Вы тут

Прэзідэнт: За палачна-галачную сістэму трэба сажаць у турму


На нарадзе ў Прэзідэнта абмеркавалі сітуацыю ў сферы прымянення мер адміністрацыйнай адказнасці.

Аляксандру Лукашэнку далажылі аб стане спраў па ўжыванні адміністрацыйнай адказнасці і прапанавалі канкрэтныя рашэнні па ўрэгуляванні наяўных праблем. Вынікі нарады будуць пакладзены ў аснову работы экспертнай камісіі.


Фотафіксацыя — каб навесці парадак, а не загнаць кіроўцаў у разрад парушальнікаў

«Гэта важная тэма хвалюе мільёны нашых грамадзян. Ці ў поўнай меры ў гэтай працы забяспечваецца справядлівасць, аб якой мы часта кажам і якая так запатрабавана нашым насельніцтвам? Насцярожвае статыстыка: за дзесяць гадоў колькасць такіх правапарушэнняў павялічылася амаль у два разы. Пры гэтым толькі за няпоўныя пяць гадоў зарэгістравана 16 мільёнаў парушэнняў, за здзяйсненне якіх да адказнасці прыцягнутыя каля трох з паловай мільёнаў грамадзян, што складае больш за 50 працэнтаў усяго працаздольнага насельніцтва краіны», — збянтэжаны кіраўнік краіны.

Ён намераны разабрацца, што стаіць за гэтымі дадзенымі, і прыняць меры. Па інфармацыі Аляксандра Лукашэнкі, асноўны масіў (больш за 80 працэнтаў) сёння складаюць парушэнні ў сферы бяспекі дарожнага руху, пераважна зафіксаваныя з прымяненнем тэхнічных сродкаў.

«Мяркую, так званыя «лісты шчасця» ад дзяржаўнай аўтаінспекцыі хоць аднойчы атрымліваў практычна кожны, хто сядзеў за рулём аўтамабіля. Разам з тым фотафіксацыя сем гадоў таму была ўведзеная для таго, каб навесці парадак на дарозе, а не загнаць усіх пагалоўна кіроўцаў у разрад злосных парушальнікаў закона. Тым больш што нярэдка парушэнні абумоўлены перагружанасцю дарог, адсутнасцю дастатковай колькасці парковачных месцаў і іншымі аб’ектыўнымі ўмовамі», — падкрэсліў Прэзідэнт.

На яго погляд, трэба старанна разабрацца ў сітуацыі і сфармаваць аптымальныя ўмовы, калі чалавек будзе зацікаўлены выконваць правілы дарожнага руху. На яго нельга вешаць ярлык правапарушальніка ў сітуацыі, калі не створана магчымасць для нармальнага руху. Таму Аляксандр Лукашэнка паставіў задачу разгрузіць участкі дарог, на якіх фіксуецца найбольшая колькасць правапарушэнняў, а таксама павялічыць з улікам рэальнай запатрабаванасці колькасць парковачных месцаў, усталёўваць знакі, якія абмяжоўваюць хуткасць руху менавіта там, дзе гэта аб’ектыўна неабходна.

«Там, дзе я перамяшчаюся, выкананы (даручэнні Прэзідэнта. — «Звязда»), хуткасць руху была павялічана як мае быць. Там, дзе я нібыта радзей на кальцавой дарозе бываю, усё так і засталося», — падкрэсліў кіраўнік дзяржавы недапушчальнасць нядбайнасці.

Прэзідэнт патрабуе выкараніць «палачна-галачную» сістэму

Сярод важных праблем Прэзідэнт назваў і выкарыстанне валавых справаздачных паказчыкаў для ацэнкі выніковасці дзейнасці службовых асоб упаўнаважаных ведамстваў.

«Як мне дакладаюць, да гэтага часу ў нас не выкаранена „палачна-галачная“ сістэма. Гэтым грашаць практычна ўсе: міліцыя, мытныя органы, падатковая інспекцыя, пажарная служба, санстанцыя і іншыя. Даходзіць да таго, што кіраўніцтва з супрацоўнікаў прама патрабуе прынесці не менш за тры-пяць пратаколаў аб правапарушэннях за дзень. Калі не, застануцца без прэміі. Недапушчальна. За гэта трэба саджаць у турму без суда і следства. У адваротным выпадку мы не выкаранім гэту праблему — будзе пустаслоўе», — адзначыў Аляксандр Лукашэнка.

Часам і самі работнікі праяўляюць залішнюю стараннасць у надзеі вызначыцца. Па-ранейшаму шмат пытанняў у гэтым плане перш за ўсё да супрацоўнікаў міліцыі, звярнуў увагу лідар краіны. Ён нагадаў, што ў жніўні на нарадзе па пытаннях якасці працы праваахоўных органаў гэта пытанне ўжо абмяркоўвалі на дзяржаўным узроўні, таму Прэзідэнт чакае выніку — і не толькі па лініі міліцыі.

Правам складаць пратаколы аб правапарушэннях валодаюць супрацоўнікі больш за 70 ведамстваў. Ад усіх Аляксандр Лукашэнка патрабуе дакладнага разумення, што галоўны крытэрый працы — не колькасць выяўленых парушэнняў і выпісаных штрафаў, а якасная рэалізацыя мер прафілактычнага ўздзеяння і рэальнае скарачэнне адміністрацыйных правін у даручанай сферы.

«Напэўна, нам трэба ў якасці паказчыкаў унесці: чым больш пратаколаў складзена, значыць, тым больш бязладдзя на ведамасных тэрыторыях. І за гэта спаганяць. Тады не будуць складаць лішнія пратоколы і патрабаваць», — мяркуе беларускі лідар.

Аляксандр Лукашэнка загадаў выключыць карэкціроўкі заканадаўства на бліжэйшыя гады

«Дзеючы Кодэкс аб адміністрацыйных правапарушэннях выкарыстоўвае пераважна карны спосаб вырашэння любых канфліктных сітуацый. Так з савецкіх часоў цягнецца ў нас. А гэта ж фармуе ў грамадстве меркаванне аб празмернай жорсткасці і нават лютасці органаў улады і ўлады ўвогуле, а часта і відавочнай несправядлівасці практыкі прымянення адміністрацыйных санкцый», — незадаволены Прэзідэнт.

Ён нагадаў, што за 12 гадоў дзеяння кодэкса прынята 115 законаў, на падставе якіх у яго ўнесена больш за тысячу чатырыста карэкціровак. На думку кіраўніка дзяржавы, пры падобных абставінах дэвальвуецца павага да Закону. Таму важна забяспечыць стабільнасць адміністрацыйнага заканадаўства, а таксама рэалізацыю прафілактычных мер, накіраваных на папярэджанне правапарушэнняў.

Для гэтага Прэзідэнт даручыў з ліку кіраўнікоў дзяржаўных органаў, парламентарыяў і навукоўцаў стварыць спецыяльную экспертную камісію, якой належыць сістэмна перагледзець палажэнні дзеючага заканадаўства і падрыхтаваць цэласны дакумент па ўдасканаленні парадку і ўмоў прыцягнення да адміністрацыйнай адказнасці.

«Словам, паўгода працы — і вы мусіце пакласці мне на стол якасны дакумент, які адпавядае жыццёвым патрэбнасцям нашых грамадства і дзяржавы. Пры гэтым трэба зрабіць так, каб выключыць карэкціроўкі заканадаўства ў гэтай сферы як мінімум на наступныя пяць гадоў. Да ліпеня 2020 года адпаведны законапраект павінен быць у мяне на стале, каб прапрацаваць яго і ўнесці ў Парламент для прыняцця закона», — абазначыў тэрміны Аляксандр Лукашэнка.

Аб пэўных недахопах у працы яму далажыў старшыня Камітэта дзяржаўнай бяспекі Валерый Вакульчык, ведамства якога вывучыла практыку прымянення мер адміністрацыйнай адказнасці.

Варвара МАРОЗАВА

Фота БЕЛТА

Выбар рэдакцыі

Грамадства

Балерына Юлiя Дзятко: Дзецi кар'еры не перашкода, калi i работа любiмая, i дзецi жаданыя

Балерына Юлiя Дзятко: Дзецi кар'еры не перашкода, калi i работа любiмая, i дзецi жаданыя

Яны пазнаёмiлiся ў 10-гадовым узросце ў харэаграфiчным вучылiшчы i з таго часу не расстаюцца.

Грамадства

Не атрымалася паехаць на мора? Займiцеся складаннем радаводу!

Не атрымалася паехаць на мора? Займiцеся складаннем радаводу!

Колькасць людзей, якiя спрабуюць адшукаць свае каранi, з кожным годам павялiчваецца. 

Грамадства

Першая дапамога дзецям пры траўмах. Што трэба ведаць?

Першая дапамога дзецям пры траўмах. Што трэба ведаць?

​Дастаткова часта дзецi трапляюць у крытычныя сiтуацыi праз сваю цiкаўнасць i павышаную актыўнасць.