Вы тут

Маладзёжны тэатр эстрады шукае новыя імёны


Днямі тут прайшоў кастынг артыстаў-вакалістаў, прафесійных танцораў, кампазітараў і аранжыроўшчыкаў. Мы таксама завіталі на прагляд, каб даведацца, каго прывабіла перспектыва адкрыць для сябе новыя гарызонты. Усяго ў адборы прынялі ўдзел 27 чалавек і 15 харэографаў, якіх прагладалі асобна.


У фае тэатра нешматлюдна. Прысутныя, дзяўчаты і юнакі, запоўнілі анкеты ўдзельніка і настройваюцца на праслухоўванне. Сярод прэтэндэнтаў не толькі студэнты профільных адукацыйных устаноў Мінска, але і ўдзельнікі з Гомеля, Магілёва — нават з Латвіі даслалі заяўку і прэзентацыю ў відэафармаце.

Само праслухоўванне прайшло ў закрытым фармаце. Кожны ўдзельнік прэзентаваў сябе аўтарытэтнаму журы сам-насам. У складзе экспертнага савета прысутнічалі вядомыя беларускія артысты і дырэкцыя Маладзёжнага тэатра эстрады. Варта адзначыць, у сценах установы культуры ўжо даўно працуюць, напрыклад, Іна Афанасьева, Вольга Плотнікава, Гюнеш, Аляксей Хлястоў і многія іншыя артысты, добра знаёмыя беларускай публіцы.

Першым з кандыдатаў на сцэне апынуўся Алег Шуцкі, вядомы паклоннікам пад сцэнічным псеўданімам Аlеn Hіt. Праслухаўшы песню на англійскай мове, журы цікавіцца ў артыста, як даўно ён займаецца вакалам, ці піша свае песні і аранжыроўкі.

— Пішу песні для сябе і для іншых артыстаў, не толькі на англійскай, але і на рускай мове. Сёння ў мяне добры настрой, таму для кастынгу абраў англамоўную танцавальную кампазіцыю, — тлумачыць Алег, а потым прапаноўвае праслухаць у яго выкананні яшчэ адну песню.

Удзельнікі змяняюць адзін аднаго на сцэне. У асноўным прэтэндуюць на «вакансію» артыста-вакаліста. Хтосьці ўпэўнена, а нехта з хваляваннем прадстаўляюць на суд журы сваю ўласную творчасць, народныя песні альбо выконваюць каверы на сусветна вядомыя хіты Агілеры, Лепса, Манаціка, Земфіры і многіх іншых. Суддзі цікавяцца ў большасці, ці гатовыя тыя праспяваць тут і цяпер а капэла, альбо можа спевы не адзіны іх талент. Выйсці за межы запланаванай прэзентацыі адважваюцца не ўсе. А гэта між іншым важнае ўменне для артыста — быць гатовым дзейнічаць па сітуацыі. Кірыл Громаў дакладна з тых, хто не бянтэжыцца перад публікай, бо спявае, разняволена трымаецца на сцэне і нават дэманструе майстэрства пародні Філіпа Кіркорава. А за кулісамі Кірыл прызнаўся:

— Пра кастынг я даведаўся з інтэрнэту. І вырашыў, чаму б не паспрабаваць? Бо для мяне гэта магчымасць набыць новы вопыт, а я ўвесь час шукаю для сябе праекты, у якіх магу рэалізоўвацца. Выступаў на розных конкурсах і як вакаліст, і як вядучы мерапрыемстваў. Хацеў бы стаць адным з артыстаў Тэатра эстрады, бо для творчага чалавека гэта вельмі добрая магчымасць папрацаваць у такім калектыве. І я гатовы сумяшчаць вучобу і работу тут, калі ўсё складзецца і здабуду шчаслівы квіток.

Сярод ахвотных адкрыць для сябе новыя магчымасці бачым і знаёмага ўжо беларускай публіцы спевака Аляксея Гроса, які ў 2016 годзе прадстаўляў Беларусь на «Славянскім базары ў Віцебску» і заваяваў Гран-пры. Журы ён прадставіў некалькі кампазіцый і на пытанне, у якім кірунку працуе зараз, праспяваў песню ўласнага аўтарства ў поп стылістыцы, атрымаўшы адабрэнне публікі і апладысменты. У кулуарах спявак падзяліўся:

— Вельмі радасна бачыць тут знаёмых людзей, з якімі перасякаемся час ад часу на розных музычных спаборніцтвах. Аднак у нас у краіне не так шмат конкурсаў, дзе артысты-вакалісты могуць паказаць сябе. А цяпер час самародкаў, калі людзі пішуць, спяваюць і аранжыруюць самі. І тут якраз той выпадак, калі ты можаш паказаць, што сабой уяўляеш, і прэтэндаваць на магчымасць разнапланава рэалізоўваць сябе ў перспектыве.

...Праслухоўванне ўсіх, хто ў той вечар жадаў прадэманстраваць свой голас, талент пісаць музыку ці аранжыроўкі, расцягнулася больш чым на дзве гадзіны. Па выніках кастынгу адабралі пяць кандыдатаў, у якіх цяпер будзе магчымасць пераймаць вопыт прафесіяналаў, удзельнічаць у праектах Маладзёжнага тэатра эстрады.

— Уражанні ад пачутага і пабачанага ва ўсіх нас станоўчыя. Нават нягледзячы на тое, што кастынг мы праводзілі паралельна з адкрыццём сезона і іншымі мерапрыемствамі, якія ладзіць тэатр, і ён не меў гучнай рэкламнай кампаніі. Тым не менш, улічваючы колькасць людзей і ўзровень іх падрыхтоўкі, радасна, што фінал атрымаўся такі, — адзначыў дырэктар Маладзёжнага тэатра эстрады Сяргей Мядзведзеў. — Мы пакуль што не раскрываем імёнаў адабраных прэтэндэнтаў, але скажу, што гэта тыя людзі, з якімі мы ўжо сёння ведаем, куды можам рухацца, каб атрымаць вынік.

У тэатры гавораць, што такія кастынгі будуць праходзіць яшчэ неаднаразова. І калі нехта мае жаданне заявіць пра сябе, то варта адсочваць навіны на сайце тэатра і рыхтавацца прадэманстраваць таленты перад аўтарытэтным журы. Мастацкі кіраўнік Тэатра эстрады Уладзіслава Арцюкоўская раіць, падыходзіць да гэтага з усёй адказнасцю, каб і знешні выгляд адпавядаў нагодзе, і абраныя кампазіцыі дазвалялі адчуць вашы вакальныя магчымасці. І хто ведае, чые імёны з’явяцца неўзабаве на афішах у кампаніі «зорных» калег?

Алена ДРАПКО

Фота Ганны ЗАНКАВІЧ


Выбар рэдакцыі

Эканоміка

Усё, што трэба ведаць пра змены ў Жыллёвым кодэксе

Усё, што трэба ведаць пра змены ў Жыллёвым кодэксе

Мы паспрабавалі адшукаць самыя вострыя вуглы новаўвядзенняў і ўявіць, як будзе працаваць гэты дакумент пачынаючы з 2020 года.

Калейдаскоп

Вясёлыя гісторыі нашых чытачоў

Вясёлыя гісторыі нашых чытачоў

Як запрасіць чалавека, каб ён не прыйшоў, і знойдзены кашалёк.

Грамадства

Як пенсіянерка з Гомеля купіла набор каструль па цане патрыманай іншамаркі

Як пенсіянерка з Гомеля купіла набор каструль па цане патрыманай іншамаркі

Усё, як у казцы: прыгожая зала, музыка, пачастункі. Абаяльныя людзі распавядаюць аб правільным харчаванні і рэкламуюць свой тавар...

Грамадства

714 тысяч тон адходаў для перапрацоўкі сабралі летась беларусы

714 тысяч тон адходаў для перапрацоўкі сабралі летась беларусы

Гэта адходы шкла, паперы, пластыку, шын, батарэек, машыннага масла...