Вы тут

Каля 3,7 мільёна чалавек сёлета плануецца прышчапіць у Беларусі ад грыпу


Вакцынацыя пачнецца ўжо з кастрычніка, каб да студзеня—лютага, калі вірус становіцца найбольш актыўным, сфарміраваўся імунітэт. Абавязкова прышчэпкі атрымаюць людзі з груп рызыкі — дзеці і пажылыя, пацыенты з цяжкімі хранічнымі захворваннямі, медработнікі і іншыя.


— Вакцынацыю пачнём, як толькі вакцына выйдзе з лабараторнага кантролю. Магчыма, нават у канцы верасня. Для фарміравання імунітэту неабходна ад 7 да 21 дня, — расказвае загадчык аддзялення імунапрафілактыкі Рэспубліканскага цэнтра гігіены, эпідэміялогіі і грамадскага здароўя Вераніка ВЫСОЦКАЯ.

Імунітэт захоўваецца на 6—12 месяцаў, таму, нават калі вы прышчапляліся супраць грыпу летась, сёлета працэдуру варта паўтарыць. Тым больш што цяпер склад вакцын прыйшлося абнавіць з-за мутацый вірусаў групы А.

— Сусветная арганізацыя аховы здароўя адсочвае, якія вірусы грыпу цыркулююць на планеце, каб высветліць іх антыгенныя характарыстыкі і зразумець, якую вакцыну прымяняць. Звычайна рэкамендацыі на наступны сезон даюць у лютым, бо каб напрацаваць неабходны аб'ём вакцыны, патрэбна тры месяцы. Сёлета Сусветная арганізацыя аховы здароўя ўпершыню ўзяла паўзу, і толькі ў канцы сакавіка мы атрымалі рэкамендацыі. Бо вірусы групы А, сустракаючыся з імуннай праслойкай чалавека, муціравалі. Таму вакцына супраць іх была зменена. Прагназуецца, што ў нас па-ранейшаму будуць цыркуляваць вірусы групы А — H1N1 і H3N2 і вірусы групы В, — паведаміла кіраўнік Нацыянальнага цэнтра па грыпе РНПЦ эпідэміялогіі і мікрабіялогіі Наталля ШМЯЛЁВА.

Вакцынацыя ў гэтым сезоне будзе праводзіцца, як і летась, трохвалентнай і чатырохвалентнай вакцынамі. За кошт сродкаў рэспубліканскага і мясцовага бюджэтаў прышчапляць будуць расійскай вакцынай «Грыпол плюс» (ужо закуплена 1,5 мільёна доз па 1,5—2 рублі), за сродкі прадпрыемстваў і грамадзян — вакцынамі «Ваксігрып», «Ваксігрып тэтра» (Францыя), «Інфлювак» (Нідэрланды). Каштаваць такая прышчэпка трохвалентнай вакцынай будзе ў сярэднім ад 10 да 18 рублёў.

На думку спецыялістаў, вырабляць уласную вакцыну ў Беларусі немэтазгодна.

— У нас невялікая краіна. А працэс вытворчасці вакцыны дастаткова затратны. Каб вырабляць такую прадукцыю, патрэбны выхад на іншыя рынкі, а яны ўжо заняты. Каб вытворчасць вакцыны ў Беларусі акупілася, патрэбна не менш за 50 гадоў, — выказала меркаванне намеснік начальніка аддзела гігіены, эпідэміялогіі і прафілактыкі Міністэрства аховы здароўя Іна КАРАБАН.

Каля 40 % насельніцтва зрабілі прышчэпкі ад грыпу летась. У тым ліку
75 % з груп рызыкі.

— Мы прышчапілі каля 3,7 мільёна чалавек, у тым ліку 950 тысяч дзяцей. Эфектыўнасць сучаснай вакцыны ад грыпу складае ад 70 да 98 %. Гэта значыць з сотні прышчэпленых 70—98 чалавек не захварэе, — тлумачыць Вераніка Высоцкая. — Тыя, хто захварэў, маюць лёгкае цячэнне грыпу. Мы прааналізавалі мінулы сезон: сярод прышчэпленых захваральнасць у 12,3 раза ніжэйшая, чым у тых, хто не вакцыянаваўся. А 98,2 % з тых, хто захварэў на грып, прышчэпку не рабілі.

Спецыяліст паведаміла, што пяты сезон у Беларусі няма эпідэміі грыпу. Захваральнасць складае 10—16 чалавек на 100 тысяч насельніцтва.

Толькі вакцынацыя з'яўляецца спецыфічнай прафілактыкай грыпу. Неспецыфічныя сродкі ў барацьбе з інфекцыяй — стандартныя правілы здаровага спосабу жыцця. Гэта захаванне рэспіраторнага этыкету, каб не дапусціць распаўсюджання віруса; выкарыстанне аднаразовых папяровых насовак. У сезон пад'ёму захваральнасці лепш не знаходзіцца ў месцах збору людзей, не наведваць масавыя мерапрыемствы, па магчымасці не ездзіць у грамадскім транспарце. Часцей мыць рукі, паласкаць поласць рота і прамываць нос, паболей знаходзіцца на свежым паветры і часцей праветрываць пакой. Лекавыя метады прафілактыкі варта выкарыстоўваць толькі па рэкамендацыі ўрача. Імунастымулятары не прайшлі клінічныя выпрабаванні, і іх эфектыўнасць не даказана. Толькі ўрач можа меркаваць, што ў вас маецца імунадэфіцыт, і прызначыць такія сродкі.

— Мяне заўсёды здзіўляюць маладыя матулі, якіх у сезон захваральнасці ў аптэцы шмат, і яны ўсе набываюць імунамадулятары. Вы не ведаеце, у якім стане зараз знаходзіцца імунная сістэма дзіцяці, і тут важна не нашкодзіць. Дапамагчы такія сродкі наўрад ці змогуць, — падкрэсліла Іна Карабан.

Алена КРАВЕЦ

Загаловак у газеце: Сезон захваральнасці не за гарамі

Выбар рэдакцыі

Грамадства

Як пенсіянерка з Гомеля купіла набор каструль па цане патрыманай іншамаркі

Як пенсіянерка з Гомеля купіла набор каструль па цане патрыманай іншамаркі

Усё, як у казцы: прыгожая зала, музыка, пачастункі. Абаяльныя людзі распавядаюць аб правільным харчаванні і рэкламуюць свой тавар...

Грамадства

714 тысяч тон адходаў для перапрацоўкі сабралі летась беларусы

714 тысяч тон адходаў для перапрацоўкі сабралі летась беларусы

Гэта адходы шкла, паперы, пластыку, шын, батарэек, машыннага масла...

Грамадства

​Дзе прызначалі спатканні ў даваенным Мінску?

​Дзе прызначалі спатканні ў даваенным Мінску?

Атрымаць падказкі вам дапаможа экскурсія «Рамантыка мінскіх дворыкаў».