Вы тут

У Гродне з пачатку года за камунальныя неплацяжы выселена больш за 20 сем'яў


Здавалася б, лічба неадназначная, мы паспрабавалі даведацца, што за ёй стаіць. У асноўным гэта жыхары арэндных кватэр, якія не плацяць камунальныя плацяжы некалькі месяцаў. Да ўласнікаў кватэр спачатку прымяняюць папераджальныя меры. Гэта значыць, адключаюць святло, газ і ваду. Што датычыцца сацыяльнага жылля, яго жыхары пры адсутнасці плацяжоў звыш шасці месяцаў, перасяляюцца ў менш камфортныя ўмовы.


Неплацельшчыкі — сапраўдны галаўны боль і камунальных службаў, і судовых выканаўцаў. Бывае, што яны ходзяць да такіх жыхароў, як на работу. Але спагнаць запазычанасць удаецца далёка не ўсюды. Аб адной такой гісторыі расказалі ў гарадскім адзіным інфармацыйным разлікова-даведачным цэнтры Гродна. Яна здарылася некалькі месяцаў таму. Жанчыну, якая пражывала ў абласным цэнтры па вуліцы Кляцкова, па рашэнні суда выселілі з камерцыйнай кватэры, а рэчы вывезлі на склад. Чаму так адбылося?

Гісторыя, можна сказаць, банальная. Жанчына засталася адна ў трохпакаёвай кватэры, прычым аформіць яе ва ўласнасць так і не знайшла часу. Калі тэрмін прыватызацыі завяршыўся, былая гаспадыня перайшла ў статус наймальніка сваёй кватэры. Праўда, арэндная плата ў яе была невысокая — усяго 18 рублёў, бо засялілася яна яшчэ да 2016 года. Тыя, хто засяліўся пазней гэтага тэрміну, плацяць за камерцыйнае жыллё ў 10 разоў больш. Але і ў гэтым выпадку запазычанасць па камунальных плацяжах за апошні год склала больш за 1200 рублёў. Прычына такая ж банальная, як і ўся гэта гісторыя. Жанчына злоўжывала алкаголем. І сваю кватэру ператварыла ў сапраўдны сметнік. Пры гэтым нідзе не працавала. Прапанову выйсці на работу ў ЖЭС, каб пагасіць запазычанасць, поўнасцю ігнаравала. Між тым для тых, хто апынуўся ў цяжкім становішчы, ёсць магчымасць звярнуцца ў цэнтр сацыяльнага забеспячэння, скласці дагавор са службай субсідзіравання на растэрміноўку пры нізкіх даходах. Увогуле зваротаў і просьбаў да яе было нямала, але безвынікова. Таму ў рэшце рэшт і было прынята рашэнне аб высяленні. Кватэра папоўніла камерцыйны фонд горада.

Дарэчы, спіс неплацельшчыкаў з-за злоўжывання алкаголем усё часцей папаўняюць менавіта жанчыны. Іх гісторыі падобныя. У свой час яны «забылі» прыватызаваць кватэры, запазычанасць за няўплату расла, што і прывяло да такога прымусовага высялення.

Ёсць у спісах і свае рэкардсмены-неплацельшчыкі. Гэта наймальнікі, якія не плацяць за пражыванне па 3—3,5 года. Праўда, некаторыя займаюць толькі частку жыллёвай плошчы, таму іх запазычанасць не вельмі высокая, найбольшая — у межах адной тысячы рублёў.

Нямала неплацельшчыкаў і сярод тых, хто атрымаў сацыяльнае жыллё. Самая высокая запазычанасць тут складае больш за дзве тысячы рублёў. Але з сацыяльным жыллём крыху іншы расклад. Жыхароў не высяляюць «у нікуды». Ім даецца іншае жыллё, праўда, менш камфортнае. Напрыклад, замест трохпакаёвай кватэры — аднапакаёўка.

У разлікова-даведачным цэнтры запэўнілі, што не ставяць мэту як мага больш выселіць неплацельшчыкаў. Важней спагнаць з іх запазычанасць, дабіцца аплаты плацяжоў. Многія жыхары, апынуўшыся адной нагой на вуліцы, самі стараюцца выйсці з гэтай сітуацыі, каб не давесці справу да суда. Бо меры і сапраўды жорсткія. Напрыклад, у адносінах да арэнднага жылля хапае двух месяцаў, каб рыхтаваць матэрыял на высяленне.

За дзевяць месяцаў у суд пададзена больш за 100 адпаведных іскаў. У 19 выпадках суд прыняў рашэнне выселіць нядбайных жыхароў. Яшчэ чацвёра пераехалі ў памяшканні меншай плошчы. Летась у судзе было разгледжана больш за 120 іскаў.

Да ўласнікаў кватэр прымяняюцца папераджальныя меры. Калі гаспадар доўгі час не плаціць за кватэру, яму могуць адключыць святло, газ і ваду. Сёлета такія меры напаткалі паўсотні ўласнікаў кватэр.

Усяго на абслугоўванні адзінага разлікова-даведачнага цэнтра знаходзіцца 75 тысяч кватэр ведамаснага жыллёвага фонду. Гэта кватэры, якія належаць дзяржаве. Большасць наймальнікаў, безумоўна, народ дысцыплінаваны і плаціць за паслугі своечасова. Але ні многа, ні мала — пяць тысяч жыровак застаюцца неаплачанымі.

Пераважная большасць даўжнікоў не плаціць за камунальны паслугі ад аднаго да трох месяцаў. Камунальныя службы на кожную затрымку рэагуюць аператыўна. Спачатку папярэджваюць, тэлефануюць, напамінаюць. І гэта прыносіць свой плён. Ужо на гэтым этапе большасць жыровак аплачваецца. Калі ж такія лагодныя меры не дзейнічаюць, пачынаецца наступны этап. Спецыялісты разлікова-даведачнага цэнтра афармляюць выканаўчыя надпісы і падаюць даныя для адключэння камунальных паслуг. Высяленне — самая крайняя мера.

Увогуле, камунальныя службы гатовы аказаць неплацельшчыкам дапамогу ў працаўладкаванні, каб яны маглі разлічыцца з даўгамі і не аказацца на вуліцы. Але практыка паказвае, што злосныя неплацельшчыкі аказваюцца яшчэ і дармаедамі, якія ігнаруюць усе прапановы паправіць сваё матэрыяльнае становішча.


У тэму

У Гродне актыўна ўкараняюцца электронныя жыроўкі

Як паведамілі ў адзіным разлікова-касавым цэнтры горада, такой паслугай карыстаецца каля чатырох тысяч уласнікаў кватэр з 76 тысяч. Пакуль працэнт электронных жыровак невысокі, але ён пастаянна расце. Такім чынам плацельшчык мае магчымасць аформіць жыроўкі ў электронным выглядзе і адправіць на адрас электроннай пошты.

Гэты від аплаты мае шэраг пераваг, упэўнены ў разлікова-касавым цэнтры. Па-першае, зручна самім жыхарам, якім не трэба стаяць у чэргах, каб заплаціць камунальныя плацяжы. Жыроўка дойдзе ім намнога хутчэй, чым адрасатам папяровых версій. Да таго ж такі варыянт значна эканоміць бюджэт, бо штомесяц на выраб апошніх траціцца амаль чатыры тысячы рублёў.

Спрасцілася і сама працэдура пераходу на электронны носьбіт. Напрыклад, летась для гэтага трэба было прыйсці ў Цэнтр і напісаць заяву. Сёлета прадпрыемства адкрыла электронную старонку рэгістрацыі, а таксама «асабісты кабінет».

Маргарыта УШКЕВІЧ

Прэв'ю: nashkiev.ua

Загаловак у газеце: Калі папераджальныя меры не спрацоўваюць...

Выбар рэдакцыі

Грамадства

Гродзенскі заапарк без страт выходзіць з зімоўкі і рыхтуецца да новага сезона

Гродзенскі заапарк без страт выходзіць з зімоўкі і рыхтуецца да новага сезона

Літаральна нядаўна з'явіўся і першы ў гэтым годзе прыплод.

Грамадства

Анёл па імені Алена. Як прадпрымальніца стала сацработнікам

Анёл па імені Алена. Як прадпрымальніца стала сацработнікам

Сацыяльны работнік тэрытарыяльнага цэнтра сацыяльнай абароны насельніцтва Маскоўскага раёна Мінска Алена Сцепаненка працуе на сваім месцы каля двух гадоў.

Эканоміка

Магілёўскі прадпрымальнік — пра вытворчасць на перыферыі і адказнасць перад сабой і людзьмі

Магілёўскі прадпрымальнік — пра вытворчасць на перыферыі і адказнасць перад сабой і людзьмі

Сідаравічы — невялікі аграгарадок паміж Магілёвам і Быхавам. Менавіта тут знаходзіцца вядомая ў Магілёўскім раёне фермерская гаспадарка Сяргея Куцанава.