Вы тут

Зялёнае святло для інавацый


Тэма развіцця зялёнай эканомікі ў многіх краінах свету сёння становіцца актуальнай як ніколі. А сумесныя праграмы, праекты, стратэгічныя пагадненні могуць не толькі спрыяць паляпшэнню экалогіі ў асобна ўзятай дзяржаве, але і станоўча ўплываць на адносіны паміж партнёрамі.


Ігар Петрышэнка. Выступленне на бізнес-форуме

У Мінску прайшоў III Беларуска-Італьянскі бізнес-форум па пытаннях зялёнай эканомікі, на якім не толькі абмяркоўвалі такія важныя праблемы як рост узаемнага тавараабароту і стварэнне сумесных прадпрыемстваў, але і вялі гаворку пра тое, як можна эканамічныя напрамкі злучыць з экалагічнымі ініцыятывамі. Перш за ўсё ў такіх сферах, як развіццё альтэрнатыўнай энергетыкі, перапрацоўка другаснай сыравіны ды іншае. Віцэ-прэм’ер Ігар Петрышэнка, які браў удзел у рабоце форуму, падрабязна распавёў пра асноўныя перспектывы развіцця ў Беларусі зялёнай эканомікі. У прыватнасці, ён адзначыў, што ў краіне ў гэтым кірунку рэалізуюцца дзяржаўныя праграмы, удасканальваецца заканадаўчая база, распрацоўваюцца дакументы ў галіне аховы навакольнага асяроддзя і рацыянальнага прыродакарыстання.

— Прынцыпы зялёнай эканомікі з’яўляюцца для нас адносна новымі, але з улікам нацыянальных асаблівасцяў і глабальных выклікаў дзяржава вызначае дадзены кірунак як стратэгічны прыярытэт, — падкрэсліў Ігар Петрышэнка.

Варта яшчэ мець на ўвазе, што сёння ў Беларусі прынцыпы зялёнай эканомікі інтэграваныя ў Нацыянальную стратэгію ўстойлівага сацыяльна-эканамічнага развіцця, якая распрацавана на перыяд да 2030 года. Зрэшты, ужо ў сёлета сфармуюць Нацыянальную стратэгію аж да 2035 года. У яе аснову будуць пакладзены падыходы, якія прадугледжваюць зялёны вектар развіцця з пераходам на прынцыпова новую рэсурсазберагальную мадэль эканомікі замкнёнага цыклу. Яна звязаная з забеспячэннем эфектыўнай і экалагічнай вытворчасці, максімальным выкарыстаннем другаснай сыравіны. Віцэ-прэм’ер таксама не прамінуў заўважыць, што адным са складнікаў поспеху ў рэалізацыі адпаведных падыходаў і праектаў Беларусь бачыць дынамічнае развіццё беларуска-італьянскага супрацоўніцтва. Італьянскі Амбасадар у Мінску Марыа Бальдзі, у сваю чаргу, звярнуў увагу на велізарны патэнцыял Беларусі ў галіне развіцця інавацый, у прыватнасці, у будаўніцтве ды IT-сферы.

— Гэта можа даць многае для развіцця эканомікі і супрацоўніцтва Беларусі ды Італіі ў цэлым, — сказаў ён.

У гэтым годзе ў форуме ўдзельнічала 35 італьянскіх фірмаў і больш за 150 беларускіх кампаній. Амбасадар Італіі выказаў надзею, што такая актыўнасць прынясе рэальны вынік у найбліжэйшай будучыні, да прыкладу, з'явяцца новыя кантракты для беларускіх ды італьянскіх прадпрыемстваў. Старшыня Беларускай гандлёва-прамысловай палаты Уладзімір Улаховіч у сваю чаргу ўдакладніў, што італьянскіх інвестараў у Беларусі могуць зацікавіць развітая інфраструктура, высокакваліфікаваны персанал, стабільныя ўмовы вядзення бізнесу, магчымасці ствараць сумесную прадукцыю з дадатковым коштам і прасоўваць яе на рынак Еўрасаюза. Перш за ўсё, паводле яго слоў, інвестары будуць зацікаўлены ў працы ў рэгіёнах, дзе ёсць велізарны патэнцыял для рэалізацыі сумесных праектаў.

Алег Багамазаў

Выбар рэдакцыі

Эканоміка

Усё, што трэба ведаць пра змены ў Жыллёвым кодэксе

Усё, што трэба ведаць пра змены ў Жыллёвым кодэксе

Мы паспрабавалі адшукаць самыя вострыя вуглы новаўвядзенняў і ўявіць, як будзе працаваць гэты дакумент пачынаючы з 2020 года.

Калейдаскоп

Вясёлыя гісторыі нашых чытачоў

Вясёлыя гісторыі нашых чытачоў

Як запрасіць чалавека, каб ён не прыйшоў, і знойдзены кашалёк.

Грамадства

Як пенсіянерка з Гомеля купіла набор каструль па цане патрыманай іншамаркі

Як пенсіянерка з Гомеля купіла набор каструль па цане патрыманай іншамаркі

Усё, як у казцы: прыгожая зала, музыка, пачастункі. Абаяльныя людзі распавядаюць аб правільным харчаванні і рэкламуюць свой тавар...

Грамадства

714 тысяч тон адходаў для перапрацоўкі сабралі летась беларусы

714 тысяч тон адходаў для перапрацоўкі сабралі летась беларусы

Гэта адходы шкла, паперы, пластыку, шын, батарэек, машыннага масла...