Вы тут

Для дзяцей з абмежаванымі магчымасцямі ў Бешанковічах рэалізавалі ўнікальны праект


Сэнсарна-дынамічная зала, аналагаў якой на Віцебшчыне няма, з'явілася ў раённым цэнтры карэкцыйна-развівальнага навучання і рэабілітацыі. Пра гэта паведамляюць «Віцебскія весткі».


— Сёння ў краіне створана мадэль інтэграванай інклюзіўнай адукацыі, што з'яўляецца значным крокам наперад у параўнанні з ранейшым механізмам, калі дзіця з інваліднасцю практычна не мела шанцаў навучацца са сваімі аднагодкамі ў дзіцячым садзе ці школе, — кажа дырэктар цэнтра Алена МАРОЗ. — Падыход, які выключае любую дыскрымінацыю дзяцей, прызнаны ЮНЕСКА, АБСЕ і іншымі міжнароднымі арганізацыямі прыярытэтным у развіцці нацыянальных сістэм школьнай адукацыі.

Бешанковіцкі цэнтр карэкцыйна-развівальнага навучання і рэабілітацыі актыўна працуе ў гэтым кірунку. Сёлета па праекце «Шлях да здароўя», які ўдзельнічае ў праграме ААН пры падтрымцы Жаночай гільдыі ААН у Жэневе, было закуплена абсталяванне для пакоя сэнсарнай інтэграцыі «Хатка Савы». Яго кошт — больш за 14 тысяч рублёў. Яно сапраўды дапамагае дзецям, якія маюць абмежаваныя магчымасці, хутчэй асвоіць і замацаваць новыя навыкі. «Хатка Савы» рэкамендавана пры праблемах рухальнай сістэмы, нязграбнасці, маторнай няспрытнасці, ДЦП лёгкай формы, затрымцы развіцця, парушэнні навыкаў зносін і навучання, аўтыстычных праявах, гіперактыўнасці, трывожнасці, агрэсіі.

— Самае галоўнае адрозненне гэтага абсталявання ад якога-небудзь іншага — усе прыстасаванні-снарады падвешаныя ў паветры. Менавіта гэта ў шмат разоў павялічвае эфектыўнасць заняткаў і працэдур, — кажа Алена Іванаўна. — Калі дзіця тут займаецца, яно не адчувае апоры і яму трэба засяроджвацца. У выніку адбываецца ўключэнне сэнсарных адчуванняў у кантэкст асэнсаваных, самастойных, адаптыўных формаў узаемадзеяння. Іншымі словамі, акцэнт робіцца на інтэграцыі ўсіх адчуванняў, а не толькі на маторных рэакцыях. Змяняючы спосабы замацавання снарада, можна рэгуляваць нагрузку. Гэта дазваляе суаднесці ўзровень складанасці практыкавання з патрэбамі канкрэтнага дзіцяці.

Вельмі важна і тое, што дзеці актыўныя падчас такіх заняткаў. Дарослы не навязвае свае правілы, а будуе дыялог з дзіцем вакол тых гульняў, якія яно абрала само. Такое ўзаемадзеянне, якое прадугледжвае чаргаванне спантанных і патрэбных рухаў, неабходна для развіцця эмоцый, мыслення, маўлення і сувязяў, каардынацыі.

— З дапамогай «Хаткі Савы» і іншага абсталявання мы аказваем увесь аб'ём карэкцыйна-педагагічнай дапамогі, — дадае Алена Мароз. — Таксама ў цэнтры створаны кабінеты сэнсаматорнага развіцця з акустычным і святломузычным суправаджэннем, ранняй комплекснай дапамогі, пакой сацыяльнай рэабілітацыі. Дзецям асаблівае задавальненне прыносяць гульні з вадой ці пяском, арт- і казкатэрапія.

У цэнтры навучаюцца і дзеці з цяжкімі і множнымі фізічнымі і псіхічнымі парушэннямі. Для іх патрэбныя асаблівыя ўмовы: малая напаўняльнасць класа — да шасці чалавек, з якімі працуе не толькі настаўнік, але і выхавальнік, дэфектолаг, педагог-псіхолаг, масажыст, спецыяліст ЛФК і іншыя.

Штогод псіхолага-медыка-педагагічная камісія ў цэнтры абследуе 300 дзяцей. Звесткі заносяцца ў раённы банк даных. На іх аснове аддзел па адукацыі фарміруе інтэграцыйныя класы і групы, якім адпавядаюць пункты карэкцыйна-педагагічнай дапамогі ў школах, дзіцячых садках. Такім чынам адбываецца 100-працэнтны ахоп дзяцей, якія маюць патрэбу ў асаблівай падтрымцы.

Загаловак у газеце: «Хатка Савы» дапаможа

Выбар рэдакцыі

Грамадства

Як пенсіянерка з Гомеля купіла набор каструль па цане патрыманай іншамаркі

Як пенсіянерка з Гомеля купіла набор каструль па цане патрыманай іншамаркі

Усё, як у казцы: прыгожая зала, музыка, пачастункі. Абаяльныя людзі распавядаюць аб правільным харчаванні і рэкламуюць свой тавар...

Грамадства

714 тысяч тон адходаў для перапрацоўкі сабралі летась беларусы

714 тысяч тон адходаў для перапрацоўкі сабралі летась беларусы

Гэта адходы шкла, паперы, пластыку, шын, батарэек, машыннага масла...

Грамадства

​Дзе прызначалі спатканні ў даваенным Мінску?

​Дзе прызначалі спатканні ў даваенным Мінску?

Атрымаць падказкі вам дапаможа экскурсія «Рамантыка мінскіх дворыкаў».