Вы тут

Як пошта рыхтуецца да Новага года


Менш чым тры тыдні застаецца да надыходу 2020 года. Па ўжо даўняй традыцыі беларуская пошта рыхтуецца не толькі да гэтага свята, але і да Калядаў. Бо менавіта ў апошнія дні старога і першыя дні новага года шмат хто хоча павіншаваць сваіх блізкіх і родных. Але адна рэч — дасланае ў месенджары ці на электронную пошту паведамленне, і зусім іншая — падпісаная ад рукі паштоўка.


— Так, са з'яўленнем хуткасных варыянтаў перадачы інфармацыі функцыі паштоўкі крыху змяніліся, але прызначаная радаваць — яна адыгрывае сваю ролю і па гэты дзень, — кажа прэс-сакратар РУП «Белпошта» Вікторыя Джухунян. — Так шмат у ёй чалавечнасці, цяпла, чакання свята. Менавіта таму наша паштоўка — гэта не проста распрацаваны дызайн, растыражаваны на каляровым кардоне, а значна большае — жывыя эмоцыі, пачуцці, адносіны, самавыяўленне. Таму мы штогод распрацоўваем святочную калекцыю паштовак, картак, канвертаў каляднай і навагодняй тэматыкі.

Такім чынам, сёлета да выбару пакупнікоў — некалькі дзясяткаў святочных сюжэтаў. На паштоўках адлюстраваны выявы Дзеда Мароза, Снягуркі і кампазіцыі з ёлачнымі цацкамі, мандарынамі, гадзіннікамі, белымі мішкамі на лёдзе, снегірамі... Дызайн паштовай прадукцыі распрацоўваецца выключна з улікам тэхнічных магчымасцяў прадпрыемстваў паліграфічнай галіны. Сярод «фішак» — пластызоль белага і жоўтага колеру, цісненне гладкай каляровай і тэкстурнай фольгай, тэрмапад'ём. Усё гэта робіцца для таго, каб кожная паштоўка займела ўласны стыль. І — прыемная разыначка — вялікая частка святочнай прадукцыі аформлена па-беларуску.

Яшчэ 7 кастрычніка былі выпушчаны мастацкія маркіраваныя канверты «Са святам Божага Нараджэння!», «З Новым годам!» і «З Раством Хрыстовым і Навалеццем!» Іх тыраж склаў 60, 110 і 100 тысяч экзэмпляраў адпаведна.

Акрамя таго, 30 кастрычніка Міністэрства сувязі і інфарматызацыі выпусціла ў абарачэнне паштовыя маркі «З Калядкамі!», «З Раством Хрыстовым!», «З Новым годам!». Маркі аддрукаваны тыражом 60 тысяч экзэмпляраў. Да таго ж былі адмыслова падрыхтаваны карткі для картмаксімумаў. Гэта мастацкая паштоўка, на ілюстраваным баку якой наклеена паштовая марка. Па сюжэце такая марка супадае з ілюстрацыяй карткі. Падстава, час і месца яе гашэння таксама мусяць адпавядаць сюжэту як карткі, так і маркі.

Навагоднюю паштовую прадукцыю можна купіць ва ўсіх аддзяленнях паштовай сувязі Беларусі, а таксама ў інтэрнэт-краме shop.belpost.by
і на ярмарках-кірмашах у круглай і пасылачнай залах Галоўпаштамта ў Мінску.

На сувязі — Дзед Мароз

Дарэчы, на Галоўпаштамце арганізуюць адмысловую навагоднюю фотазону. У ёй гасцей стануць чакаць Дзед Мароз і Снягурка. На жаль, рабіць яны гэта будуць толькі па дзве гадзіны ў вызначаныя дні.

Расклад святочнага дзяжурства наступны. 20, 24 і 30 снежня казачныя персанажы чакаюць гасцей з 14 да 16 гадзін. Для тых, у каго не атрымаецца прыйсці ў гэты час, зарэзерваваны прамежак з 16 да 18 гадзін 26 снежня. Свята разлічана на сямейны фармат. Калі дарослыя змогуць сфатаграфавацца на памяць у святочнай атмасферы, то дзеці атрымаюць магчымасць падзяліцца з Дзедам Марозам і Снягуркай сваімі запаветнымі жаданнямі.

— Дарэчы, самыя цікавыя здымкі будуць апублікаваны ў групах РУП «Белпошта» ў сацыяльных сетках, — працягвае суразмоўца. — Для гэтага іх трэба апублікаваць з хэштэгамі #belpost і #белпочта. Між іншым, яркія навагоднія фотазоны арганізаваны і ў вылучаных аддзяленнях паштовай сувязі.

У круглай зале Галоўпаштамта ўстаноўлена спецыяльная скрыня. Напісаць пра свае пажаданні і мары можна наўпрост Дзеду Марозу і Снягурцы. Але для гэтага не трэба ехаць у Мінск з іншых гарадоў — навагодняе пасланне можна адправіць з любога аддзялення паштовай сувязі. Каб зрабіць гэта, трэба проста правільна ўказаць адрас: 225063, рэзідэнцыя Дзеда Мароза ў Белавежскай пушчы (вёска Каменюкі, Брэсцкая вобласць). Праўда, да апошніх дзён года цягнуць з выкладаннем сваіх думак у эпісталярным жанры не варта. Практыка паказвае, што менавіта на іх і прыпадае асноўная колькасць адпраўленых паштовак. І Дзед Мароз проста не паспее прачытаць за гэты час тысячы дасланых лістоў.

16 снежня Дзед Мароз святкуе свой дзень нараджэння. Улюбёны казачны персанаж чакае, што хлопчыкі і дзяўчынкі адправяць яму маляўнічыя, цёпла напісаныя лісты з аповедамі пра сябе, зробленыя ў адыходзячым годзе добрыя ўчынкі. «Белпошта» дапаможа дзецям: у гэты дзень у вылучаных аддзяленнях сувязі будуць устаноўлены адмысловыя паштовыя скрыні, куды можна будзе апусціць ліст. І канешне ж, сфатаграфавацца на памяць.

А яшчэ кожны з нас можа далучыцца да невялікай, але вельмі пачэснай справы. Вось ужо шосты год «Белпошта» праводзіць спецыяльную акцыю «Падары дзіцяці радасць». Сутнасць яе простая — кожны чалавек можа аформіць дабрачынную падпіску на газеты і часопісы, якія будуць прыходзіць на адрас аднаго з дзіцячых дамоў або прытулкаў. За гэты час часцінку радасці чытання дзецям, з якімі жыццё абышлося не вельмі добра, падарылі ўжо тысячы дарослых. Сімвалічнае дрэва з яблыкамі, на якіх пазначаны імёны, узрост і адрас дзяцей, размешчана ў будынку Галоўпаштамта. Не заставайцеся ж убаку і вы!

Валяр'ян ШКЛЕННІК

Выбар рэдакцыі

Грамадства

Палацы, паркi, сядзiбы. На Брэстчыне вядзецца вялiкая работа па аднаўленнi гiсторыка-культурных аб'ектаў

Палацы, паркi, сядзiбы. На Брэстчыне вядзецца вялiкая работа па аднаўленнi гiсторыка-культурных аб'ектаў

Адным з першых у вобласцi пачалi рэстаўрыраваць велiчны палац Сапег у Ружанах.

Грамадства

Шопiнг з дапоўненай рэальнасцю. Тэхналогii 3D-мадэлявання адкрыюць новы фармат гандлю

Шопiнг з дапоўненай рэальнасцю. Тэхналогii 3D-мадэлявання адкрыюць новы фармат гандлю

Наша краiна займае трэцяе месца ў сваiм рэгiёне па колькасцi бескантактавых транзакцый.

Грамадства

Неспадзяваныя падарожжы. Як не згубiцца ў лесе?

Неспадзяваныя падарожжы. Як не згубiцца ў лесе?

Цёплае i вiльготнае надвор'е, якое вось ужо чацвёрты тыдзень з невялiкiмi перапынкамi пануе ў Беларусi, штурхае да таго, каб пайсцi ў лес.