У сераду ў зале Перамогі Музея гісторыі Вялікай Айчыннай вайны пяць афіцэраў і два прадстаўнікі грамадзянскага персаналу атрымалі з рук міністра абароны Андрэя Раўкова дзяржаўныя ўзнагароды. Адпаведны ўказ 24 ліпеня падпісаў Аляксандр Лукашэнка.
Сярод іх - старшы лейтэнант Дзмітрый Філіповіч, камандзір вучэбнай мотастралковай роты 307-й гвардзейскай школы падрыхтоўкі спецыялістаў мотастралковых і дэсантных падраздзяленняў 72-га гвардзейскага аб'яднанага вучэбнага цэнтра падрыхтоўкі прапаршчыкаў і малодшых спецыялістаў. Ён узнагароджаны ордэнам "За асабістую мужнасць".
...14 сакавіка гэтага года ў Пячах адбылася надзвычайная сітуацыя. Падчас заняткаў па агнявой падрыхтоўцы салдат выпусціў з рук баявую наступальную гранату РГД-5. Дзмітрый Філіповіч, які кіраваў заняткамі, выкінуў свайго падначаленага за межы акопа і закрыў яго сваім целам. Абодва вайскоўцы атрымалі тады раненні мяккіх тканак ног і былі шпіталізаваны.
Сёння, крыху больш чым праз паўгода пасля тых падзей, Дзмітрый Філіповіч згадвае, праз што яму давялося прайсці:
- З раніцы пачаліся планавыя заняткі. Усё ішло як мае быць - і ў нейкі момант граната паляцела ў акоп. Салдат выпусціў яе на замаху. Я дзейнічаў па сітуацыі. Загадзя штосьці ў галаве не пракручваў, усё адбылося вокамгненна. Паспрабаваў выкінуць гранату з акопа, але паколькі яго барты былі даволі высокія, зрабіць гэта не атрымалася. Граната ўпала ў куток акопа, што нам і паспрыяла. Я закрыў салдата сваім целам - і граната ўзарвалася. На ўсё было не болей за чатыры секунды. Выбух адбыўся далей, чым у выпадку, калі б я яе не чапаў. Першая думка была - "Што з салдатам?" Усе засталіся жывыя. І я, і той салдат далей праходзім службу ва Узброеных Сілах.
Павел Бацяноўскі скончыў "вучэбку" і па размеркаванні паехаў служыць у 120-ю асобную гвардзейскую механізаваную брыгаду. Вучыўся ён на камандзіра аддзялення.
Таксама Андрэй Раўкоў уручыў ордэн "За службу Радзіме" ІІІ ступені начальніку штаба - першаму намесніку камандуючага войскамі Заходняга аператыўнага камандавання генерал-маёру Руслану Касыгіну, камандзіру 361-й базы аховы і абслугоўвання палкоўніку Андрэю Расюку, начальніку ракетных войскаў і артылерыі - начальніку аддзела ракетных войскаў і артылерыі Паўночна-заходняга аператыўнага камандавання палкоўніку Руслану Чэхаву. Ордэнам "Пашаны" ўганараваны намеснік дырэктара па вытворчасці і кіраванні якасцю РУП "Інстытут "Ваенпраект" Сяргей Паўленка. Дырэктар гэтага ж прадпрыемства Сяргей Карпаў атрымаў ганаровае званне "Заслужаны будаўнік Рэспублікі Беларусь". А начальнік Галоўнага штаба - першы намеснік камандуючага Ваенна-паветранымі сіламі і войскамі проціпаветранай абароны Сяргей Трус узнагароджаны званнем "Заслужаны спецыяліст Узброеных Сіл Рэспублікі Беларусь".
Валяр'ян ШКЛЕННІК
Фота аўтара
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
