетбольную сталіцу

«Вікторыя», якая робіць з Гродна баскетбольную сталіцу

Гродна — горад з багатай не толькі культурнай, але і баскетбольнай гісторыяй. 

Грамадства

У Гродне жыхары кватэр адмовіліся падчас капітальнага рамонту здымаць аздабленне з балконаў. На іх падалі ў суд

У Гродне жыхары кватэр адмовіліся падчас капітальнага рамонту здымаць аздабленне з балконаў. На іх падалі ў суд

Такога кшталту справа ў судзе Кастрычнiцкага раёна Гродна разглядаецца ўпершыню.