Вы тут

«Венскі баль у Купалаўскім» адкрые паланэз Агінскага «Развітанне з Радзімай»


«Венскі баль у Купалаўскім», які пройдзе 14 снежня ў цэнтры сталіцы, адкрые знакаміты паланэз Агінскага «Развітанне з Радзімай». Па традыцыі, менавіта паланэзам у выкананні дэбютантаў распачынаюцца падобныя імпрэзы як у Аўстрыі, так і ў іншых краінах свету. У Беларусі за музычнае суправаджэнне вечара адказвае Дзяржаўны акадэмічны сімфанічны аркестр, што ўжо рыхтуе разнастайныя вальсы, полькі, мазуркі і іншыя мелодыі, пад якія будуць танцаваць госці.


Дарэчы, арганізатары «Венскага балю з А1 у Купалаўскім» атрымалі звыш 600 заявак ад ахвотных стаць дэбютантамі — хлопцаў ва ўзросце 18—26 гадоў і 16— 23-гадовых дзяўчат. Цяпер перад бальным камітэтам стаіць задача вызначыць 200 удзельнікаў вочнага этапу адбору. А зрабіць гэта будзе няпроста, бо сярод кандыдатаў — вельмі цікавыя маладыя людзі: байкеры і выхавальнікі, урачы і мадэлі Нацыянальнай школы прыгажосці, лаўрэаты міжнародных музычных конкурсаў, інжынеры-энергетыкі... Пераважная большасць сярод тых, хто жадае трапіць на баль, — дзяўчаты, расказалі арганізатары праекта. Каля паловы кандыдатак атрымліваюць вышэйшую адукацыю, а ў вольны час не толькі вядуць здаровы лад жыцця, але і захапляюцца мастацтвам, наведваюць выстаўкі, спектаклі і канцэрты, ведаюць, хто такі Бэнксі, і ўмеюць адрозніваць Гегеля ад Гогаля. Сярод прэтэндэнтак ёсць, напрыклад, пяціразовая стыпендыятка спецфонду Прэзідэнта па падтрымцы адораных навучэнцаў і студэнтаў, піяністка — лаўрэат міжнародных музычных конкурсаў, некалькі валанцёраў ЮНІСЕФ, будучая валанцёрка на Алімпійскіх гульнях — 2020 у Лондане. Што да юнакоў, якім цікавы баль, сярод іх прыкладна пароўну прадстаўнікоў тэхнічных і творчых прафесій, а таксама ёсць некалькі афіцэраў Узброеных Сіл і ўдзельнік гістарычных рэканструкцый напалеонаўскіх войнаў.

Ужо вядома, што выкладаць маладым беларусам майстэрства танца будзе прафесар Томас Шэфер-Эльмаер, які прыедзе ў нашу краіну з дапамогай пасольства Аўстрыі ў Беларусі. Танцавальная дынастыя Эльмаер ужо сто гадоў кіруе аднайменнай школай танцаў, папулярнай па ўсёй краіне, адказвае за цырымонію адкрыцця на больш чым 50 штогадовых балях Вены і знаёміць дэбютантаў не толькі з правільнай танцавальнай тэхнікай, але і з адмысловым этыкетам.

Квіткі на «Венскі баль з А1 у Купалаўскім» з'явяцца ў продажы ўжо ў пачатку лістапада (акрамя набыцця білета, нагадваюць арганізатары, трэба вытрымаць абавязковы дрэс-код: Black Tіe для мужчын, доўгая бальная сукенка для жанчын). А ўбачыць імпрэзу, нагадаем, змогуць нават тыя, хто на яе не трапіць, прычым бясплатна — у прамым эфіры на лічбавай платформе VOKA.

Вікторыя ЦЕЛЯШУК

Прэв'ю: thelocal.at

Загаловак у газеце: Пад гукі паланэза

Выбар рэдакцыі

Грамадства

Галiна Левіна: Помнiк — не канструктар i не чарцёж, яго трэба перажыць, выпакутаваць

Галiна Левіна: Помнiк — не канструктар i не чарцёж, яго трэба перажыць, выпакутаваць

У архiтэктара Галiны Левiнай — Хатынь, творчая спадчына яе бацькi.

Грамадства

Прэмiя прыгажосцi. Дзеля чаго людзi кладуцца пад нож пластычнага хiрурга?

Прэмiя прыгажосцi. Дзеля чаго людзi кладуцца пад нож пластычнага хiрурга?

Як сведчаць шматлiкiя даследаваннi, прывабным людзям прасцей прабiцца ў жыццi i яны дасягаюць у кар'еры большага поспеху. 

У свеце

Як Еўропа аднаўляецца ад кавiднага ўдару?

Як Еўропа аднаўляецца ад кавiднага ўдару?

Сёлета еўрапейская эканомiка будзе перажываць глыбокую рэцэсiю з-за ўспышкi каранавiруса, нягледзячы на хуткiя i ўсёабдымныя антыкрызiсныя меры як на саюзным, так i на нацыянальным узроўнi.

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.