Вы тут

Сувязі Беларусі і Наўгародскай вобласці Расіі большыя за проста эканамічныя


Аляксандр Лукашэнка сёння падчас сустрэчы з губернатарам Наўгародскай вобласці Расіі Андрэем Нікіціным назваў такі візіт добрай магчымасцю пазнаёміцца з нашай краінай, ацаніць яе эканамічны і прамысловы патэнцыял, па-новаму зірнуць на перспектывы развіцця двухбаковага супрацоўніцтва.


«Вы ведаеце, што я вельмі вялікую ўвагу надаю супрацоўніцтву Беларусі з рэгіёнамі Расіі. Шчыра кажучы, некаторыя СМІ насцярожвае, што мы часта маем зносіны з кіраўнікамі рэгіёнаў. Павінны вам сказаць, што тут няма ніякай канспіралогіі. Я вельмі часта кажу: калі нехта ў Расіі думае, што гэта іх Расія, яны памыляюцца. Гэта і наша Расія. Да гэтага трэба прывыкаць. Расія — гэта больш чым краіна, а для Беларусі — тым больш. Гэта ідэалогія, і яе з мяне не выбіць», — расставіў кропкі над «і» Прэзідэнт. Ён прапанаваў госцю ставіцца да пэўнай інфармацыі, якую можна прачытаць у некаторых тэлеграм-каналах, як да выдумкі.

Пра палітыку

У прыклад Аляксандр Лукашэнка прывёў сапраўдную «рэвалюцыю», якая паднялася ў расійскіх СМІ ў сувязі з затрыманнем грамадзянкі Расіі, якая трапіла пад санкцыі па справе аб «умяшанні ў выбары прэзідэнта ЗША».

«Чаму пасол Амерыкі ад нас з’ехаў у 2008 годзе? За ўмяшанне ў выбары ў Беларусі. Разумееце? Адкрытае ўмяшанне, удзел у дэманстрацыях і іншае. Я ёй даў суткі, каб яна пакінула нашу краіну з іншымі дыпламатамі. І скажыце, як я пасля гэта павінны ставіцца да ўмяшання ў выбары амерыканскія, нават каб былі? У мяне ўжо выпрацаваны да гэта адпаведны імунітэт», — сказаў кіраўнік краіны.

Аляксандр Лукашэнка нагадаў, што падчас выбараў у ЗША ён адкрыта, публічна падтрымліваў кандыдатуру Трампа. Акрамя таго, у падобных да вышэй прыведзенага выпадку Беларусь і Расія дзейнічаюць як на тэрыторыі адной дзяржавы. Краіны маюць агульную сістэму, якая адмысловым чынам адзначае прозвішчы грамадзян пры перасячэнні мяжы ці засяленні ў гасцініцу.

«Вобразна кажу: чырвоны колер, так — паглядзелі. Такі і такі чалавек. Трэба разабрацца, можа, чалавек здзейсніў злачынства. Мы ж не ведаем, бачым толькі прозвішча. Мы і ўдакладнялі, што да чаго. А калі ўбачылі, што нехта — быццам — умешваўся ў амерыканскія выбары... Пасля гэтага размовы не было. Не Лаўроў з Макеем (міністры замежных спраў Расіі і Беларусі, — заўв. „Звязды“), не Пуцін са мной абмяркоўвалі гэту праблему, а я вас шукаў з Беларусі, і вы мне праз тры хвіліны патэлефанавалі», — растлумачыў беларускі лідар.

Ён падкрэсліў, што «накрутка» пачалася з боку расійскіх СМІ, бо на тэрыторыі Беларусі падобных каналаў няма.

«Могуць вяшчаць з Польшчы, з Амерыкі, з Расіі... Не таму, што мы іх гнабім. Не. Таму што проста яны тут не прыжывуцца. Праўда, адзін наш апанент, вельмі сур’ёзны, што мяне здзівіла, сказаў: слухайце, а як беларусы мусілі зрабіць? Павінны былі высветліць, што гэта за чалавек. А тое, што яна будзе адпушчана, не выклікае сумненняў. Так ён сказаў да таго, як высветлілі ўсе абставіны», — падкрэсліў Прэзідэнт.

Адзначыў Аляксандр Лукашэнка і існаванне меркавання, што з расійскага боку падобны выпадак быў спецыальнай «лакмусавай» паперкай, каб праверыць Беларусь на стаўленне да Расіі.

«Калі гэта так у кагосьці, то гэта глупства несусветнае. Нам гэта не трэба. Нам трэба вось так супрацоўнічаць: прыехаў губернатар... Я пры падрыхтоўцы гэтай сустрэчы паглядзеў, у якіх сферах мы можам супрацоўнічаць. Ва ўсіх», — сказаў беларускі лідар.

Пра эканоміку

У прыватнасці, Беларусь гатовая падзяліцца досведам у развіцці сельскай гаспадаркі. Ёй немагчыма займацца без насення і элітнай скаціны — чаго, на погляд Прэзідэнта, ва ўсходняй суседцы не хапае.

«Некалькі год таму я пачаў казаць губернатарам пра гэтыя тэхналогіі, нашы спецыялісты былі. Атрымалі за сорак цэнтнераў ураджайнасць. Я кажу: навошта вучыў, канкурэнта сабе падрыхтаваў у Расіі», — усміхнуўся кіраўнік краіны.

Ён адзначыў, што аграрная галіна ў Беларусі не развалілася пасля Савецкага Саюза дзякуючы таму, што ў Беларусі гэтым працягвалі займацца.

«Ведаем, што элементарна накарміць людзей і апрануць. Тады не разваліцца ні Расія, ні Беларусь. Мы ж Савецкі Саюз развалілі, як я часта кажу, з-за пральных парашкоў. Бедныя жанчыны (ажно перад вачыма ў мяне) стаялі ў чарзе суткамі, каб купіць пральны парашок. А імпартныя — ну гэта ўвогуле мара была! Дык што, мы не маглі ў Савецкім Саюзе пяць-дзесяць фабрык пабудаваць? Ды за паўтара гады пабудавалі бы і забяспечылі бы народ. Але ніхто гэтым не займаўся. Яны далёкія былі, кіраўнікі нашыя, ад гэтага. Вось космас, нейкую стрэльбу новую вынайсці, да. А займацца жыццём людзей ніхто не жадаў. Таму вось наша сфера, дзе мы можам з рэгіёнамі Расіі працаваць», — выказаў меркаванне Аляксандр Лукашэнка.

Па яго перакананні, удалося дасягнуць поспехаў у беларускай аграрнай сферы і дзякуючы захаванню буйных прадпрыемстваў, не паддаўшыся «рыначнай вакханаліі парэзаць усё на шматкі і падзяліць».

«У жывёлагадоўлі, племянной справе, вырошчванні агароднінных культур, аснашчэнні малочна-таварных ферм досвед вялікі. Калі будзе зацікаўленасць, па сходным кошце можам пабудаваць і аснасціць скацінай», — звярнуўся да наўгародскага губернатара Прэзідэнт. У прыклад прывёў комплекс на Сахаліне, створаны беларусамі.

«Фантастычны праект, фантастычны і паспяховы», — адзначыў госць.

Аляксандр Лукашэнка ўпэўнены, што адносіны Беларусі і Расіі захаваныя менавіта дзякуючы стасункам паміж рэгіёнамі. Негледзячы на складанасці, якія ўзнікалі з пастаўкамі газу, нафты. І сёння адносіны не без праблем — але на ладным узроўні. Але і пытанні будуць вырашаныя.

«Нам нельга згубіць адно аднаго. Ні ў якім выпадку. Што, ў вас ёсць больш блізкі саюзнік, чым Беларусь? Больш блізкай краіны за Расію ў нас таксама няма. Таму мы павінны супрацоўнічаць, але гэта не значыць, што селі адно супраць аднаго і глядзім адно на аднаго. Не. Расія, бачу, „турэцкі гамбіт“ нейкі пачалі — там уцягнулі ўсе краіны, Расія таксама ў гэтым удзельнічае, праўда, у выгаднай сітуацыі, як міратворчая краіна», — звярнуўся да міжнародных спраў Прэзідэнт.

Ён адзначыў, што і Беларусь мусіць у рэгіёне бачыць сваіх суседзяў: Украіну, якую лічыць «нашай, блізкай, роднай», Польшчу, краіны Балтыі, увогуле Еўрапейскі Саюз. Аляксандр Лукашэнка заклікаў не глядзець на Беларусь як на ворага, які павярнуўся спіной да Расіі.

«Гэтага ніколі не было і не будзе. Нас асабліва там не чакаюць, таму што перашкода да гэтага з’яўляецца нават не дыктатура Лукашэнкі, а эканоміка. З нашай эканомікай у Еўрасаюзе мы нікому не патрэбныя! Таму што там машынабудаванне не горшае за нашае (усё, акрамя БелАЗаў). Усё астатняе вырабляюць: і малако, і мяса, і іншае. І на рынак нас ніхто не пускаў і не пусціць. Я ўвесь час іх за гэта крытыкую, хаця ў нас прадукцыя, і яны гэта прызнаюць, нашмат лепшая па многіх параметрах»,- падкрэсліў беларускі лідар.

Пры гэтам ён не стаў хаваць, што ў гэтым плане намеціліся праблемы і з Расіяй. Але ў іх вырашэнні кіраўнік Беларусі ўпэўнены — тут, па меншай меры, размова ідзе на адной мове.

Прэзідэнт лічыць Наўгародскую вобласць адным з блізкіх суб’ектаў Расійскай Федэрацыі, з якім склаліся ўстойлівыя гандлёвыя адносіны. Беларусь у асноўным пакупае з наўгародчыны арматурную прадукцыю, хімічныя кампаненты, піламатэрыялы і кераміку.

Аляксандр Лукашэнка адзначыў, што асабісты ўдзел губернатараў у наладжванні адносін — краевугольны камень. Калі кіраўнік зацікаўлены, справы будуць паляпшацца. Асабліва важна, што Наўгародчына і Беларусь зацікаўлены не проста ў развіцці гандлю, але ў пашырэнні кааперацыйных сувязяў. «Мы разлічваем на ваша садзейнічанне ў пытаннях удзелу нашых будаўнікоў у вас. Калі, вядома, вас задавальняе. У нас ёсць практыка, я калісьці прасіў кіраўнікоў рэгіёнаў: калі беларусы да вас ідуць, вы дайце нам добры аб’ект альбо квартал, каб вы бачылі беларускі досвед у будоўлі. Каб насельніцтва бачыла, што беларусы прыехалі, пабудавалі гэты аб’ект. Гэта наш твар. Хочам і гэтымі аб’ектамі прысутнічаць у рэгіёнах Расійскай Федэрацыі», — прапанаваў госцю Прэзідэнт.

Таксама ён нагадаў, што яшчэ з савецкіх часоў Беларусь моцная машынабудаваннем. Зараз у краіне выпускаецца шырокая лінейка грузавой, дарожнай, камунальнай і будаўнічай тэхнікі. Наўгародцам таксама прапануюць сучасныя аўтобусы МАЗ з рознымі тыпамі рухавікоў і тралейбусы з павялічаным аўтаномным ходам. Упэўніцца ў іх экалагічнасці і эканамічнасці госці могуць літаральна на свае вочы.

Аляксандр Лукашэнка звярнуў увагу госця, што наша мэта — паглыбленне эканамічных кантактаў, двухбаковага ўзаемадзеяння. Будзе інтарэс у эканоміцы — усё астатняе дапасуецца. Беларускі лідар запрасіў губернатара Наўгародскай вобласці прыязджаць часцей, паабяцаў усялякую дапамогу і падтрымку.

«Ведайце, што вы нам людзі не чужыя, асабліва наўгародцы. Хаця ў нас няма благіх адносін ні з Чачнёй, ні з Татарстанам, ні з Башкартастанам, ні з мусульманамі, ні з католікамі, іудзеямі і тым больш праваслаўнымі ў Расіі. Вы для нас людзі нашы, родныя», — канстатаваў Прэзідэнт. Ён у чарговы раз падкрэсліў, што нашы дзяржавы не сябруюць супраць кагосьці.

«Мы ж не збіраемся заўтра супраць Еўрасаюза ні эканамічна, ні дыпламатычна нешта рабіць. У нас усяго хапае. Слухайце, у Расіі, у Беларусі ўсяго хапае. Дай бог пабольш бы людзей — у нас, можа, палова жыве таго, што можа пракарміць зямля. У Расіі тым больш. Нам гэта не трэба — нам трэба ўладкаваць свае землі. Галоўнае, каб нам не перашкаджалі. Ну а калі хтосьці, як я кажу, з мячом прыйдзе да нас (гэта не я сказаў, гэта мой цёзка), вы ведаеце, што будзе з ім», — абазначыў пазіцыі беларускі лідар.

Пра двухбаковыя стасункі

У сваю чаргу Андрэй Нікіцін перш за ўсё падзякаваў за славутую беларускую гасціннасць. Па перакананні губернатара, у стасунках Беларусі і яго рэгіёна ёсць па меншай меры дзве рэчы, якія немагчыма змяніць. Першая — Вялікая Айчыннная вайна.

«На Наўгародскай зямлі зарадзіўся пошукавы рух, зараз у пошуку актыўна ўдзельнічаюць у тым ліку атрады з Беларусі. Штогод прыязджае атрад з Брэсту. Толькі за апошнія гады адшукалі каля 80 чырвонаармейцаў, народжаных на Беларусі, у наўгародскіх лясах і балотах. Сёлета пашукавікі адшукалі ўраджэнца Гомельскай вобласці Івана Іванавіча Зарэцкага. 8 мая, напярэдадні 75-годдзя Перамогі, яго парэшткі будуць урачыста захаваныя на Наўгародскай зямлі», — паведаміў Андрэй Нікіцін. Ён выказаў перакананне, што такую гістарычную сувязь не парушыць ніякімі тэлеграм-каналамі і нічым іншым. Гэтая сувязь — назаўсёды.

Як і Сафія Наўгародская з Сафіяй Полацкай — падмурак усёй нашай гісторыі. Гэта тое, што немагчыма адмяніць і неяк перайначыць, упэўнены губернатар. Адзначыў ён і актыўнае супрацоўніцтва Наўгародскага і Полацкага музеяў.

«Ведаю, што вы нядаўна з нашым прэзідэнтам на саміце СНГ гаварылі пра неабходнасць сумесных прарыўных праектаў. Наўгародская зямля гатовая быць адным з удзельнікаў такіх праектаў. Вось ужо нашы наўгародскія аграрыі прагаласавалі за беларускую тэхніку, не чакаючы ніякіх каманд з нашага боку. Ужо, напэўна, больш за 50 працэнтаў тэхнікі — беларуская. Працэнт гэты расце», — праінфармаваў Прэзідэнта Андрэй Нікіцін.

«Тавараабарот паміж Рэспублікай Беларусь і Наўгародскай вобласцю штогод павялічваецца на 15 працэнтаў. Ёсць сферы, дзе мы бачым упэўнены рост, ёсць сферы, звязаныя, напрыклад, з камунальным транспартам, дзе трэба будзе папрацаваць і зняць нейкія пэўныя бар’еры. Ёсць вельмі цікавыя магчымыя сумесныя перспектывы ў навуковых распрацоўках. Дынаміка добрая, але нішто не замінае зрабіць яе яшчэ больш», — расказаў журналістам губернатар Наўгародскай вобласці.

Андрэй Нікіцін наведаў Беларусь упершыню, падчас праграмы візіту запланавана наведванне буйных сельскагаспадарчых, навуковых і прамысловых прадпрыемстваў. Але госці ўжо паабяцалі: да 500-годдзя Жыровіцкага манастыра менавіта іх вобласць хоча адліць тры званы. А яшчэ члены дэлегацыі расказалі, як знаёмыя прасілі паціснуць руку Аляксандру Лукашэнку і пазайздросцілі такому знаёмству.

Варвара Марозава

Фота БЕЛТА

Выбар рэдакцыі

Грамадства

Хворым на фенілкетанурыю могуць палепшыць забяспячэнне прадуктамі харчавання

Хворым на фенілкетанурыю могуць палепшыць забяспячэнне прадуктамі харчавання

Міністэрства аховы здароўя адказала на публікацыю «Звязды».

Палітыка

На пасяджэнні ЦВК зарэгістраваны 56 членаў Савета Рэспублікі сёмага склікання

На пасяджэнні ЦВК зарэгістраваны 56 членаў Савета Рэспублікі сёмага склікання

Выбары прайшлі ў прыўзнятай атмасферы, дастойна і з яркімі выступленнямі.

Культура

У Беларусі будзе стварацца археалагічная карта

У Беларусі будзе стварацца археалагічная карта

Калі Скарына прыехаў у Кракаў, і як выглядаў малы Рагвалодавіч.