У вянок аўтару-аранжыроўшчыку “Вянка”

У вянок аўтару-аранжыроўшчыку “Вянка”

Часам думаеш: як жа так можа быць, каб пасля горкай страты, якая напаткала людзей, усё вакол іх працягвала жыць і асмельвалася ўсміхацца?!

26 кастрычніка пайшоў з жыцця Алег Моўчан, кампазітар, чый творчы і чалавечы вобраз не надта стасуецца з выразам “кампазітар-песеннік”, хоць апошні і можна сустрэць у суправаджэнні яго імя і прозвішча, і даволі часта. Памёр аўтар музыкі легендарнай “Малітвы”, а хіба ж яна песня? Духоўны гімн нацыі, гонар эпохі… Дзіўна, што не чуеш, уключыўшы любы нацыянальны канал у гэтыя дні, яго мелодыі. Чуеш іншыя, якіх процьма, самыя што ні ёсць розныя, пра якія не хочацца цяпер ніяк меркаваць. Бо трэба было б сёння слухаць яго. Так здараецца, што вартае асаблівай пашаны і ўвагі нібы адсоўваецца, нібы адпіхваецца — нібы нязначнае, нібы звычайнае. Гэты ж музыкант ужо ў 26 гадаў меў у душы і сэрцы тое, што зрабіла яго кампазітарам і фактычным музычным кіраўніком саміх “Песняроў”. “Малітву” напісаў у 29… Песенны цыкл “Вянок” на вершы Максіма Бадановіча быў аранжыраваны ім.

 “Будуць новыя песні на вершы нашых класікаў і сучаснікаў”, — гаварыў ён пра ўласныя творчыя планы. Цяпер гэтыя словы няхай гучаць як яго запавет.

Часопіс “Маладосць” выказвае спачуванне родным і блізкім Алега Уладзіміравіча Моўчана і асаблівыя словы падтрымкі ў гэтыя цяжкія дні яго жонцы, спявачцы Ірыне Відавай.