Законы павінны быць зразумелыя людзям

Адбылося першае арганізацыйнае пасяджэнне сесіі Савета Рэспублікі Нацыянальнага сходу сёмага склікання. Старшынёй Савета Рэспублікі абрана Наталля Качанава. Яе намеснікам абраны Анатоль Ісачанка.

Выбранню на гэтыя высокія дзяржаўныя пасады папярэднічала абмеркаванне іх кандыдатур. І Наталля Качанава, і Анатоль Ісачанка пачулі ад членаў Савета Рэспублікі шмат прыемных, заслужаных і справядлівых слоў. Абодва палітыкі — людзі добра вядомыя і аўтарытэтныя ў краіне.

Прамоўцы, у прыватнасці, адзначалі, што перш чым Наталлю Качанаву вылучылі на работу ў Адміністрацыю Прэзідэнта (кіраўніком якой яна была тры гады), за яе плячыма ўжо была вялікая і ўражлівая біяграфія. Нагадаем, пачынала працоўны шлях Наталля Качанава на радавых пасадах, кожная з якіх узбагачала яе жыццёвым і прафесійным досведам. Важнай прыступкай у яе кар'еры стала работа старшынёй Наваполацкага гарвыканкама. За сем гадоў у горадзе было шмат зроблена карыснага для яго жыхароў. Невыпадкова гараджане прысвоілі ёй у 2014 годзе званне ганаровага грамадзяніна Наваполацка.

У сваем слове да новага складу Савета Рэспублікі Наталля Качанава як яго старшыня акрэсліла тое кола пытанняў і праблем, якія бачацца ёй першачарговымі. Лейтматывам гучала думка, што ў аснове заканатворчай дзейнасці верхняй палаты парламента павінны быць інтарэсы людзей, іх паўсядзённыя клопататы і турботы, якія б дробныя яны ні здаваліся на першы погляд. А для гэтага варта часцей наведваць працоўныя калектывы, пастаянна бываць у рэгіёнах, больш шчыльна і змястоўна працаваць з дэпутатамі мясцовых Саветаў. Трэба эфектыўней выкарыстоўваць іх патэнцыял.

Вядома, у цэнтры ўвагі Савета Рэспублікі будуць важныя пытанні дзяржаўнага будаўніцтва. У гэтай справе трэба працягваць традыцыі папярэдняга складу верхняй палаты. На погляд Наталлі Качанавай, законы павінны быць зразумелыя людзям. Апроч унутраных пытанняў, неабходна будзе ўзмацніць дзейнасць на міжнароднай арэне, развіваць сувязі з парламентамі блізкіх і далёкіх краін.

У ходзе першага арганізацыйнага пасяджэння сесіі адбылося выбранне Пастаянных камісій Савета Рэспублікі і іх старшынь.

Старшынёй Пастаяннай камісіі Савета Рэспублікі Нацыянальнага сходу па заканадаўстве і дзяржаўным будаўніцтве абраны Сяргей Сівец.

Старшынёй Пастаяннай камісіі Савета Рэспублікі Нацыянальнага сходу па эканоміцы, бюджэце і фінансах абрана Таццяна Рунец.

Старшынёй Пастаяннай камісіі Савета Рэспублікі Нацыянальнага сходу па адукацыі, навуцы, культуры і сацыяльным развіцці абраны Віктар Лісковіч.

Старшынёй Пастаяннай камісіі Савета Рэспублікі Нацыянальнага сходу па рэгіянальнай палітыцы і мясцовым самакіраванні Міхаіл Русы.

Старшынёй Пастаяннай камісіі Савета Рэспублікі Нацыянальнага сходу па міжнародных справах і нацыянальнай бяспецы абраны Сяргей Рачкоў.

Леанід ТУГАРЫН

Фота Яўгена ПЯСЕЦКАГА