У асноўным звярталіся з набалелым. Адны імкнуліся вырашыць, хто павінен займацца ўборкай прыдамавой тэрыторыі. Другіх непакоіў стан роднай вёскі і тых аб'ектаў, якія пустуюць. Жыхары ўзбярэжжа рэчкі Гараднічанкі звярнулі ўвагу на падтапленне двароў і дамоў, якое здараецца ў час паводкі.
Першы быў прыняты званок з гарадскога пасёлка Казлоўшчына Дзятлаўскага раёна. Праўда, мужчына не стаў сябе называць, а паведаміў, што ў пасёлку варта звярнуць увагу на сацыяльна важныя аб'екты. У прыватнасці, мужчына выказаў прапанову пашырыць ложкавы фонд мясцовай бальніцы за кошт былой школы, якая цяпер часткова пустуе.
Праблема добраўпарадкавання гарадскога пасёлка Казлоўшчына будзе вырашацца, адзначыў Іван Лаўрыновіч. Населены пункт разам з Любчай трапіў у лік пасёлкаў Гродзенскай вобласці, якія падпадаюць пад рэспубліканскую праграму на будучы год. Згодна з ёй, тут будуць аднаўляцца дарогі, сацыяльныя аб'екты, жылы фонд. Цяпер рыхтуецца праектна-архітэктурнае рашэнне, вясной пачнуцца работы — сродкі на гэта закладзены ў абласны бюджэт.
Не першы раз падчас прыёмаў чыноўнікаў ставяцца пытанні па рамонтных работах. Вось і гэтым разам да памочніка Прэзідэнта звярнуўся жыхар мікрараёна Фолюш абласнога цэнтра, якога непакояць бясконцыя работы па пракладцы цеплатрасы. У выніку ўвесь двор доўгі час разрыты, трубы ляжаць наверсе. Іван Лаўрыновіч абяцаў пабываць на месцы і разабрацца, чаму там марудна ідзе гэты працэс. На кантроль будзе ўзнята і праблема стану старых дамоў. З такой просьбай звярнулася жыхарка прыватнага сектара Алена Васілеўна. У яе драўляны дом, пячное ацяпленне, але ў суседніх кватэрах ніхто не жыве, таму трэба вельмі шмат паліва, каб утрымліваць цяпло. У той жа час арэндныя кватэры пры адпаведным рамонце можна было б засяліць.
— Гэта пасляваенныя дамы, і трэба паглядзець гаспадарскім вокам, што там можна зрабіць, — заўважыў Іван Лаўрыновіч. — Таму адпаведныя службы павінны гэтым заняцца. Вядома, не ўсе могуць атрымаць добраўпарадкаванае жыллё, а вось адрамантаваць, палепшыць стан таго, што ёсць, рэальна.
Праблема з жыхарамі вуліц, якія знаходзяцца на беразе рэчкі Гараднічанкі, будзе вырашацца больш кардынальна. Падтапленне двароў і дамоў здараецца тут даволі часта. А не так даўно каля аднаго з будынкаў змыла мост, і людзі ходзяць у абход, расказаў падчас прыёму пенсіянер Тадэвуш Калікставіч. Яму паведамілі, што тэрыторыя берагоў Гараднічанкі згодна з генеральным планам развіцця горада будзе добраўпарадкавана, але ператворыцца ў зялёную зону без жылых забудоў. Адпаведна, людзей, якія жывуць на некалькіх вуліцах каля рэчкі, будуць перасяляць у добраўпарадкаваныя кватэры. Праект па развіцці тэрыторыі распрацуюць налета, самі работы распачнуцца ў трэцім квартале.
— Калі была паводка, мы выязджалі разам з мэрам, там будынкі знаходзяцца ў небяспечным стане. Умацаванне берага не палепшыць сітуацыю, яна праз нейкі час зноў паўторыцца. Людзей трэба адназначна перасяліць, даць ім нармальнае жыллё згодна з прапіскай і метражом. Тым больш што там жывуць у асноўным пенсіянеры, — зазначыў Іван Лаўрыновіч.
Даволі працяглая размова адбылася ў памочніка Прэзідэнта з жыхаркай вёскі Масткі, што пад Гроднам. Людміла Сяргееўна пераехала ў бацькоўскі дом з горада, завяла статак кароў. Тут жыве разам з дзецьмі і вядзе падсобную гаспадарку. Падчас прыёму жанчына расказала, што паша, якую ёй выдзелілі, знаходзіцца далёка ад дома, сачыць за жывёламі на такой адлегласці немагчыма. У выніку здараюцца патравы на калгасных палях, жанчыне выпісваюць штраф. Людміла хацела б развівацца, стварыць фермерскую гаспадарку, але не ведае, як гэта зрабіць.
— Такім людзям трэба дапамагаць, — лічыць Іван Лаўрыновіч. — У мяне адбудзецца размова з кіраўніком гаспадаркі, патлумачу, што трэба выдзеліць зямлю, каб людзі займаліся падсобнай гаспадаркай. У некаторых выпадках трэба ісці на кампраміс і рабіць усё неабходнае для таго, каб аказаць рэальную дапамогу чалавеку.
Маргарыта Ушкевіч
Фота: grodnonews.by
Канцэрт для дзяцей і моладзі, пластычны спектакль Ягора Дружыніна і «Рок-панарама».
Выбар саджанца для садавода — той момант, значнасць якога складана пераацаніць.
Актрыса НАДТ імя М. Горкага — пра шлях да сцэны і натхненне.
Тата і мама — два самыя важныя чалавекі ў жыцці кожнага дзіцяці.