Вы тут

Якім бачыць дэпутацкі корпус выканаўчая ўлада?


На думку старшыні Гродзенскага аблвыканкама Уладзіміра Краўцова, дэпутаты павінны прымаць такія законы, якія не супярэчылі б развіццю грамадства, не заводзілі ў прававы тупік. А такіх нестыковак апошнім часам узнікае нямала. Аб гэтым, у прыватнасці, ішла размова падчас нядаўняй прэс-канферэнцыі для прадстаўнікоў СМІ ў Мастах.


У першую чаргу кіраўнік рэгіёна адзначыў высокую актыўнасць жыхароў Гродзеншчыны падчас вылучэння кандыдатаў у ніжнюю палату парламента. Сапраўды, сёлета на 13 дэпутацкіх месцаў ад рэгіёна прэтэндуюць 66 чалавек. Гэта на 11 чалавек больш, чым у папярэднюю выбарчую кампанію. У сярэднім — 5 чалавек на месца.

— Гэта высокая канкурэнцыя, і ёсць з каго выбраць, — адзначыў Уладзімір Краўцоў. — Калі раней было па адным чалавеку на акругу, цяпер такога няма. Сярод кандыдатаў ёсць кіраўнікі, юрысты, беспрацоўныя, пенсіянеры. Хацелася б, каб у парламент трапілі людзі, якія маюць рознабаковыя здольнасці, добра разбіраюцца ў эканоміцы, юрыспрудэнцыі. А галоўнае — выконваюць тыя задачы, якіх чакае выканаўчая ўлада.

За час існавання незалежнай дзяржавы створана трывалая заканадаўчая база, якая распрацавана літаральна з нуля. Але жыццё не стаіць на месцы. І некаторыя законы пачынаюць супярэчыць з рэчаіснасцю, атрымліваюць развіццё эканомікі. Каб пазбегнуць такіх нестыковак, неабходна ўдасканальваць заканадаўства. Такія спадзяванні выканаўчая ўлада ўскладае, у тым ліку, на будучы дэпутацкі корпус наступнага склікання.

— Канешне, выканаўчай уладзе неабыякава, хто прадставіць наш рэгіён у парламенце, — падкрэсліў Уладзімір Краўцоў. — Хоць, здаецца, паехалі ў Мінск і там працуюць. Я таксама быў дэпутатам ніжняй палаты, і з майго пункту гледжання, у дэпутата два сур'ёзныя кірункі ў рабоце. Гэта непасрэдна работа над заканадаўствам, у камісіях, зносіны з міністэрствамі і ведамствамі. І другі кірунак — гэта работа ў сваёй акрузе. Павінна быць прамая сувязь з выбаршчыкамі, з насельніцтвам, каб зразумець, як рэалізуюцца тыя ці іншыя законы, як іх удасканаліць, што змяніць.

Не апошнюю ролю адыгрывае і асоба дэпутата. Што датычыць кандыдатаў, якія вылучаны ад Гродзеншчыны, палова з іх — прадстаўнікі партый. Ёсць кандыдаты ад ЛДП, «Грамады», КПБ, «Зялёных», БНФ, АГП і іншых. Нямала тых, каго вылучылі працоўныя калектывы. Прафесійны склад таксама даволі шырокі — ад вартаўніка да дырэктара прадпрыемства. Ёсць і беспрацоўныя. Шырока прадстаўлена бізнес-кола. Жаночае прадстаўніцтва не сказаць, што значнае. З 66 кандыдатаў іх усяго 15. Маладых людзей таксама няшмат — пяць чалавек. Хто з іх трапіць у парламент — пакажуць выбары, якія адбудуцца 17 лістапада. Ад Гродзеншчыны будзе абрана 13 дэпутатаў — па колькасці акруг.

Зарэгістравана і трое дзеючых членаў парламента, якія выказалі намер працягваць дэпутацкую работу і прайшлі неабходныя працэдуры пры вылучэнні ў кандыдаты 7-га склікання. Дарэчы, не ўсе прэтэндэнты на месца ў парламенце змаглі дайсці да працэсу рэгістрацыі, пасля якога яны могуць прэтэндаваць на галасы выбаршчыкаў. «Адсеялася» 11 чалавек, з якіх пяць самі знялі свае кандыдатуры, а яшчэ шасці адмоўлена ў рэгістрацыі з-за недасканаласці дэкларацыі альбо недакладных подпісаў.

— Кажуць, што ў палітыцы няма месца сумленню, шчырасці, адкрытасці, але гэта не так. Людзі аддаюць перавагу менавіта тым, хто неабыякавы і паслядоўны, умее трымаць сваё слова, — адзначыў кіраўнік рэгіёна. — Зразумела, што зараз, напярэдадні выбараў, кандыдаты павінны пабываць у калектывах, сустрэцца з людзьмі. Даведацца, што іх хвалюе. Тут розныя пытанні ўзнікаюць — дарогі, праблемы ЖКГ, зямельныя пытанні, заработная плата, новыя рабочыя месцы — у праблемах выбаршчыкаў няма дробязяў.

Па словах Уладзіміра Краўцова, дэпутаты працуюць разам з мясцовымі ўладамі, каб зняць праблемы, зрабіць жыццё жыхароў больш камфортным і бяспечным. Ад дэпутатаў залежыць і выкананне тых задач, якія былі прыняты на Усебеларускім народным сходзе.

— Пачнецца новая пяцігодка, і будуць распрацоўвацца новыя кірункі дзейнасці, важна, каб дэпутаты працавалі на перспектыву. Што датычыцца нашых кантактаў, выканкам заўсёды запрашае народных абраннікаў на пасяджэнні, мерапрыемствы, міжнародныя сустрэчы, — паведаміў кіраўнік рэгіёна.

На думку кіраўніка абласной вертыкалі ўлады, дэпутатам варта быць больш публічнымі і даступнымі для прадстаўнікоў СМІ. Выказвацца па ўсіх пытаннях, якія хвалююць наша грамадства, расказваць, над чым яны працуюць.

Маргарыта УШКЕВІЧ

Фота БЕЛТА

Загаловак у газеце: Пазбегнуць прававых тупікоў

Выбар рэдакцыі

Грамадства

«Звязда» дапамагла ліквідаваць стыхійную паркоўку ў Магілёве

«Звязда» дапамагла ліквідаваць стыхійную паркоўку ў Магілёве

Увагу на праблеме завастрыў старшыня вулічнага камітэта гэтай мікразоны Аляксандр Пікуля. 

Грамадства

Прамянёвая тэрапія: новыя магчымасці і рызыкі

Прамянёвая тэрапія: новыя магчымасці і рызыкі

 Прамянёвая тэрапія можа выкарыстоўвацца як у спалучэнні з хірургіяй і хіміятэрапіяй, так і як самастойны метад лячэння.

Калейдаскоп

Вясёлыя гісторыі чытачоў

Вясёлыя гісторыі чытачоў

Старэнькі «Запарожац» (цяпер такіх машын і не відаць ужо) старанна пыліў па дарозе...