Вы тут

У Мінск прывезлі «Белы горад» з Тэль-Авіва


Сёлета ў свеце адзначаюць 100-годдзе Вышэйшай школы будаўніцтва і мастацкага канструявання Баўхаус. Заснаваная ў 1919 годзе ў нямецкім Веймары, яна абвясціла стварэнне новага архітэктурнага кірунку — будынкаў будучага, узведзеных па прынцыпах мэтазгоднасці, функцыянальнасці і зручнасці (менавіта ў гэтым, на думку архітэктараў-наватараў, і ёсць сапраўдная прыгажосць эпохі электрычнасці і несупыннага тэхнічнага прагрэсу). Прынцыпы Баўхауса распаўсюдзіліся па розных краінах свету і сталі асновай для стылю мадэрнізму.


У 1933 годзе пад ціскам нацысцкага ўрада школа ў Германіі закрылася, але яе настаўнікі і вучні працягнулі работу ў іншых краінах. Найбольш поўнае ўвасабленне ідэі архітэктараў знайшлі ў Тэль-Авіве — якраз тады горад імкліва рос, прымаючы ўсё новых насельнікаў, якім патрабаваліся жыллё і грамадскія будынкі. За шэсць гадоў быў узведзены асноўны корпус пабудоў у стылі баўхаус — больш за тры тысячы будынкаў! Архітэктурны ансамбль квартала Белы горад стаў адной з самых значных і маштабных «калекцый» гэтага кірунку.

У 2003 годзе Белы горад быў унесены ў Спіс аб’ектаў Сусветнай культурнай спадчыны ЮНЕСКА як «выдатны ўзор новага горадабудаўніцтва і архітэктуры пачатку ХХ стагоддзя». Гістарычны квартал, які перажыў маштабнае аднаўленне і рэканструкцыю, з’яўляецца адной з турыстычных славутасцяў.

...Паглядзець, які быў ізраільскі архітэктурны мадэрнізм 1930–1940-х і які стаў у наш час, можна і ў Беларусі. Прынамсі на экспазіцыі Ізраільскага культурнага цэнтра «Натыў» пры пасольстве Ізраіля ў Беларусі «Баўхаус. Белы горад Тэль-Авіва», якая адкрылася ў Нацыянальным гістарычным музеі. Выстаўка фота- і відэаматэрыялаў створана спецыялістамі ізраільскага музея-цэнтра Баўхаус, каб пазнаёміць шырокую аўдыторыю з найбольш удалымі прыкладамі рэканструкцыі архітэктурнай спадчыны горада і яго ўключэнні ў сучасны кантэкст.

— Дзіўная рэч: Тэль-Авіў — наш любімы горад, аднак апошнія тры гады я знаходжуся ў музейных залах у Мінску часцей, чым у Тэль-Авіве, — пажартаваў на адкрыцці выстаўкі Надзвычайны і Паўнамоцны Пасол Ізраіля ў Беларусі Алон Шогам. — Сто з нечым гадоў для горада — з аднаго боку, не так і шмат, але для краіны, якой крыху больш за семдзесят — ужо нямала. Мы ганарымся і хвалімся Тэль-Авівам не толькі таму, што ён малады і ў ім малады дух, і сёння якраз карыстаемся магчымасцю паказаць адну са знакавых мясцін горада, і яшчэ раз пахваліцца. Усе карцінкі сапраўдныя, даю чэснае слова, я асабіста жыў і гуляў па многіх вуліцах і бачыў гэтыя будынкі, а цяпер хачу, каб вы таксама ўбачылі наш любімы горад, атрымалі задавальненне і захацелі туды прыехаць, каб паглядзець усё на ўласныя вочы».

Кіраўнік гістарычнага музея Павел Сапоцька нагадаў, што праекты па папулярызацыі культурнай і гістарычнай спадчыны заўжды вельмі добра прыжываюцца і прымаюцца мінскай публікай, да таго ж яны карысныя з пазіцыі вывучэння вопыту па ўключэнні знакавых аб’ектаў у спіс Сусветнай спадчыны ЮНЕСКА: «Таму я шчыра рады, што і нашы супрацоўнікі, і госці музея адкрыюць для сябе такую ўнікальную з’яву і мастацкі кірунак, як баўхаус».

Даследчыкі могуць расказаць і пра ўплыў Баўхауса на архітэктуру СССР і сувязь з Беларуссю (напрыклад, менавіта дзякуючы гэтай школе ў 1927 годзе ўбачыла свет першая кніга Казіміра Малевіча «Супрэматызм. Свет як беспрадметнасць», а архітэктар віцебскай школы, авангардыст Эль Лісіцкі стаў фактычна сувязным паміж мастакамі Захаду і Савецкага Саюза). Але перадусім, канешне, баўхаус — гэта пра гарадскую забудову, мінімалізм, строгія і лаканічныя абрысы, гарызантальныя «стужкавыя» вокны і балконы якой пазнаюцца з першага погляду. Плаўныя бесперапынныя лініі дамоў Белага горада, не сапсаваныя дэкорам, зачароўваюць, а беражлівая рэканструкцыя і арганічнае спалучэнне забудовы 1930-х з сучаснымі хмарачосамі выклікаюць сапраўднае захапленне і надзею — у рэаліях беларускіх гарадоў таксама так можна?

Выстаўка, што працягнецца да 12 лістапада, арганічна спалучылася з мерапрыемствамі фестывалю «Беларуская архітэктурная восень — 2019» — гэты форум збірае майстроў беларускага і замежнага дойлідства і маладых архітэктараў, даючы пляцоўкі для абмену вопытам. «У архітэктуры ёсць свая мода: то мадэрн, то сталінскі ампір... Спадзяюся, што дзякуючы такім выстаўкам адбудзецца культурны рост і калег, і наогул усіх беларусаў, і што нарэшце папулярная ва ўсім свеце сучасная архітэктура ўвойдзе ў моду і ў Беларусі», — заўважыў намеснік старшыні Беларускага саюза архітэктараў Міхаіл Гаўхфельд.

Вікторыя ЦЕЛЯШУК

Фота аўтара

Загаловак у газеце: Убачыць архітэктурную рэвалюцыю — і натхніцца

Выбар рэдакцыі

Грамадства

Як пенсіянерка з Гомеля купіла набор каструль па цане патрыманай іншамаркі

Як пенсіянерка з Гомеля купіла набор каструль па цане патрыманай іншамаркі

Усё, як у казцы: прыгожая зала, музыка, пачастункі. Абаяльныя людзі распавядаюць аб правільным харчаванні і рэкламуюць свой тавар...

Грамадства

714 тысяч тон адходаў для перапрацоўкі сабралі летась беларусы

714 тысяч тон адходаў для перапрацоўкі сабралі летась беларусы

Гэта адходы шкла, паперы, пластыку, шын, батарэек, машыннага масла...

Грамадства

​Дзе прызначалі спатканні ў даваенным Мінску?

​Дзе прызначалі спатканні ў даваенным Мінску?

Атрымаць падказкі вам дапаможа экскурсія «Рамантыка мінскіх дворыкаў».