Вы тут

Дом гандбола адкрыўся ў Мінску


Новы спартыўны цэнтр размясціўся па вуліцы Бурдзейнага ў Фрунзенскім раёне, які небагаты на спартыўныя збудаванні. Будаўніцтва комплексу пачалося ў верасні 2017 года, а ўведзены ў эксплуатацыю ён быў ужо 29 снежня 2018 года.


Фота Ганны ЗАНКАВІЧ.

Ініцыятарам будаўніцтва цэнтра стала Беларуская федэрацыя гандбола, якая лічыць, што з'яўленне профільнага аб'екта ў густанаселеным раёне сталіцы дазволіць сур'ёзна палепшыць сітуацыю з рэзервам, папулярызаваць гандбол і ўдасканаліць сістэму падрыхтоўкі спартсменаў высокага класа па гандболе на ўзроўні вышэйшага звяна. На ўрачыстай цырымоніі адкрыцця Дома гандбола прысутнічалі ганаровыя госці: кіраўнік Адміністрацыі Прэзідэнта Максім Рыжанкоў, старшыня Мінгарвыканкама Анатоль Сівак, легендарны айчынны трэнер Спартак Мірановіч, алімпійскія чэмпіёны Аляксандр Каршакевіч, Юрый Шаўцоў, Канстанцін Шаравараў, Андрэй Барбашынскі, шасціразовы пераможца Лігі чэмпіёнаў Сяргей Рутэнка, а таксама міністр спорту і турызму краіны Сяргей Кавальчук, старшыня Федэрацыі гандбола Беларусі Уладзімір Канаплёў і старшыня Міжнароднай федэрацыі гандбола Хасан Мустафа.

Сяргей Кавальчук выказаў упэўненасць у тым, што новы спартыўны аб'ект дазволіць айчыннай школе гандбола зрабіць якасны крок наперад. «Апошнім часам Мінск становіцца арэнай для важных міжнародных падзей, такіх як Еўрапейскія гульні або лёгкаатлетычны матч Еўропа — ЗША. Адкрыццё Дома гандбола — не такое маштабнае мерапрыемства, аднак для развіцця беларускага спорту ў цэлым і гандбола ў прыватнасці яно не менш істотнае. Сваімі гучнымі перамогамі на міжнароднай арэне нашы гандбалісты заслужылі з'яўленне такога аб'екта», — адзначыў міністр.

Комплекс уключае гульнявую пляцоўку плошчай 1,2 тыс. кв. м з трыбунамі на 250 гледачоў, трэнажорную залу, залу гімнастыкі, адміністрацыйны корпус з душавымі, распранальнямі, пакоямі трэнераў. Гандбольны цэнтр разлічаны для трэніровак як дзіцячых камандаў, так і нацыянальных зборных. Яго паркет, які, дарэчы, выбіраў сам Сяргей Рутэнка, ужо апрабавала мужчынская зборная краіны. Уладзімір Канаплёў адзначыў, што падобнае пакрыццё было выкарыстана на Алімпійскіх гульнях, яно бяспечнае для спартсменаў і зніжае магчымасць атрымання траўмы. «Пабудаваць аб'ект было няпроста, ён каштаваў тры з невялікім мільёны долараў, хоць было разлічана, што давядзецца выдаткаваць на яго больш за чатыры мільёны. Гэта значыць, у нас яшчэ засталіся грошы на тое, каб мы змаглі пабудаваць комплекс для гульні ў пляжны гандбол. Ён якраз будзе каштаваць крыху больш за мільён долараў», — расказаў Уладзімір Мікалаевіч.

Невыпадкова, што на адкрыцці Дома гандбола ў Мінску пабывалі кіраўнік Міжнароднай федэрацыі Хасан Мустафа і генеральны сакратар Еўрапейскай гандбольнай федэрацыі Марцін Хаўстляйнэр. У 2026 годзе Мінск разлічвае правесці чэмпіянат Еўропы па гандболе, сустрэча Сяргея Кавальчука з гасцямі — першы крок у гэтым кірунку. Хасан Мустафа і Марцін Хаўстляйнэр азнаёміліся з інфраструктурай Мінска і падзяліліся сваімі цёплымі ўражаннямі ад нашай краіны. «Я быў у Мінску 12 гадоў таму і цяпер уражаны ўбачаным. Мінск змяніўся, і я віншую Беларусь з тым, што тут з'явіліся такія добрыя ўмовы для жыцця і заняткаў спортам. Ведаю, што ў вашай краіне прайшло шмат буйных турніраў, я ўпэўнены, у далейшым колькасць такіх падзей будзе толькі павялічвацца», — адзначыў Хасан Мустафа.

Дар'я ЛАБАЖЭВІЧ

Загаловак у газеце: Паркет для Алімпіяды, умовы для чэмпіёнаў

Выбар рэдакцыі

Грамадства

Фітнес-трэнер для матуль у дэкрэце Святлана Немірка распавядае пра сакрэты прафесіі

Фітнес-трэнер для матуль у дэкрэце Святлана Немірка распавядае пра сакрэты прафесіі

Актыўная мама — гэта не толькі трэнд, але і жыццёвая неабходнасць у сучасным свеце.

Грамадства

«Тата вернецца, калі ападуць усе лісцікі». Чаму сямейная падтрымка неацэнная для салдата

«Тата вернецца, калі ападуць усе лісцікі». Чаму сямейная падтрымка неацэнная для салдата

Трывалая сувязь з блізкімі і роднымі вельмі важная для чалавека, які служыць у войску. 

Грамадства

Як у Магілёве, Баранавічах і Чавусах рэалізуецца праект камунальнага кіравання ў гарадах

Як у Магілёве, Баранавічах і Чавусах рэалізуецца праект камунальнага кіравання ў гарадах

Мэта праекта — на прыкладзе трох беларускіх гарадоў паказаць, як можна палепшыць сістэму кіравання гарадской гаспадаркай.

Грамадства

Азбука прафесій: балерына Таццяна Уласень пра кар'еру і сям'ю

Азбука прафесій: балерына Таццяна Уласень пра кар'еру і сям'ю

Разам з 9-гадовай дачкой раскрывае сакрэты.