Вы тут

Што хвалюе жыхароў Бялыніч?


На прыём грамадзян да намесніка кіраўніка Адміністрацыі Прэзідэнта Рэспублікі Беларусь Мікалая Снапкова ў Бялынічы запісалася шматдзетная сям'я з Віцебскай вобласці, якая апынулася ў безвыходнай сітуацыі.


Сям'я ў літаральным сэнсе можа апынуцца на вуліцы, бо жыллё, якое яна здымае, чужое, і яго трэба вызваліць да 1 лістапада, а рэканструкцыя свайго дома яшчэ не завершана. Справа зайшла ў тупік, паколькі выдзеленыя грошы на рэканструкцыю скончыліся, а сваіх няма. Муж працуе грузчыкам, а жонка ў адпачынку па доглядзе за дзіцем. Думалі крэдыт узяць, але ж няма з чаго яго выплачваць. У сям'і шасцёра дзяцей, пяцёра — непаўналетнія. А ўсяго ў сям'і выхоўвалася восем дзяцей, у тым ліку чацвёра чужых.

Сям'я гатова перасяліцца нават у недабудаваны дом, але ж там нават няма ацяплення. У райвыканкаме пытанне не вырашаюць. Сітуацыя, ледзь не плакала жанчына, безвыходная, таму яна і прыехала прасіць аб дапамозе вышэйшую ўладу. Мікалай Снапкоў уважліва выслухаў жанчыну і даў наступныя даручэнні — мясцовым уладам забяспечыць сям'ю часовым жыллём на перыяд правядзення рамонту, а старшыні Віцебскага аблвыканкама Мікалаю Шарснёву — праявіць ініцыятыву і хадайнічаць перад Прэзідэнтам аб павелічэнні субсідыі для сям'і да поўнага кошту рэканструкцыі дома.

— Падтрымка шматдзетных сем'яў — прыярытэтная задача дзяржавы, — падкрэсліў ён. — Падобны выпадак не адзінкавы. І іх трэба кропкава вырашаць, пакуль ва ўрадзе прапрацоўваюцца падыходы для больш маштабнай падтрымкі такіх сем'яў.

Наогул, з дзесяці заяўнікоў, якія запісаліся на прыём да намесніка кіраўніка Адміністрацыі Прэзідэнта, толькі двое з'яўляліся жыхарамі Бялыніцкага раёна.

Для заяўніцы з бялыніцкага аграгарадка Цяхцін у катэгорыю невырашальных трапілі два пытанні — адно датычылася працаўладкавання, другое — добраўпарадкавання мясцовай дарогі. Пясок з яе пастаянна змываецца ў двор жанчыны, прычым у вялікай колькасці. Яна прыйшла на прыём з фотаздымкамі, каб паказаць, як гэта выглядае. І сцвярджала, што пясок цягае на сметнік мяхамі. Мікалай Снапкоў даў даручэнне мясцовым камунальным службам пачысціць трубу і кантраляваць, каб пясок там не назапашваўся. Што датычыцца другога пытання, то тут крыху складаней. Тыя месцы работы, якія жанчыне прапануюць, яе не задавальняюць. І так ужо дзевяць гадоў. Або рабочае месца не задавальняе, або знаходзіцца далёка ад месца пражывання. Ёсць, напрыклад, работа ў Бялынічах, але ад аграгарадка Цяхцін да райцэнтра амаль 20 кіламетраў. Жанчына даглядае састарэлую маці і не жадае далёка ад'язджаць ад дому. Мясцовым органам улады даручана падшукаць жанчыне ў найбліжэйшы час работу, якая задаволіць яе цалкам.

Настаяцель царквы ў гонар іконы Бялыніцкай Божай Маці протаіерэй Сяргей Маслаў запісаўся на прыём, каб пахадайнічаць аб выдзяленні дапамогі на ўзвядзенне капліцы і добраўпарадкаванне Ільінскай гары ў Бялынічах да Дня беларускага пісьменства, які адбудзецца ў гэтым населеным пункце налета.

Палова заяўнікаў, як высветлілася, ужо раней звярталіся са сваімі пытаннямі да намесніка кіраўніка Адміністрацыі. У іх ліку і маладая жанчына з Мінска. Летась яна была на прыёме ў Мікалая Снапкова з нагоды выдзялення ёй з непаўналетнім сынам жылой плошчы ў інтэрнаце. Пакой выдзелены, але яе не задавальняе яго маленькая плошча і якасць. Жанчына працуе ў сістэме ЖКГ, дзе ёсць ведамаснае жыллё, якое ёй падабаецца. Але яе чамусьці не жадаюць туды перасяляць. Мінчанка спадзяецца, што намеснік кіраўніка Адміністрацыі дапаможа вырашыць пытанне.

Намесніка дырэктара адной з мінскіх будаўнічых фірмаў хвалявала пытанне рэалізацыі інвестпраекта па будаўніцтве ў раёне плошчы Бангалор у сталіцы шматфункцыянальнага комплексу. Дакументы знаходзяцца на разглядзе ў Мінскім гарвыканкаме і Адміністрацыі Прэзідэнта, але адказу няма.

З падобным пытаннем звярнуўся і кіраўнік будаўнічай фірмы з горада Горкі Магілёўскай вобласці. Летась было прынята рашэнне Мінскага аблвыканкама аб прыпыненні будаўніцтва вытворчай базы ў Заслаўі. Але будаўнікі з гэтым не згодныя.

Дзве жанчыны прыехалі з Брэста, спадзеючыся, што ім дапамогуць вырашыць праблему з узаконьваннем самавольных пабудоў на тэрыторыі іх домаўладанняў. Яны былі пабудаваныя яшчэ ў 70-я гады мінулага стагоддзя. Але нават суд не расставіў кропкі над «і».

Усе пытанні былі ўважліва выслуханыя і ўзятыя на кантроль. Па кожным з іх будуць прынятыя меры ў адпаведнасці з заканадаўствам.

Нэлі ЗІГУЛЯ

Фота БЕЛТА

Выбар рэдакцыі

Грамадства

Галiна Левіна: Помнiк — не канструктар i не чарцёж, яго трэба перажыць, выпакутаваць

Галiна Левіна: Помнiк — не канструктар i не чарцёж, яго трэба перажыць, выпакутаваць

У архiтэктара Галiны Левiнай — Хатынь, творчая спадчына яе бацькi.

Грамадства

Прэмiя прыгажосцi. Дзеля чаго людзi кладуцца пад нож пластычнага хiрурга?

Прэмiя прыгажосцi. Дзеля чаго людзi кладуцца пад нож пластычнага хiрурга?

Як сведчаць шматлiкiя даследаваннi, прывабным людзям прасцей прабiцца ў жыццi i яны дасягаюць у кар'еры большага поспеху. 

У свеце

Як Еўропа аднаўляецца ад кавiднага ўдару?

Як Еўропа аднаўляецца ад кавiднага ўдару?

Сёлета еўрапейская эканомiка будзе перажываць глыбокую рэцэсiю з-за ўспышкi каранавiруса, нягледзячы на хуткiя i ўсёабдымныя антыкрызiсныя меры як на саюзным, так i на нацыянальным узроўнi.

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.