Вы тут

Беларусы змогуць лячыцца ў расійскім цэнтры ядзернай медыцыны


Беларусь і Расія будуць супрацоўнічаць у галіне анкалогіі. Пра гэта расказала міністр аховы здароўя Расіі Вераніка Скварцова, якая прыехала ў Беларусь для ўдзелу ў сумеснай калегіі профільных міністэрстваў абедзвюх краін «Неўралогія і нейрахірургія».


Фота: pixabay.com

— Нас цікавіць кірунак анкалогіі. Мы плануем супрацоўнічаць, пераходзячы да персаніфікаваных падыходаў. Гэта датычыцца і сучасных анкавакцын, і анкалітычных вірусаў, і клетачных тэхналогій, — расказала міністр. — Будзем супрацоўнічаць і ў галіне радыедыягностыкі і радыетэрапіі, пратонных тэхналогій. У Расіі мы адкрылі цэнтр ядзернай медыцыны — у Дзімітраўградзе. Там знаходзяцца чатыры самыя сучасныя ў свеце пратонныя ўстаноўкі — не толькі для дарослых, але і для дзяцей. Гэта самы магутны цэнтр у Еўропе, і ён будзе аказваць дапамогу і пацыентам з Беларусі.

Вераніка Скварцова паведаміла, што за апошнія два гады ў Расіі прайшлі лячэнне — як амбулаторнае, так і стацыянарнае — каля 55 тысяч беларусаў. У сваю чаргу, міністр аховы здароўя Беларусі Уладзімір Каранік паведаміў, што з пачатку года больш за 70 тысяч расіян атрымала медыцынскую дапамогу ў Беларусі.

Таксама расійскі міністр паведаміла пра падрыхтоўку сумеснага праекта ў галіне антымікробнай рэзістэнтнасці (устойлівасці мікраарганізмаў да супрацьмікробных прэпаратаў, якімі раней лячылі інфекцыю).

— Гэта праблема, якая з'яўляецца асновай экалагічнай бяспекі ва ўсім свеце. Яе трэба вырашаць і праз сельскую гаспадарку, і праз падрыхтоўку ўрачоў, і праз тлумачальную работу з насельніцтвам, і праз стварэнне новых альтэрнатыўных антыбіётыкаў, якія дзейнічаюць па іншых механізмах.

Працягваецца ўзаемадзеянне і ў галіне ствалавых клетак. Новы праект па рэгенератыўнай медыцыне стане працягам папярэдняга, які праходзіў з 2013 да 2017 года.

Вераніка Скварцова расказала, што наведвае Мінск трэці раз. Яе продкі, у прыватнасці прадзед і прабабуля, а таксама дзядуля, жылі ў Гомелі. Беларусь міністр назвала брацкай краінай не толькі з агульнай гісторыяй, але і з падобнымі сучаснымі заканамернасцямі, у прыватнасці дэмаграфічнымі. Сферамі супрацоўніцтва, дзе абедзвюм краінам удалося дасягнуць пэўных поспехаў, яна назвала зніжэнне мацярынскай і дзіцячай смяротнасці, барацьбу з сацыяльнымі інфекцыямі, павелічэнне працягласці жыцця.

Алена КРАВЕЦ

Загаловак у газеце: Дзеля агульнага здароўя

Выбар рэдакцыі

Грамадства

Карэспандэнт «Звязды» высвятляла, чаму так цёмна на асветленых вуліцах Магілёва

Карэспандэнт «Звязды» высвятляла, чаму так цёмна на асветленых вуліцах Магілёва

Вечарам прайсціся ўздоўж цэнтральнай вуліцы Першамайскай у Магілёве адно задавальненне.

Спорт

Баскетбаліст Бенджамін-Павел Дуду: У Гане мяне называлі белым

Баскетбаліст Бенджамін-Павел Дуду: У Гане мяне называлі белым

Мама Бена — беларуска, тата — ураджэнец Ганы.

Эканоміка

Куды звяртацца, калі грамадзяніну затрымліваюць зарплату?

Куды звяртацца, калі грамадзяніну затрымліваюць зарплату?

Адказ на гэта і іншыя пытанні — у гутарцы з Дзмітрыем Шаўчуком.