Вы тут

Аляксандр Лукашэнка: Калі ў Токіа не будзе выніку, ніхто з функцыянераў у спорце больш не затрымаецца


Прэзідэнт Беларусі, прэзідэнт Алімпійскага камітэту праводзіць сход у Нацыянальным алімпійскім камітэце.


Фота БЕЛТА

Адкрываючы нараду, Аляксандр Лукашэнка падкрэсліў, што алімпійскія перамогі аб’ядноўваюць нацыю, усяляюць пачуццё гонару за сваю краіну, адкрываюць новых герояў, у рэшце адлюстроўваюць узровень развіцця грамадства, навукі, медыцыны, эканомікі і дзяржавы ў цэлым. Менавіта таму самыя важныя пытанні ў гэтай сферы разгледжаны на высокім узроўні. У пасяджэнні ўдзельнічаюць кіраўнікі федэрацый і цэнтраў алімпійскай падрыхтоўкі.

Прэзідэнт Алімпійскага камітэта пачаў сход з прыемнага: уручэння пачэснага знака НАК «выдатным спартсменкам, якія завяршылі, на жаль, нядаўна сваю кар’еру».

«Твар спорту ў Беларусі — жаночы. Легенда акадэмічнай грэблі, двухразовая алімпійская чэмпіёнка Кацярына Карстэн і не менш вядомая прадстаўніца Беларусі Саша Герасіменя, якая многія гады змагалася за сваё айчыннае плаванне. Высока цэнім вашу працу, заслугі, і я шчыра рад, што вы звязваеце сваю будучыню з Беларуссю, са спортам. Мусім аказаць неабходную падтрымку, каб вы змаглі праявіць сябе ў справе выхавання новых чэміпіёнаў», — звярнуўся да пераможцаў Прэзідэнт.

На сходзе разгледжаны шэраг арганізацыйных пытанняў. Асноўны пункт парадку дня — падрыхтоўка да Алімпіяды.

Аляксандр Лукашэнка звярнуў увагу ўдзельнікаў сходу, што спорт — шматгранная сфера дзейнасці, якая з’яўляецца часткай эканомікі, адлюстроўвае ўзровень тэхналагічнага развіцця краіны. Акрамя таго, спорт — гэта здароўе нацыі, выхаванне ў падрастаючага пакалення каштоўных асобасных якасцяў, эфектыўная народная дыпламатыя. Высокія дасягненні атлетаў ва многім вызначаюць прэстыж краіны. Вось чаму ў Беларусі надаецца такая сур’езная ўвага развіццю гэтай сферы.

«У наступным годзе ўсёй спартыўнай галіне належыць важны экзамен — Алімпіяда ў Токіа. Самы час прааналізаваць падрыхтоўку да гэтага спартыўнага форума і вызначыць, што яшчэ можна і трэба зрабіць, каб наша каманда апраўдала нарэшце чаканні мільёнаў беларусаў. Каб мы з гонарам глядзелі, як над алімпійскімі аб’ектамі сталіцы Японіі падымаецца беларускі сцяг», — заклікаў Прэзідэнт.

Летась адбыліся дзве вялікія нарады, на якіх Прэзідэнт падрабязна прааналізаваў стан спраў як у зімовых, так і ў летніх відах спорту, намечаны шляхі іх далейшага развіцця, дадзеныя даручэнні і адпрацаваны механізмы іх рэалізацыі.

«Акрамя таго, у красавіку, напярэдадні ІІ Еўрапейскіх гульняў, мы правялі аналагічны „мазгавы штурм“, дэталёва разгледзеўшы гатоўнасць беларускай каманды да гэтай маштабнай падзеі. Мы паспяхова арганізавалі свята еўрапейскага спорту. Пра гэта дагэтуль кажуць у Еўропе — ды і ва ўсім свеце. Дзякуй усім, хто прымаў у гэтым удзел. Гульні ў Беларусі гучна прагучалі на ўвесь свет. І нашы спартсмены ў родных сценах выступілі цалкам дастойна — па колькасці ўзнагарод занялі другое агульнакаманднае месца», — нагадаў Аляксандр Лукашэнка.

Аднак гэты неблагі вынік, упэўнены кіраўнік краіны, ён абсалютна не дае падставы для самазаспакаення. Да галоўных стартаў чатырохгоддзя засталося крыху больш за паўгода, а Алімпійскія гульні — спаборніцтвы іншага фармату, з іншым наборам спартыўных дысцыплін і надзвычайным узроўнем канкурэнцыі.

«Другія гульні ёсць гульні, але Алімпіяда — гэта космас у параўнанні з нашымі гульнямі. І спартсмены там будуць другія», — папярэдзіў лідар краіны.

Таму сёння галоўная ўвага — летнім алімпійскім відам спорту. Тым больш што практычна ўсе чэмпіянаты свету 2019 года завершаны, і высновы па іх выніках можна рабіць цалкам канкрэтныя.

Скарбонка ўзнагарод небагатая

У гэтым годзе на сусветных першынствах беларускія спартсмены заваявалі ў алімпійскіх дысцыплінах усяго восем медалёў, у тым ліку два залатых. Большасць у веславанні на байдарках і каноэ. Больш-менш стабільна на працягу апошніх гадоў выступаюць прадстаўнікі сучаснага пяціборства. Але гэта толькі два камплекты медалёў на Алімпіядзе.

Без медалёў у алімпійскіх нумарах праграмы вярнуліся з сусветных першынстваў баксёры, веласіпедысты, мастацкая гімнастыка. 

«А тут чаго не хапае? Грошай, баз, велатрэку няма? Раней быў, а зараз няма? У мастацкай гімнастыцы сітуацыя пагоршылася з базай падрыхтоўкі. Баксёрам няма дзе рынгі разгарнуць і трэніравацца? Нулявы вынік у нас і ў такіх медалеёмістых відах спорту, як плаванне... Герасіменя Саша можа сказаць: у нас было паўтара басейна з 50-метровай дарожкай. Зараз я з падліку збіўся. Скажыце, плаваць няма дзе? Прынамсі, горш не стала», — абураны Прэзідэнт.

«У тэхнічных відах лёгкай атлетыкі — няма ядра, кап’я? Дзюдо, фехтаванне, стральба кулявая, спартыўная гімнастыка, веславанне акадэмічнае... Гісторыя акадэмічнага веславання на Кацюшы Карстэн скончыцца?» — выказваў прэтэнзіі кіраўнік НАК.

У цяжкаатлетаў адно «срэбра», у барцоў адна «бронза». І гэта тыя віды, перамогі ў якіх яшчэ адносна нядаўна былі візітнай карткай беларускага спорту. Асобная тэма — гульнявыя камандныя віды спорту, якія шчыра любяць і падтрымліваюць нашы аматары.

«Для вас у краіне створаны выдатныя ўмовы, трацяцца немалыя сродкі. Аддачы няма, няма вынікаў. Адны абяцанні. Калі ў Токіа не будзе выніку, ніхто з функцыянераў і чыноўнікаў у спорце больш не затрымаецца. Вы падумайце, дзеля чаго туды ехаць і ці варта вам туды ехаць увогуле. Таму што калі вы турыстамі туды з’ездзеце і вернецеся ні з чым, лепш у краіну не вяртацца. Гэта я вам кажу як Прэзідэнт краіны», — сказаў Аляксандр Лукашэнка.

Усё ёсць, а выніку няма

Ён падкрэсліў, што ў асобных відах нават тэндэнцый да прагрэсу не назіраецца. Практычна нічога не чуваць аб валейбалістах і ватэрпалістах. 

«Што, залаў не хапае займацца валейболам? Калі шчыра ўжо гаварыць, то валейбол стаў неяк прыкметнейшым у адрозненне ад баскетболу», — заўважыў Прэзідэнт.

Ён не можа пагадзіцца з адсутнасцю стабільнасці, калі нашы спартсмены могуць бліскуча згуляць з топавымі камандамі, а наступную гульню з супернікам «узроўню дваровай каманды» прайграць.

«Гэта мазгі ў парадак трэба прыводзіць перш за ўсё, а не выходзіць раслаблена мятаць, скакаць, бегаць, закідваць шайбы, забіваць галы», — заклікаў Прэзідэнт.

З прыходам галандскага трэнера пэўныя надзеі ўскладаліся на жаночую каманду па хакеі на траве, але кваліфікацыйны адбор у чарговы раз правалены. Фактычна, магчымасць прабіцца на Алімпіяду сёння маюць толькі жаночая баскетбольная зборная 3×3, мужчынская гандбольная каманда і пляжны валейбол.

«І не расказвайце пра тытулаваных супернікаў. Шанцы заваяваць ліцэнзію ёсць. Трэба праявіць характар і волю да перамогі! Футбалісты выйшлі гуляць з немцамі. Як і ў нашых, так і ў немцаў па дзве нагі, дзве рукі і адна галава. Але зразумела, што мы прайгралі ўжо да пачатку гульні», — заявіў лідар Беларусі.

На дадзены момант 63 беларускія спартсмены заваявалі права выступіць на Алімпіядзе ў Токіа. Плануецца больш за 100. Але невядома, якая колькасць гэтых ліцэнзіяў трансфармуецца ў медальную якасць з улікам каласальнага суперніцтва ва ўсіх відах.


З кожнай Алімпіядай колькасць нашых алімпійскіх квот падае

У Пекіне ўзялі ўдзел 177 беларускіх спартсменаў, у Лондане — 161, у Рыа-дэ-Жанейра — 123. Такая ж сыходная крывая і ў колькасці заваяваных беларусамі медалёў.

У гэтых умовах важна падвесці кожнага спартсмена да максімальнага выніку. Мэтанакіравана рыхтаваць да жорсткай барацьбы. Забяспечыць усім неабходным на заключным этапе падрыхтоўкі.

«У кожнага з вас павінны быць спіс спартсменаў, якім трэба надаць асаблівую ўвагу, стварыць асаблівыя ўмовы для падрыхтоўкі да Алімпіяды, каб вывесці іх на пік формы. Каб не атрымалася, што мы на ІІ Еўрапейскіх гульнях, здаецца, выступілі, а чэмпіянат па лёгкай атлетыцы „правалілі“ цалкам. Так, зараз будзем спасылацца, што і духата, і жара, і тое, і гэта... Усё гэта было, але ўсе выступалі ў роўных умовах», — звярнуўся да ўдзельнікаў сходу Аляксандр Лукашэнка, запатрабаваўшы кожнага алімпійца ўзяць на індывідуальны кантроль: медыцынскі, псіхалагічны і гэтак далей.

Ён нагадаў, што дзяржавай зроблена нямала для спорту вышэйшых дасягненняў. Нашым трэніровачным базам, арэнам, умовам падрыхтоўкі зайздросцяць многія краіны. Сёлета ўведзены ў эксплуатацыю новы будынак Рэспубліканскага навукова-практычнага цэнтра спорту. 

«Вы так пакутвалі, што ён вам патрэбны. Бярыце — абсталяваны ўсім неабходным для навукова-медыцынскага суправаджэння трэніровачнага працэсу. Усё, што прасілі, зрабілі. Як гэта адбілася на якасці падрыхтоўкі, аднаўлення і рэабілітацыі атлетаў? Цэнтр — гэта добра, абсталяванне — добра, але паглядзіце, хто там працуе. Трэба гэтым заняцца і паглядзець, каб там былі спецыялісты, якія працавалі б на спартсменаў. А так у нас ёсць яшчэ такая практыка — на баку зарабляць, выкарыстоўваючы цэнтры», — падкрэсліў Прэзідэнт.

Выклікае насцярожанасць допінгавая тэма

Не мог ён не ўзгадаць допінгавую тэму, выказаўшы насцярожанасць апошнімі фактамі: Марына Арзамасава (бег на 800 м), Дзмітрый Набокаў (скачкі ў вышыню), Кірыл Грышчанка (барацьба грэка-рымская).

Беларусь прыняла комплекс мер, накіраваных на ўзмацненне жорсткасці барацьбы з допінгам — аж да крымінальнай адказнасці за схіленне спартсмена да выкарыстання забароненых сродкаў.

«Майце на ўвазе, з Себасцьянам Коэ (прэзідэнт Міжнароднай асацыяцыі лёгкаатлетычных федэрацый. — „ЗВ“.) у мяне вельмі добрыя, сяброўскія адносіны, як і са многімі функцыянерамі сусветнага ўзроўню. І дзякуючы гэтым адносінам мы здолелі прыцягнуць сюды шматлікія мерапрыемствы, да нас едуць. Яму што спадабалася ў Беларусі — мая пазіцыя па допінгу. І што мы потым такім людзям будзем казаць?» — чарговае пытанне, адказ на якое яшчэ належыць адшукаць.

Добра вядома, што бывае з тымі, хто пускае гэтыя працэсы на самацёк — Аляксандр Лукашэнка прывёў прыклад цяжкаатлетаў, якім у выніку пасля ўсіх разборак пакінулі ўсяго толькі дзве алімпійскія ліцэнзіі.

«Вельмі шкада, калі нашы цяжкаатлеты — трэба аддаць ім належнае, у апошнія часы выйшлі на годны ўзровень, паказалі сапраўдную барацьбу і характар — і толькі дзве ліцэнзіі», — не хаваў пачуццяў Прэзідэнт.

Нагадаў кіраўнік НАК і пра сітуацыю вакол расійскага спорту: над нашымі суседзямі зноў навісла пагроза ўвогуле не трапіць на Алімпійскія гульні пад сваім сцягам. Могуць падвергнуць санкцыям усю краіну, не звяртаючы ўвагі на чыстых і сумленных атлетаў.

Перамога пачынаецца ў школе

Аляксандр Лукашэнка прапанаваў звярнуць увагу на ўмовы, у якіх праходзіць падрыхтоўка членаў нацыянальных каманд у рэгіёнах, працу спартыўнай вертыкалі на месцах. Бо, звярнуў увагу Прэзідэнт, забяспечанасць спартыўных школ інвентаром, трэнерскімі кадрамі і падрыхтоўка рэзерву — гэта таксама ўнёсак у алімпійскія медалі. 

Усе гэтыя задачы былі вызначаны прыярытэтнымі на мінулым Алімпійскім сходзе, дзе зацверджаны асноўныя напрамкі развіцця галіны на 2017–2020 гады. Выкананне адпаведнай пастановы будзе прааналізавана па выніках Токіа і алімпійскага цыклу. І прадметна паглядзім на вынікі працы ўсіх і кожнага. 

У краіне ёсць таленавітыя спартсмены і трэнеры, неабходная матэрыяльна-тэхнічная база. Важна толькі разумна і эфектыўна распарадзіцца сваімі магчымасцямі. Урад, Міністэрства спорту і Нацыянальны алімпійскі камітэт — тройка, якая мае жорстка ўзяць пад кантроль сітуацыю, штомесячна мае валодаць інфармацыяй кіраўнік Адміністрацыі Прэзідэнта Наталля Качанава.

Плата — толькі за вынікі

«Толькі так, інакш быць не можа. Тады будуць і грошы, і кватэры, і слава, і медалі, і ордэны. Толькі рэзультат. За рэзультат будзе адпаведная плата. Няма рэзультата — няма гэтага нічога», — абазначыў пазіцыю Аляксандр Лукашэнка.

Ён заклікаў у Японіі паказаць максімальны вынік. Гэта нават не пытанне аддачы за ўкладзеныя ў падрыхтоўку спартсменаў намаганні і сродкі. Гэта перш за ўсё пытанне адказнасці перад краінай, перад народам, які верыць у сваіх спартсменаў і чакае гучных перамог. 

«Вось пра што вы павінны памятаць, выходзячы на алімпійскія арэны», — звярнуўся да спартсменаў Прэзідэнт.

Варвара МАРОЗАВА


Заслухаўшы даклад міністра спорту і турызму Сяргея Кавальчука аб гатоўнасці нацыянальнай каманды да Гульняў у Токіа, Аляксандр Лукашэнка спытаў, ці не знікла ў самога міністра акрыленасць, якая была пасля яго прызначэння на пасаду. «Хацелася б, каб у вас гэты агонь не пагас, — пажадаў ён. — Ведаю, што вы чалавек, які спорт вельмі любіць, адданы спорту, але патрэбны вынік. Гэта значыць, што вы самі павінны перш за ўсё гарэць». 

«Вынік будзе», — паабяцаў міністр. 

Прэзідэнт падкрэсліў, што адказнасць, нягледзячы на вялікую колькасць начальнікаў у спорце, перш за ўсё будзе менавіта на міністры. «Вы — стрыжань усёй гэтай работы, — сказаў ён. — Канешне, не трэба забывацца пра старшынь назіральных саветаў, вы ведаеце, што ў нас гэта людзі з вялікімі партфелямі і пагонамі, ім таксама трэба даваць вынік». 

Гэта тычыцца і кіраўнікоў федэрацый, адказнасць якіх таксама будзе найвялікшая, дадаў кіраўнік дзяржавы.

«Я вам скажу проста па-чалавечы, вы проста знікнеце з поля майго зроку, — звярнуўся ён да ўдзельнікаў Алімпійскага сходу, перш за ўсё бізнесменаў, на якіх дзяржава таксама ўсклала абавязак апякацца спортам. — Усіх, ад галоўнага трэнера да старшыні папячыцельскага савету, трэба задзейнічаць». 

«Плаванне, лёгкая атлетыка — гэтыя віды спорту трэба на руках насіць, — рэзюмаваў Аляксандр Лукашэнка. — Няхай скажуць, чаго не хапае, — дапаможам. Але за кожны цэнт, за ўвагу патрэбна аддача». 

Вольга МЯДЗВЕДЗЕВА

Выбар рэдакцыі

Культура

Галоўны рэдактар часопіса «Маладосць» распавядае пра новую стратэгію выдання

Галоўны рэдактар часопіса «Маладосць» распавядае пра новую стратэгію выдання

З пачаткам новай падпісной кампаніі ў «Маладосці» з'явіўся новы «прамоўшан»: цяпер гэта «больш чым часопіс».

Грамадства

Як «Чырвонка. Чырвоная змена» дае дарогу будучым журналістам

Як «Чырвонка. Чырвоная змена» дае дарогу будучым журналістам

Мы заўсёды чакаем найперш ініцыятыўных, здольных нешта прапанаваць. І такія маладыя людзі заўсёды будуць пачуты.