Пад Салігорскам у ДТЗ загінула пасажырка маршруткі

Сёння каля 7:00 у Салігорскім раёне на аўтадарозе Раткава - Салігорск каля вёскі Кулакі адбылося ДТЗ, паведамляе МУС.

У маршрутнае таксі, якое рухалася ў бок Салігорска, урэзаўся аўтамабіль «Газэль», які рухаўся ў спадарожным кірунку.

Як паведамілі супрацоўнікі АДАІ Салігорскага РАУС, ад удару маршрутнае таксі з'ехала ў левы кювет і ўрэзалася правым бокам у дрэва. Туды ж з'ехала і «Газель».

У выніку ДТЗ загінула 50-гадовая пасажырка маршрутнага таксі. Траўмы атрымалі абодва кіроўцы і двое пасажыраў маршруткі - яны дастаўлены ў бальніцу.