Вы тут

Дэпутат райсавета арганізавала танцавальны гурток


Дэпутат Брэсцкага раённага Савета па Мухавецкай выбарчай акрузе Ірына ПРАКАПОВІЧ працуе начальнікам аддзялення па грамадзянстве і міграцыі Брэсцкага РАУС. Дэпутатам яна стала толькі ў гэтым скліканні, але ў акрузе добра ведаюць свайго выбранніка. Ірына Віктараўна там ужо свой чалавек.


Мухавец — немалы прыгарадны пасёлак, яго насельніцтва разам з навакольнымі вёскамі складае больш за чатыры тысячы чалавек. Нямала былых гараджан пражывае ў дачных дамах, дзе цяпер дазволеная часовая рэгістрацыя. Такая вось спецыфіка акругі, з якой Ірына Пракаповіч пачала знаёміцца яшчэ падчас перадвыбарнай кампаніі. А ў якасці дэпутата яна наведвае ўсе пасяджэнні камісій пры выканкаме, сельскія сходы, святочныя і іншыя мерапрыемствы, ды і проста гутарыць з людзьмі. Пасля адной з такіх гутарак з жаночай грамадскасцю нарадзілася ідэя адкрыць гурток па танцах.

Напярэдадні дэпутат як супрацоўнік органаў унутраных спраў прааналізавала сітуацыю з падлеткавымі правапарушэннямі, сваімі думкамі падзялілася на адным з сельскіх сходаў. Разам сталі раіцца, як найбольш захапіць падлеткаў карыснымі заняткамі. Мама аднаго школьніка сказала, што добра было б мець харэаграфічны гурток або студыю танцаў. Яе падтрымалі іншыя бацькі — пры наведванні такога гуртка дзіця атрымлівае і фізічнае, і эстэтычнае выхаванне. Так і вырашылі. Патрэбнае памяшканне аказалася ў Доме культуры.

Дэпутат знайшла ў абласным цэнтры выкладчыка танцаў. Ён ездзіць у Мухавец з горада тры разы на тыдзень і праводзіць заняткі. Ужо 90 дзяцей і падлеткаў наведваюць гэтыя ўрокі. Нават на рэспубліканскім конкурсе сёлета паказалі вельмі добрыя вынікі. І гэта ўсяго за год!

— Галоўнае, што ім цікава, яны чакаюць гэтых заняткаў, — кажа Ірына Віктараўна. — Аднойчы давялося прысутнічаць на справаздачным канцэрце па выніках вучэбнага года. Назірала, як дзеці з задавальненнем пераадзяваюцца ў касцюмы, як рэпеціруюць. Відаць, што педагог прыйшоўся ім даспадобы, таму ўсё атрымліваецца. Бацькі надзвычай задаволеныя заняткамі дзяцей.

«Разам з бацькамі, настаўнікамі мясцовай школы мы раіліся, як далей развіваць выхаваўчы працэс у нашай вялікай вёсцы, і прыйшлі да высновы, што трэба адкрыць профільны міліцэйскі клас, — працягвае дэпутат. — Сказана — зроблена. З першага верасня вучні пятага класа пайшлі ў профільны клас на конкурснай аснове, бо з трох паралеляў было надта многа ахвотных. Давялося ўлічваць сярэдні бал і іншыя характарыстыкі. Праграма для навучання тут такая ж, як у іншых профільных класах. Але ж стымул вучыцца лепш з'явіўся».

Да таго ж вучням названага класа дэпутат арганізоўвае розныя сустрэчы, экскурсіі. Нядаўна яны наведалі музей абласнога УУС. У раёне гэта першы падобны клас, яго вопыт будуць вывучаць настаўнікі іншых школ.

На рахунак дэпутата Пракаповіч можна запісваць таксама прыпыначны павільён у напрамку Камяніцы Жыравецкай, які нядаўна з'явіўся. У яе акрузе шмат дачных пасёлкаў, і па дарозе да Мухаўца не раз даводзілася назіраць, як у самае рознае надвор'е мерзнуць людзі, асабліва пенсіянеры, у чаканні аўтобуса. Цяпер павільён на былым прыпыначным пункце паставілі. Ёсць заслуга дэпутата ва ўзвядзенні дзіцячай пляцоўкі, тратуарнай дарожкі ў вёсцы.

— Я і раней заўсёды імкнулася дапамагчы людзям, а цяпер для гэтага атрымала дэпутацкія паўнамоцтвы, — разважае Ірына Пракаповіч. — Цяпер стала прасцей размаўляць з любым кіраўніком, калі справа датычыцца той жа пляцоўкі альбо трэба паправіць пешаходную сцежку. Не атрымаецца з першага разу — я не пасаромеюся патурбаваць другі альбо трэці раз, пакуль справа не зрушыцца з месца. Неаднойчы даводзілася чуць, у тым ліку нават ад уласнага мужа: «А што, табе больш за ўсіх трэба?» Але ж, на мой погляд, дэпутат — гэта і ёсць чалавек, якому больш за іншых трэба. Калі цябе абралі, калі табе даверылі, то людзі чакаюць нейкіх рэальных спраў. Ды і на сустрэчах не сорамна з імі гутарыць, глядзець ім у вочы.

Дэпутат Пракаповіч не толькі падтрымлівае ініцыятывы ў сваёй акрузе, але і праяўляе актыўнасць у раённым Савеце. Менавіта там вырашылі апекаваць дзяцей са свайго раёна, якія цяпер жывуць у Кобрынскай дзіцячай вёсцы. Жывуць яны ў ёй зразумела па якой прычыне — з-за нядбайнасці бацькоў. Народныя выбраннікі стараюцца трымаць дзяцей у полі зроку: раз на некалькі месяцаў выязджаюць туды, наведваюць іх прыёмныя сем'і. З Брэсцкага раёна ў дзіцячай вёсцы жывуць 12 чалавек у трох сем'ях. Перад навагоднім святам дэпутаты ўзялі з сабой цырульніка, зрабілі прычоскі ўсім дзецям з падшэфных сем'яў. Трэба было бачыць іх радасць!

Звычайна возяць падарункі, рэчы, патрэбныя для навучання і развіцця. Дзеці ўжо ведаюць сваіх дэпутатаў, чакаюць сустрэч з імі. Важна бывае пагаварыць, пацікавіцца справамі, паказаць, што іх памятаюць і чакаюць на малой радзіме, лічыць Ірына Віктараўна.

Святлана ЯСКЕВІЧ

Прэв'ю: nadbugom.by

Выбар рэдакцыі

Грамадства

Галiна Левіна: Помнiк — не канструктар i не чарцёж, яго трэба перажыць, выпакутаваць

Галiна Левіна: Помнiк — не канструктар i не чарцёж, яго трэба перажыць, выпакутаваць

У архiтэктара Галiны Левiнай — Хатынь, творчая спадчына яе бацькi.

Грамадства

Прэмiя прыгажосцi. Дзеля чаго людзi кладуцца пад нож пластычнага хiрурга?

Прэмiя прыгажосцi. Дзеля чаго людзi кладуцца пад нож пластычнага хiрурга?

Як сведчаць шматлiкiя даследаваннi, прывабным людзям прасцей прабiцца ў жыццi i яны дасягаюць у кар'еры большага поспеху. 

У свеце

Як Еўропа аднаўляецца ад кавiднага ўдару?

Як Еўропа аднаўляецца ад кавiднага ўдару?

Сёлета еўрапейская эканомiка будзе перажываць глыбокую рэцэсiю з-за ўспышкi каранавiруса, нягледзячы на хуткiя i ўсёабдымныя антыкрызiсныя меры як на саюзным, так i на нацыянальным узроўнi.

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.