Вы тут

​Беларускі саюз мастакоў вызначыў найлепшых айчынных графікаў


Афорты, гравюры, літаграфіі, малюнкі тушшу і акварэллю, сучасныя лічбавыя тэхналогіі... На выстаўцы-конкурсе «Графіка года», што адкрылася днямі ў сталічнай галерэі Міхаіла Савіцкага, прадставілі свае работы больш за 30 прафесійных аўтараў, сярод якіх як моладзь, так і ўжо вопытныя і вядомыя мастакі. У рамках праекта, які ладзіцца трэці год запар, секцыя «Графіка» Беларускага саюза мастакоў вызначыла лідараў у сваім кірунку — тых, хто, магчыма, у найбліжэйшай будучыні калі і не атрымае званні заслужаных дзеячаў мастацтва, то прымусіць гаварыць пра сябе ў шырокіх колах грамадства і папулярызуе графічнае мастацтва як у краіне, так і на міжнародным узроўні.


Арганізатары праекта і ўдзельнікі журы, у тым ліку старшыня секцыі «Графіка» Андрэй Басалыга і мастак Юрый Якавенка, у спаборніцтве не ўдзельнічалі, але прадставілі свае творы ў экспазіцыі. Таксама па-за конкурсам — і работа славутай мастачкі, кавалера ордэна Францыска Скарыны Зоі Літвінавай; карціна сустракае наведвальнікаў выстаўкі на ўваходзе ў залу і пэўным чынам задае тон і планку ўсім астатнім. На экспазіцыі, зазначым, ёсць дзе разбегчыся і дзе адпачыць вачам: тэмы і сюжэты аўтары абралі самыя шырокія: ад картаў Таро ў Таццяны Сіплевіч да нітак лёсу Макошы ва Усевалада Швайбы, ад алфавіта ва Усевалада Свентахоўскага да біблейскіх матываў і герояў ва Уладзіміра Вішнеўскага, ад графічнага ўвасаблення музыкі Баха, Паганіні і Вівальдзі ў Ірыны Кузняцовай да зямнога і цёплага каляднага імбірнага пячэння ў Валянціны Шобы, ад празаічнага чыгуначнага моста ў Ганны Мельнікавай да індуісцкай міфалогіі ў Андрэя Ярашэвіча... Сказаць адназначна, чые творчы палёт, арыгінальнасць ідэі і майстэрства вышэйшыя, проста немагчыма. Зрэшты, прафесіяналы прызнаюцца, што і для іх вызначэнне найлепшых не было лёгкім. «Спачатку мы з іншымі ўдзельнікамі журы разглядалі конкурсныя работы паасобку, потым пачалі абмяркоўваць усе разам — і аказаліся надзіва салідарнымі па многіх пунктах, — тлумачыць дызайнер, педагог і мастацтвазнаўца Надзея Кароткіна. — Што да крытэрыяў ацэнкі, мы стараліся знаходзіцца не ў Еўропе, не ў Беларусі і нават не ў Мінску — ацэньваць толькі тое, што бачым на ўласныя вочы. Гэта было складана, амаль немагчыма, але кантэкстам мы лічылі тое, што адбываецца тут і цяпер».

Пераможцаў конкурсу 2019 года вызначалі ў дзвюх намінацыях: арыгінальная і друкаваная графіка. Першае месца за арыгінальную графіку атрымала прадстаўніца шырока вядомай творчай дынастыі Катковых-Луцэвічаў мастачка Зоя Луцэвіч, другое не прысуджалі, бо «не ўбачылі адпаведнага ўзроўню», а трэцяе падзялілі паміж двума аўтарамі — Верай Каўзановіч і Усеваладам Швайбам. У намінацыі «Друкаваная графіка» найлепшымі назвалі работы Тамары Шэлест, Андрэя Якубава і Вольгі Нікішынай.

Выстаўка «Графіка года», кажуць арганізатары, стала яшчэ адной прыступкай на шляху да правядзення першага ў Беларусі міжнароднага трыенале графікі. Убачыць работы пераможцаў і ўдзельнікаў конкурсу можна да 8 снежня.

Вікторыя ЦЕЛЯШУК

Фота аўтара

Загаловак у газеце: Чорнае, белае, яскравае

Выбар рэдакцыі

Грамадства

Прадпрымальнікі запусцілі сацыяльную ініцыятыву, каб сэканоміць сродкі бюджэту, але вымушаны за гэта плаціць

Прадпрымальнікі запусцілі сацыяльную ініцыятыву, каб сэканоміць сродкі бюджэту, але вымушаны за гэта плаціць

На ўпарадкаванне пасля прыклееных паперак выдаткоўваюцца велізарныя сродкі.